InfoHub Logo

ايبول مەن سۇڭعات ءبىر سىنىپتا وقيدى. ەكەۋى كورشى تۇرادى. بىرگە وينايدى. بىردە ايبول سۇڭعاتتىڭ بۇلبۇل داۋسى شىعاتىن ىسقىرىعىنا قاتتى قىزىقتى. سۇڭعاتقا ونى قالادا وقيتىن اعاسى اكەلىپ بەرگەن ەدى.

ءبىر كۇنى كەشكە ويناۋعا بارعان ايبول تەرەزە الدىندا تۇرعان ىسقىرىقتى بىلدىرتپەي الىپ كەتتى. ۇيىنە جۇگىرىپ كەلىپ، قايدا بارىپ ىسقىرارىن بىلمەدى. كوزىنە قورانىڭ توبەسىندە جيناۋلى تۇرعان ءشوپ ءتۇستى. توبەگە شىعىپ، جيناۋلى تۇرعان ءشوپتىڭ قالقاسىنا وتىرىپ الىپ، ارمانسىز ءبىر ىسقىردى. بۇلبۇل سەكىلدى قۇيقىلجىتتى. ودان دا باسقا دىبىستار شىعاردى. نە كەرەك، ايتەۋىر ءبىر قۇماردان شىعىپ، ءماز بولدى. وسى كەزدە جۇمىستان كەلە جاتقان اكەسى بالاسىنىڭ قورا توبەسىندە ءبىر دىبىس شىعارىپ وتىرعانىن ەستىپ، كورىپ قالدى. اكەسىنىڭ قاسىنا تاياپ كەلگەنىن ايبول اڭدامادى. تەك جوتكىرىنىپ قالعاندا سەلك ەتە ءتۇستى. اكەسى بىردەن:

— اۋزىڭداعىنى قايدان الدىڭ؟! — دەپ سۇرادى. قورقىپ كەتكەن ايبول:

— سۇڭعات بەردى، — دەپ مىڭگىرلەدى.

— سۇڭعات بەرسە، نەگە توبەگە شىعىپ، تىعىلىپ ىسقىرىپ وتىرسىڭ؟ — دەدى اكەسى قاتۋلانىپ. بالا ۇندەي الماي قالدى.

— ءجۇر، الدىما ءتۇس! — دەگەن اكە ايبولدى سۇڭعاتتىڭ ۇيىنە جەتەلەپ الىپ باردى دا، ودان:

— ايبولعا مىنا ىسقىرىقتى ءوزىڭ بەردى بە؟ — دەپ سۇرادى.

ايبولدىڭ قولىنان ءوز ىسقىرىعىن كورگەن سۇڭعات قۋانىپ كەتتى.

— جوق، بەرگەن جوقپىن. سەن العان ەكەنسىڭ عوي. اكەل! — دەپ ىسقىرىقتى ونىڭ قولىنان جۇلىپ الدى.

— كەشىرىم سۇرا! — دەپ اكەسى بالاسىنان كەشىرىم سۇراتتى دا، ونى قايتا جەتەلەپ ۇيىنە الىپ كەتتى. كەلگەن سوڭ ءوز بولمەسىنە كىرگىزىپ الدى دا:

— ەندى سەن ۇرىسىڭ، — دەدى جاي عانا.

شوشىپ كەتكەن بالاسىنىڭ:

— جوق، مەن ۇرى ەمەسپىن، مەنىڭ العانىم كىشكەنتاي عانا ىسقىرىق، ۇرىلار اقشا ۇرلايدى! — دەگەن داۋسى قاتتى شىقتى.

— بىرەۋدىڭ زاتىن سۇراماي، تىعىپ الاتىنداردىڭ ءبارىن ۇرلىقشى دەيدى. مەيلى ول ۇلكەن زات بولسىن، كىشى زات بولسىن، ءبارىبىر، — دەدى. — ەندى سەنەن دوستارىڭ قاشىپ جۇرەتىن بولادى. سۇڭعات ەكى باستان ەرتەڭنەن باستاپ ساعان جولامايدى. ول ەرتەڭ بارادى دا، سىنىپتاستارىڭا سەنى ۇرلىقشى دەپ ايتادى، — دەدى اكەسى. شىداي الماي كەتكەن ايبول ۇيدەن شىعا جۇگىردى. ارتىنان اكەسى دە جۇگىردى. بالاسى دوسىنىڭ ۇيىنە بارىپ:

— سۇڭعات، مەن ۇرى ەمەسپىن. ىسقىرىپ بولعان سوڭ اكەلىپ بەرەم دەپ ويلادىم، — دەپ ەسىكتىڭ الدىنا بارىپ ايقايلادى. سۇڭعاتتىڭ اكە-شەشەسى ايبولدىڭ مىنا قىلىعىنا تۇسىنبەي قالدى. ارتىنان كەلگەن اكەسى بالاسىنىڭ قىلىعىنا كەشىرىم سۇراپ، ءبارىن ءتۇسىندىرىپ بەردى.

وسى وقيعادان كەيىن ايبول ەشكىمنىڭ ەشتەڭەسىن سۇراۋسىز المايتىن بولدى.

---