InfoHub Logo

بايىرعى زاماندا ءۇش تاۋ بولىپتى. ءبىرىنشى تاۋ جان-جا­عىنداعىنى اياپ، تۇسىنىستىكپەن قارايتىن. ەكىنشىسى — مەيىر­بان، ءۇشىنشىسى قاتىگەز دە اشۋلانشاق بولعان. ادامدار سول تاۋلارعا بارىپ، سىيىناتىن. تاۋلار ادامدارعا مەيىرىمىن توگىپ، اقىل ايتاتىن.

ءبىر كۇنى پيعىلى ارام ادام ءۇش تاۋدى بىر-بىرىمەن شاعىستىرۋعا تىرىستى. ول ءبىرىنشى تاۋعا كەلىپ:

— و، قاسيەتتى تاۋ، ءسىزدى ەكى دوسىڭىز ماعان جاماندادى. ولار ءسىزدى «شەكتەن اسقان مەيىربانسىماق، ءبارىن جالعان اياعىش ءارى ءوزى كارى ماۋباس» دەپ اتايدى ەكەن. ولار سىزگە دوس ەمەس، — دەيدى.

ءبىرىنشى تاۋ قاتتى اشۋلانادى.

ول ەندى ەكىنشى تاۋعا كەلەدى.

— و، مەيىرىمدى تاۋ، ەكى دوسىڭىز ءسىزدى ماعان جاماندادى. ءسىزدى «جالقاۋ، وتىرىكشى، ەرىنشەك، ونىڭ ايتقاندارىنىڭ ءبارى جالعان» دەدى.

ەكىنشى تاۋ دا ىزاعا بۋلىعادى.

ادام ءۇشىنشى تاۋعا كەلەدى.

— و، قۇدىرەتتى تاۋ، ءسىزدىڭ دوستارىڭىز ماعان ءسىزدى جاماندادى. ءسىزدى «تىم قاتىگەز دە اشۋلانشاق» دەدى. ولار ءسىزدى «مالعۇن نەمە» دەپ بالاعاتتايدى. «ول وڭباعان دۇرىس ءسوز دە ايتا المايدى» دەيدى، —
دەپ، ودان سايىن شامىنا تيەدى.

ءۇشىنشى تاۋ دا قاتتى اشۋعا بۋلىعادى. ءسويتىپ، ۇشەۋى توبەلەسەدى. مەيىربان تاۋ ەكى تاۋدىڭ ورتاسىندا تۇرعاندىقتان قاتتى ءجابىر­لەنەدى. ءتىپتى ولاردىڭ قاتتى جۇدىرىقتاسقانى سونشالىق — ورتا­داعى تاۋ الا-الا بولىپ قالادى. ءسويتىپ، ۇشەۋى ءۇش جاققا كەتەدى. ءقازىر دە سول مەيىربان تاۋدىڭ ءتۇسى الا-الا. سوندىقتان دا ول الاتاۋ دەپ اتالادى.