تامشىداعى تاريح
جەردە جالت-جۇلت ەتىپ ويدىم-ويدىم كولشىكتەر پايدا بولىپ جاتىر. دالادا جاڭبىر جاۋىپ تۇر. تىلسىم تابيعاتتىڭ تاماشاسى كوپ قوي. اسپاننان شا-قىرايا تۇسكەن شاعىرماق كۇن ساۋلەلەرى جاڭبىر تامشىلارىنا شاعىلىسىپ، كوز الدىمدا كەمپىرقوساققا ۇقساس، ءمولدىر ەكران تارىزدەس پەردە تارتىلدى. الدەقايدان بۋرىل تۇلپار مىنگەن، بەس ساۋىتى بويىندا قازاق باتىرى شىقتى.
— جەكپە-جەك، جەكپە-جەك، — دەپ ايقايلادى ول.
ار جاعىنان قاپ-قارا سايگۇلىك مىنگەن جوڭعار باتىرى كورىندى. ەكى باتىردىڭ دا ارتىندا قالىڭ اسكەر ساپتا تۇر.
— وتان ءۇشىن، ەل ءۇشىن، جەر ءۇشىن جان پيدا! قاراساي! قاراساي!
— اتاڭا نالەت، يت قالماق! اتا-بابامنىڭ قانى تامعان جەرىمنەن تايىپ تۇر. العا، باۋىرلار!
— كەۋدەڭە نان پىسپەسىن! كىم جەڭەرىن كورەرمىز ءالى!
ايداھار بەينەلەنگەن باس كيىم، ءدال سونداي قالقان ۇستاعان قالماق قازاق باتىرىنا اقىرا ۇمتىلدى. ەكى جاق ايقاسىپ كەتتى. شايقاستا قالماق جەڭىلدى.
قولباسىلارىنىڭ جەڭىلگەنىن كورگەن قالعان جوڭعار اسكەرلەرى قاشا جونەلدى.
— العا! العا! ءوشىمىزدى الايىق، قالماقتاردان. قۋىڭدار، ءجىگىتتەر.
قازاق اسكەرلەرى قاشقان جاۋدى قۋالاي ءجۇرىپ سوعىستى.
مەن كينو كورىپ تۇرعاندايمىن. اسىرەسە ورتادا قىلىشى جارقىلداپ، ەرەكشە ەرلىك كورسەتىپ جۇرگەن قاھارمان كوزىمە وتتاي باسىلدى. ول — قازاقتىڭ قاراسايى عوي.
جانىندا دوسى اعىنتاي باتىر ءجۇر جاۋمەن ايقاسىپ. جاۋ جەڭىلدى. ءبىز جەڭدىك!
— العا! تەك قانا العا، باتىرلار!
تامشىداعى تاريح كوز الدىمدا ءبىر پاستە وسىلاي قايتالاندى.
You Might Also Like
-
بايىرعى زاماندا ءۇش تاۋ بولىپتى. ءبىرىنشى تاۋ جان-جاعىنداعىنى اياپ، تۇسىنىستىكپەن قارايتىن. ەكىنشىسى — مەيىربان، ءۇشىنشىسى قاتىگەز دە اشۋلانشاق بولعان. ادامدار سول تاۋلارعا بارىپ، سىيىن...
-
ەرتەدە ەل بەرەكەلى، مولشىلىق زامان بولىپتى. اعاشتار بولسا جەمىسىن ازەر كوتەرىپ تۇرادى ەكەن. بارلىق اڭ، جان-جانۋار ەمىن-ەركىن ءومىر ءسۇرىپتى. باقا عانا باجىلداپ ءجۇرىپ، سۋدا دا، قۇرلىقتا دا تىنىم تاپپا...
