ءسىرا، مىنا جۇرتقا جاعىپ بولماس
قوجا بالاسىن ەسەككە مىنگىزىپ، ءوزى جاياۋ ءجۇرىپ، جولاۋشىلاپ كەلە جاتادى. جولدا كەزدەسكەن جۇرت:
— بۇ جاستاردى قويساڭشى. عۇلاما عالىمدىعىمەن جۇرتقا تانىلعان اكەسىن جاياۋ جۇرگىزىپ، ءوزى ەسەككە ءمىنىپ الىپتى، — دەپ سىن ايتادى.
سوندا بالاسى قوجاعا:
— اكە، ءتىل ال، الگىندە ايتپادىم با؟ قاسارىسپاي كەل، ەسەككە ءمىن، — دەيدى.
قوجا ەسەككە ءمىنىپ، بالاسى جاياۋ ءجۇرىپ وتىرادى. ءبىراز جۇرگەن سوڭ تاعى دا الدارىنان قارسى جولىققان ادامدار:
— ءاي-اي-اي! ەڭگەزەردەي بولىپ ەسەككە ءوزى ءمىنىپ كەلەدى. انا قۇرتاقانداي، اپ-ارىق بالانى جاياۋ جۇرگىزىپ، ازاپقا سالۋ ءجون بە ەكەن؟ — دەيدى. مۇنى ەسىتكەن قوجا بالاسىن الدىنا مىنگىزىپ الادى.
بىرنەشە قادام ءجۇرۋى-اق مۇڭ ەكەن، الدارىنان تاعى دا ءبىر توپ ەسەرسوقتار كەزدەسەدى. ولار بىرەۋى ايتىپ، بىرەۋى قوستاپ، قوجا مەن قوجانىڭ بالاسىن سايقىمازاق ەتەدى.
— بۇ نەتكەن قانىپەزەرلەر! كىپ-كىشكەنتاي ەسەككە ەكى ادام مىنگەسىپ، ۇزاق جول جۇرۋگە بولا ما ەكەن؟ قاراڭدار، قاراڭدار، وسى، ءسىرا، قوجا بولۋعا ءتيىس.
ابدەن ىزا بولعان قوجا ەسەكتەن ءوزى دە ءتۇسىپ، بالاسىن دا ءتۇسىرىپ بوس ەسەكتى الدىنا ساپ، ايداپ ءجۇرىپ كەتەدى.
كوپ ۇزاماي تاعى دا بىرنەشە كىسى قارسى جولىعادى.
— مۇنداي ەسۋاس جاندار دا بولادى ەكەن-اۋ، — دەيدى ولار، — ەسەكتى بوس ايداپ، وزدەرى وسىنداي ىستىقتا شارشاپ-شالدىعىپ جاياۋ كەلە جاتىر.
مۇنى ەستىگەندە، قوجا:
— ءسىرا، مىنا جۇرتقا جاعىپ بولماس، — دەپتى.
You Might Also Like
-
قوجاناسىر بازاردان اردەڭەلەردى ساتىپ الىپتى دا، زاتتاردى ۇيىنە جەتكىزۋ ءۇشىن جۇك تاسۋشى جالدايدى. ءبىراق جول-جونەكەي جۇك تاسۋشى جوعالىپ كەتەدى. قوجاناسىر ونى كۇنى بويى ىزدەپ تابا المايدى.
-
دەنەدەن تەردىڭ ءبولىنۋى — ادام تەرىسىندە جۇزەگە اساتىن ماڭىزدى فۋنكسيا. تەر ادام اعزاسىنداعى ارتىق سۇيىقتىق بولعاندىقتان، ونىڭ سىرتقا شىعۋى — زاڭدىلىق. ءبىراق، دەنەمىزدىڭ كوزگە كورىنەر جە...
