تەرلەي بەرەسىز بە؟
دەنەدەن تەردىڭ ءبولىنۋى — ادام تەرىسىندە جۇزەگە اساتىن ماڭىزدى فۋنكسيا. تەر ادام اعزاسىنداعى ارتىق سۇيىقتىق بولعاندىقتان، ونىڭ سىرتقا شىعۋى — زاڭدىلىق. ءبىراق، دەنەمىزدىڭ كوزگە كورىنەر جەرلەرىنەن تەردىڭ تىم كوپ مولشەردە ءبولىنۋى ىڭعايىسسىزدىق تۋدىرادى. تەرشەڭ ادامنىڭ بويىنان تاۋلىگىنە 3 ليتردەن 14 ليترگە دەيىن تەر ءبولىنىپ شىعۋى مۇمكىن. ارتىق تەردىڭ شىعۋى جايسىزدىق قانا ەمەس، دەنساۋلىقتا ءبىر اقاۋدىڭ بار ەكەنىن بىلدىرەدى.
ادام بويىنان دەنە ەڭبەگى كەزىندە جانە تاعام قابىلداعان كەزدە تەر شىعۋى مۇمكىن. پسيحوگەندىك تەر ادام قۋانعاندا نەمەسە مۇڭايىپ، جىلاعاندا، ۋايىمعا سالىنعاندا شىعادى. مۇنداي ساتتەردە كوبنەسە الاقان مەن تابان تەرلەۋى مۇمكىن. دەنە ەڭبەگى كەزىندە، جاتتىعۋ جاساعاندا، سپورت زالدارىندا جاتتىعۋشىنىڭ ارقاسى مەن شاش اراسى تەرلەيدى. ال تاعام قابىلداعاندا، ادامنىڭ ىستىق تاماقتى قابىلداۋىنان ماڭدايىنان بۇرقىراپ شىعادى. الكوگول قابىلداعان كەزدە دە قىزۋ ادام كوپ مولشەردە تەرلەيدى.
قالىپتى مولشەردە تەردىڭ شىعۋى — اعزا ءۇشىن پايدالى. ويتكەنى ول زات الماسۋ پروسەسسى بولىپ تابىلادى. تەر بۇيرەكتەگى ارتىق سۇيىقتىقتى سىرتقا شىعارىپ، تازارتادى. تەردىڭ قۇرامى 99 پايىز سۋدان، 1 پايىز ورگانيكالىق (كەراتين، امينقىشقىلدار، ءسۇت قىشقىلدارى) نەمەسە ورگانيكالىق ەمەس (ماي، كالسيي، ناتريي، تەمىر، سينك) زاتتاردان تۇرادى.
تەرشەڭدىك جۇيكە جۇيەسى زاقىمدانعان ادامداردا ءجيى كەزدەسەدى. ولار ەموسياعا بەرىلگىش كەلگەننەن كەيىن اعزا ءار ەموسيالىق تولعانىسى كەزىندە تەردى شىعارىپ وتىرادى. بۇعان بەي-جاي قاراعان جاقسى ەمەس. ەمحانالاردا تەرشەڭدىكتى اۋرۋدىڭ العاشقى بەلگىسى ساناپ، دارىگەردىڭ كومەگىنە جۇگىنەتىندەر از ەمەس. تەرشەڭدىك قانت ديابەتى، ينفەكسيالىق اۋرۋ، سەمىزدىك، جۇرەك-قانتامىر اۋرۋلارىنىڭ ەڭ العاشقى بەلگىلەرى بولىپ سانالۋى مۇمكىن.
قولتىقتىڭ تەرلەۋى
كوپ ادام گيپەرگيدروزدىڭ (تەرشەڭدىك) قولتىق جانە تاباندا بولۋىنان زارداپ شەگىپ جاتادى. سەبەبى، تەرلەگەن قولتىق جاعىمسىز ءيىس شىعارادى. قولتىقتىڭ تەرلەۋىنە كوپ جاعدايدا تار جانە سينتەتيكالىق كيىم سەبەپ بولادى. ءارى بۇل تەرلەۋ جىنىس تالعامايدى. اسىرەسە بوزبالا مەن بويجەتكەن شاقتا ءجيى كەزدەسەدى. بالالاردا بايقالمايدى. قولتىقتىڭ تەرلەۋى تۇقىم قۋالاۋشىلىقتان دا بولادى.
