ءتاتتى ارمان
رامازان مەن راييانا ءتاتتىنى وتە قاتتى جاقسى كورەدى. اكەسى بازاردا جۇرگەندە ۋاتساپ ارقىلى ءوتىنىش حات جولداپ:
— اكە، اسسالاۋماعالەيكۋم! ۆافلي، پريانيك، كامپيت، شوكولاد الا كەلەسىز بە؟ — دەيدى رامازان.
— ساعىز بەن چۋپپا-چۋپس تا الا كەلىڭىز! — دەپ قوسىپ قويادى قارىنداسى راييانا. اناسى كەيدە:
— بۇلاي ءوتىنىش جاساعاندى قويىڭدار. ونسىز دا تىستەرىڭ اۋىرىپ ءجۇر. الدە ءتىس دارىگەرىنىڭ نە ايتقانىن ۇمىتىپ قالدىڭدار ما؟ - دەپ ەسكەرتۋ جاساعانىنا ءمان بەرمەيدى... ودان قالدى اناسىنىڭ پلانشەتىنە تالاسىپ، ءبىرى ويىن ويناۋعا، ءبىرى قۋىرشاقتار جايلى ۆايندار كورۋگە كىرىسىپ كەتەدى. ساباقتىڭ دا "ونلاين" بولعانى مۇنداي جاقسى بولار ما؟! تۇسكە دەيىن عالامتورعا ارمانسىز كىرە الادى. تەك اناسى ساباقتارىن تەكسەرە باستاعاندا "قيىن بولىپ جاتىر" — دەپ، ءتۇرلى سىلتاۋلار ايتا باستايدى.
كەشكە اكەسى نەشە ءتۇرلى تاتتىلەر الىپ كەلدى. ەكەۋى قۋانا ايقايلاپ، كامپيتكە ەندى قول سالا باستاپ ەدى... اناسى بارلىق تاتتىلەردى جيناپ الىپ، شكافقا سالىپ، كىلتتەپ قويدى. سوسىن ەكەۋىنە قاراپ:
— بۇدان بىلاي كىم كۇنىگە ون بەت كىتاپ وقىپ، ەكى بەت كوركەم جازۋ جازىپ، ساباقتارىن بەسكە وقيدى، تەك سول بالا عانا ءتاتتى جەيدى — دەدى. اعالى-قارىنداستار ۇندەمەي قالدى. انالارىنىڭ مىنەزىن بىلەدى. ارتىق داۋ-داماي تاتتىدەن قاعۋى مۇمكىن. ءۇنسىز عانا قولدارىنا كىتاپتارىن الىپ، جىلدامداتا وقۋعا كىرىسىپ كەتتى.
سودان بەرى ءۇش اي ءوتتى.. ەكەۋى دە ۇزدىكتەر قاتارىندا! پلانشەتتەن تەك پايدالى نارسەلەر عانا كورەدى. انالارى الدىن-الا نە كورەتىندەرىن، نەشە مينۋت كورۋگە بولاتىندىعىن ەسكەرتىپ وتىرادى. تارتىپكە باعىنباعان اعاسى كامپيتتەن قاعىلعاندا، قارىنداسى اناسىنا كورسەتپەي ءوز تاتتىلەرىنەن ءبولىپ بەرگەن. ءبىراق اعاسى المادى. "قىزداردىڭ تاپقان تابىسىنان، ەر-ازامات بىرنارسە العانى.. ۇيات" — دەدى.
جازعى دەمالىس باستالىسىمەن رامازان "اقپاراتتىق بيزنەس" سالاسىن ۇيرەنە باستادى. ينتەرنەت ماركەتولوگ بولىپ، كوپيرايتينگ، وففەر جازۋدى ۇيرەنىپ الدى. بۇيىرتسا اناسىنا كومەكتەسىپ، اكەسىنىڭ بيزنەسىن دامىتۋعا كىرىسپەك. ال ار جاعى ارمانسىز ءتاتتى الۋعا جەتەتىن مول قاراجات تابۋ. جوووق، ءتاتتى قاجەت ەمەس! ودان دا "ەلەكتروندى ساموكات" الامىن - دەپ ارمانداپ كەتەدى. الدە.. قارىنداسىنا قۋىرشاققا ارنالعان ۇيشىك اپەرە مە..؟! مەيلى، الدىمەن بيزنەسىمدى باستايىنشى. سوسىن بارلىق ارمانداعان زاتتارىمدى الامىن! — دەپ ءجۇر كىشكەنە جىگىت.
گۇلمەكەن قاسەنباي
01.04.2021
You Might Also Like
-
«تۇلكى ءوزىنىڭ كيمەيتىن كيىمدەرىن ارزان باعاعا ساتىپ جاتىر!»-دەگەن حاباردى ەستىپ، قارساق بازارعا قاراي قۇستاي ۇشتى. كەدەي تۇراتىن قارساقتىڭ بەس بالاسى بار. ول تۇڭعىشىنا 1500تگ كويل...
