InfoHub Logo

تالدىقورعاندىق پەداگوگ تاتيانا لۋسەنكو ماسكەۋدە وتكەن «تاربيەلەۋ ونەرى» اۆتورلىق ادىستەمەلىك ەڭبەكتەردىڭ حالىقارالىق بايقاۋىنان جۇلدەلى ورالدى. اتالعان جارىسقا ماسكەۋ، سانكت-پەتەربور، ساحا رەسپۋبليكاسى (ياكۋتيا)، بەلارۋس،  قازاقستان مەملەكەتتەرىنەن 230-عا جۋىق پەداگوگ قاتىستى.

قازاقستاننىڭ ءار وڭىرىنەن بايقاۋعا 30 اۆتورلىق ادىستەمەلىك جۇمىس جىبەرىلدى. سايىستىڭ سوڭعى تۋرىنا قازاقستاندىق 10 اۆتوردىڭ جۇمىسى ءوتتى.

بايقاۋدىڭ مارەسى جۋىردا ماسكەۋ قالاسىندا VI بۇكىلرەسەيلىك عىلىمي فەستيۆال مەن XI عىلىم فەستيۆالى اياسىندا ۇيىمداستىرىلدى.

قازىلار القاسىنىڭ قۇرامىندا قازاقستاننان مەكتەپكە دەيىنگى مەكەمەلەردىڭ قازاقستاندىق بىرلەستىگىنىڭ ءتورايىمى ل. كۋلەنوۆا بولدى.

ساراپشىلار كوميسسياسى مەن بايقاۋ تورەشىلەرىنىڭ شەشىمى بويىنشا تالدىقورعاننان قاتىسقان تاتيانا لۋسەنكونىڭ اۆتورلىق جۇمىسى حالىقارالىق بايقاۋدىڭ ۇزدىك جۇمىسى دەپ تانىلىپ، جەڭىمپاز اتاندى. ونىڭ جۇمىسى «3-6 جاس ارالىعىنداعى بالالاردى ءوز بەتىنشە ءبىلىم الۋ جۇيەسىندە ينتەللەكتۋالدىق تۇرعىدا دامىتۋ ءۇشىن ءوز قولدارىمەن ازىرلەگەن مونتەسسوري-ماتەريالدار انالوگىن پايدالانۋدىڭ ءداستۇرلى ەمەس ءادىسى» دەپ اتالدى.

ىرىكتەۋدەن وتكەن قاتىسۋشىلاردىڭ بارلىعى دا «كونكۋرس ءفيناليسى» ديپلومىمەن جانە باعالى سىيلىقتارمەن ماراپاتتالىپ، بايقاۋ ناتيجەسى بويىنشا شىعارىلاتىن عىلىمي-ادىستەمەلىك جيناققا ماتەريالدارىن جاريالاۋعا مۇمكىندىك الدى. كونكۋرس اياقتالعاننان كەيىن مەكتەپكە دەيىنگى ۇيىم قازاقستاندىق بىرلەستىگى «ماسكەۋ قالالىق پەداگوگيكالىق ۋنيۆەرسيتەتى» جب مابم ءبىلىم بەرۋدەگى پەداگوگيكا جانە پسيحولوگيا ينستيتۋتىمەن مەكتەپكە دەيىنگى پەداگوگيكا سالاسىندا ءتۇرلى شارالار وتكىزۋ قاراستىرىلعان ىنتىماقتاستىق تۋرالى مەموراندۋمعا قول قويدى.

---