نە ىستەۋ كەرەك؟
تەرلەگەنىڭىزدى سەزىنسەڭىز، دۋش قابىلداۋىڭىز كەرەك. كوسمەتيكالىق دۇكەندەردە ساتىلاتىن قولتىققا ارنالعان دەزودارانتتى 12 ساعاتتا ءبىر سەۋىپ وتىرۋدى ۇمىتپاڭىز. جانە ءار كەشتە قولتىقتى جۋعاننان كەيىن، 1 شاي قاسىق اس سوداسى مەن 1 شاي قاسىق تۇزدى 200 مل سۋدا ەرىتىپ، ماقتامەن قولتىقتى ءسۇرتۋ كەرەك. بۇل قولتىق گيپەرگيدروزىن ازايتادى.
الاقان مەن تاباننىڭ تەرلەۋى
الاقان مەن تاباننىڭ تەرلەۋىن اكروگيدروز دەپ اتايدى. جۇيكە جانە جۇرەك اۋرۋىنا شالدىققان نەمەسە اراققا قۇمار جانداردىڭ الاقانىمەن تابانى ءجيى تەرلەيدى. ەموسياسىن ىشتە ساقتاي المايتىن جانداردىڭ الاقاندارى تەرلەگىش كەلەدى. ساپاسى ناشار، اياققا تار اياق كيىمدەر دە اياقتى تەرلەتىپ، جاعىمسىز ءيىستىڭ شىعۋىنا سەبەپشى بولادى.
نە ىستەۋ كەرەك؟
تەرلەگەنىڭىز سەزىلسە، الاقان اراسىن اشىپ وتىرۋىڭىز كەرەك. دۇرىسى — قولدى سابىنمەن ءجيى جۋۋ. اياق كيىم تاڭداۋدا ونى ساپاسى مەن اياققا سىيىمدىلىعىن باستى نازاردا ۇستاۋ قاجەت.
تەرشەڭدىكتى ەمدەۋ
تەرشەڭدىكتەن زارداپ شەككەندەردى ەمدەۋ ۇزاق پروسەسس، ءارى ودان قۇلان-تازا ايىعىپ كەتۋ مۇمكىن ەمەس. باستىسى، سەبەبىن انىقتاپ، گيپەرگيدروزدى جويۋعا كۇش سالۋ كەرەك. ءدارىحانالار مەن كوسمەتيكالىق دۇكەندەردە بۇعان ءتۇرلى ونىمدەر بار. الايدا ونىڭ ءبارىنىڭ اسەرى قاعازىندا جازىلعانداي ەمەس. تەرشەڭدىكتى باسۋ ءۇشىن قۇرامىندا ۆالەريان، بروميد، بەحتەريەۆ ميكستۋراسى بار پرەپاراتتار ۇسىنىلادى. شاتىراش (شالفەي) تۇنباسىمەن جۋىنۋ دا تەرشەڭدىكتەن قۇتىلۋعا كومەكتەسەدى. گيپەرگيدروزى اسقىنعان ادامدار ارنايى تەراپيالىق پروسەدۋرالار ارقىلى ونى باسەڭدەتۋگە تىرىسۋ كەرەك.
دەزودورانتتار — پارفيۋمەريالىق وندىرىستە كەڭ شىعارىلاتىن ءونىم. ول تەرشەڭدىكتەن ەمەس، جاعىمسىز يىستەن قۇتىلۋعا كومەك بەرەدى. ال تەر ءبولىنۋدى ازايتۋ ءۇشىن انتيپەرسپيرانتتى پايدالانعان ءجون. قۇرامىندا فورمالدەگيدى بار ارنايى دارى-دارمەكتىڭ دە كومەگى ءتيىپ قالادى.
جەكە باستىڭ گيگيەناسىن ساقتاپ، سپورتپەن شۇعىلدانۋ، سالاۋاتتى ءومىر سالتىن ۇستاۋ — ەڭ ءتيىمدى، بار اۋرۋدىڭ الدىن الاتىن ءادىس.
وقۋعا كەڭەس بەرەمىز:
ءار دەرتتىڭ ءوز ءيىسى بار: اعزادا ءتۇرلى وزگەرىستەر ورىن العاندا دەنەمىزدەن قانداي ءيىس شىعادى؟
You Might Also Like
-
قوجا بالاسىن ەسەككە مىنگىزىپ، ءوزى جاياۋ ءجۇرىپ، جولاۋشىلاپ كەلە جاتادى. جولدا كەزدەسكەن جۇرت:
-
بالا كەزىندە قوجاعا اكەسى نە ايتسا، ول كەرىسىنشە، وزىنشە ىستەيتىن بولسا كەرەك. اقىرى، اكەسى قوجانى ءبىر شارۋاعا جۇمساي قالسا-اق، كەرىسىنشە ىستە دەپ تاپسىرادى. ءبىر كۇنى ەكەۋى ديىرمەننەن قايتىپ كەلە ج...
