InfoHub Logo

سىرىم جاسىندا استىندا تۇلپاردان تۋعان تورى توبەل اتى بار جالعىز كەلە جاتسا، ساسكە تۇستە جايىقتىڭ ارعى تۇسىندا نۇرالى حان قۇسبەگىلەرى، بيلەرى، اڭشىلارىمەن سەيىلدە اڭ اۋلاپ ءجۇر ەكەن. سىرىم بۇلاردى كورگەن سوڭ: «بۇل جۇرگەندەر نۇرالى حاننىڭ اڭشىلارى بولار، تىلدەسەيىن»، — دەپ بۇرىلىپ كەلىپ نۇرالى حانعا سالەم بەرەدى. سول كۇندە سىرىم باتىر ون سەگىز جاسىندا ەكەن.

— سەن قاي تۇقىمسىڭ؟ — دەپتى نۇرالى. سوندا سىرىم:

— قىدىرقوجانىڭ بالاسى — سۇلتان سيىق، ونان تۋعان — بايباقتى، بايباقتىدان شولان، شولاننىڭ بالاسى — دات، داتتىڭ بالاسىمىن، اتىم — سىرىم، — دەيدى.

سوندا نۇرالى تۇرىپ:

— ە، قۇدياردىڭ كوپ تەنتەگىنىڭ تۇقىمى ەكەنسىڭ عوي، — دەپتى.

سىرىم:

— ساقبار سۋىنىڭ بويىنداعى اڭگى تورەنىڭ تۇقىمى ەدىڭ-اۋ! سەنىڭ دە تۇقىمعا كۇلگەنىڭ بە؟ — دەپ، اتىنىڭ باسىن بۇرىپ الىپ جونىنە جۇرە بەرىپتى. سودان نۇرالى حان ءبىر توبەنىڭ باسىنا شىعىپ، بيلەرىن، اڭشىلارىن شاقىرتىپتى. بيلەر، اڭشىلار قاسىنا كەلگەندە، نۇرالى:

— بيلەر، سىزدەردى مەزگىلسىز شاقىرىپ تۇرمىن. شاقىرعانىمنىڭ ءمانىسى — اناۋ كەتىپ بارا جاتقان قازاقتىڭ ءبىر بوزبالاسى كەلىپ، سويلەسىپ تۇرعاندا بايقاسام، كوزىنىڭ ءبىر تامىرى ءۇش تاراۋ بولىپ بولىنگەن ەكەن، مۇنان نە شىعار ەكەن دەپ سوزبەن شابىنا ءتۇرتىپ قويىپ ەم، ويىمدا «كەيىن شەگىنەر مە ەكەن» دەگەن ەدىم، شەگىنبەدى، قايتا وزىمە قارسى ۇمتىلدى. نايزامنىڭ ۇشىن بۇراپ كەتتى. بيلەر، سول بالا كىم بولدى؟ — دەپ، قاساقانا قايتا سۇراپتى. سوندا بيلەر ءوز رۋىنداعى پىسىق جىگىتتەردى اتاپ، پالەنشە بولار، تۇگەنشە بولار دەپ ءبارى دە جىگىتتەرىن ايتا باستاپتى. سوندا الاشا التاي دەگەن كىسى تۇرىپ:

— تاقسىر، بوركىڭدى الشىسىنان كيگىزىپ كەتتى مە؟ ول ءالى كۇنىنە جەتپەي كەلە جاتىر، كۇنىنە جەتسە، بوركىڭدى قىرىنان دا كيگىزەر، قىرقىپ تا كيگىزەر... ونىڭ اتى سىرىم بولار... — دەپتى.

---