InfoHub Logo

اقساق تەمىردىڭ اسكەرىندە ءبىر توپ ءپىل بولعانى، انكارا تۇبىندەگى ايقاستا پىلدەردىڭ ۇرىسقا قاتىسقانى جۇرتقا ءمالىم. سول ءداۋ جانۋاردىڭ بىرەۋىن ول قوجانىڭ اۋلىنا كۇتۋگە جىبەرەدى. ءپىل شارۋالاردىڭ كۇللى ەگىسىنىڭ جەگەنىن جەپ، جەمەگەنىن تاپتاپ، از كۇندە-اق تىپ-تيپىل ەتەدى. سونسوڭ ءبىر
كۇنى قوجا باستاعان شارۋالار اقساق تەمىرگە ارىز ايتا بارادى. ءبىراق قاھارلى پاتشانىڭ الدىنا بارۋدان جاسقانىپ، شارۋالار بىر-بىرلەپ سىتىلىپ قالا بەرەدى. قوجا پاتشا سارايىنىڭ الدىنا كەلسە، قاسىنا ەرگەن ەشكىم جوق: «قاپ، وڭكەي سۋجۇرەكتەر! — دەيدى ىشىنەن قوجا، — مەن الدانعاننىڭ اكەسىن سەندەرگە كورسەتەيىن».

اقساق تەمىر قوجانىڭ نە شارۋامەن كەلگەنىن سۇرايدى.

— سەن ءبىزدىڭ اۋىلعا ءوزىڭنىڭ سارايىڭدا جۇرەتىن ءبىر ءپىلىڭدى قوناققا جىبەرگەن ەدىڭ، — دەپ باستايدى ءسوزىن قوجا، — اۋىل ادامدارى ءوزىڭنىڭ باعىنىشتى پاقىرلارىڭ، مەنى ساعان بارىپ، بىزگە دەگەن ىقىلاس راقىمىڭ ءۇشىن العىس ايتىپ كەل دەپ جىبەردى. ءبىراق ءپىل سورلىنىڭ جات جەردە جالعىز جۇرگەندە نە مۇڭداسار، نە سىرلاسار سەرىگى جوق، سورلىنىڭ كۇڭىرەنگەندە اششى ۇنىنەن ادامنىڭ جۇرەگى جارىلعانداي. اۋىل ادامدارى مەنىمەن بىرگە كەلىپ ەدى، ءبىراق سەنىڭ كوزىڭە كورىنە الماي، سىرتتا مەنەن قۋانىشتى حابار ەستيمىز دەپ كۇتىپ تۇر. ەگەر ءبىزدى ءوز قۇزىرىڭا شىن بەرىلىپ، بودام بولعان جاندار دەپ بىلسەڭ، ءبىزدىڭ تىلەگىمىزدى اياققا قالدىرماسسىڭ.

مىنانداي ءسوزدى ەستىگەن سوڭ، اقساق تەمىر قاتتى قۋانادى، قوجانىڭ يىعىنا شاپان جاپتىرتىپ، زور سىي-قۇرمەت كورسەتەدى، اۋىل ادامدارىنا اۋىزشا سالەم جولدايدى جانە قوجانىڭ اۋلىنا تاباندا تاعى ءبىر ۇرعاشى ءپىل جىبەرەدى. پاتشا الدىنا قاۋىپتەنىپ كەلگەن قوجا، زور سىي قۇرمەتكە يە بولعانىنا كوڭىلى تاسىپ اۋلىنا قايتادى. اۋىل ادامدارى الدىنان شىعىپ:

— قانداي حابار اكەلدىڭ؟ — دەپ سۇراعاندا، قوجا ءبىر كەلەلى ءىستى تىندىرىپ كەلگەن ادامشا، تاكاپپار پىشىنمەن:

— ءشۇيىنشى، بىزگە تاعى ءبىر ۇرعاشى ءپىل جىبەرەتىن بولدى، — دەپتى.

---