تاۋ باسىنداعى تاسجارعان
ءبىر توپ اقىن-جازۋشىلار الپىسقا كەلگەن اقىننىڭ ۇيىندە مەيمان بولىپ وتىرمىز. قالتاي تاپىشكە كيمەي، شۇلىقشاڭ وتىر. مەن:
— وۋ، قالەكە، تاپىشكە ىلسەڭىزشى، اياعىڭىز اۋرۋ توي، — دەيمىن. — تاياق ۇستاپ ءجۇرسىز.
— كيمەيمىن، — دەيدى قالتاي، — مەنىڭ تابانىم كونتاقا. تۇيەنىڭ تابانىنداي. سەنەسىڭ بە، وتىز جەتىنشى جىلى اكەي اتىلىپ كەتكەننەن كەيىن ينستيتۋتقا بارعانشا جالاڭ اياق ءجۇردىم.
— قىستا دا ما؟
— قىسى-جازى. باشپايلارىمنىڭ اراسىنا كوكتەمدە ءشوپ شىعىپ كەتەتىن.
جاتىپ كەپ كۇلەمىز.
— كۇلمەڭدەر، شىنىم. تاشكەنتكە وقۋعا جالاڭاياق باردىم. بۇل ەندى بولاشاق اتى شۋلى دراماتۋرگتىڭ بالالىق داۋىرىنەن ءبىر ەلەس.
— قار جاۋدى. توباناياق بولىپ، مەكتەپكە كەشىگىپ باردىم. ءمۇعالىم:
— ا، حالىق جاۋىنىڭ بالاسى، نەگە كەشىگەسىڭ؟ — دەدى دە، ەكى قولىما ەكى كىرپىش كوتەرتىپ، قابىرعاعا قاراتىپ، سىلەيتىپ تۇرعىزدى دا قويدى. «حالىق جاۋى» دەگەننەن ۇرەيلەنىپ، بالالار مەنىمەن وينايتىن.
بۇل بولاشاق حالىق جازۋشىسىنىڭ بالالىق شاعىنان ەكىنشى ەلەس.
سوڭعى ايتقانىنا، امال جوق، سەنەسىڭ. ويتكەنى «حالىق جاۋىنىڭ بالاسى» دەگەن تاڭبا ءبىزدىڭ ماڭدايىمىزعا دا باسىلعان. ودان وتكەن قورلىق جوق.
حالىق جاۋىنىڭ بالاسى» قالتاي مۇحامەدجانوۆ وسى ءتاسىرسىز تاڭبانىڭ زاردابىنان تاشكەنتتەگى وقۋىن تاستاپ، ماسكەۋگە بارىپ وقۋعا ءماجبۇر بولدى. ويتكەنى جاقىننان شىققان جاۋ جامان تۇرتپەكتەي بەرەدى.
قالەكەڭ ءازىلقوي عوي. كۇلدىرگى سوزگە بەك ۇستا. ايتپەسە ونىڭ باشپايلارىنىڭ اراسىنا كوكتەمدە ءشوپ شىعا قويماعان شىعار. ال ءوزى تاۋداعى تارعىل تاستى جارىپ شىققان تاسجارعان سياقتى ەكەنى راس. سونشالىقتى ازاپ - توزاقتىڭ اراسىندا ءجۇرىپ، داۋىلعا قارسى جالاڭاش ءتوسىن توسەپ، تىرمىزىكتەنە وقۋ وقىپ، ونى ءتامامداپ، الماتىعا كەلىپ، ادەبيەت سىندى اساۋ اتتىڭ جالىن تارتىپ ءمىنىپ، جاستايىنان دوداگەر دراماتۋرگ اتانۋ كەز كەلگەننىڭ تىندىرا سالار شارۋاسى ەمەس.
ءبارى دە «بولتىرىكتەن» باستالدى.
«بولتىرىك بورىك استىندا» اتتى پەساسىن اكادەميالىق دراما تەاترى سپەكتاكل ەتىپ قويدى. بۇل 1959 جىل ەدى. ول كەزدەگى يدەولوگيا مۇنداي سپەكتاكلگە دۇربىمەن قارايدى. مۇلدە جات دۇنيە.
قوعامعا زيان. مەملەكەتتىك جۇيەگە قارسى. زاماندى مازاق قىلادى،
ءبىراق كورەرمەن ءماز. مۇنداي شىنشىل، مۇنداي قىزىق، مۇنداي كۇلكى كوپتەن بەرى كورىنبەي كەتكەن. كورەرمەن لەگى تاۋسىلار ەمەس.
تەاتردا انشلاگ.
گازەتتەردەگى شەبەرلەر بىر-بىرىنە كەرەعار. بىرەۋلەر جاڭالىق، «جاڭا لەپ، تىڭ دۇنيە، كادامى قۇتتى بولسىن دەسە؛ بىرەۋلەر بۇل بارىپ تۇرعان جۇگەنسىزدىك، جالا، بالەقور دەپ بايبالام سالادى.
بيلەۋشى جۇيە سوڭعى پىكىردى قولدادى.
ۇلكەن-ۇلكەن جيىنداردا، يدەولوگيالىق كونفەرەنسيالاردا قازاقستان كومپارتياسى ورتالىق كوميتەتىنىڭ يدەولوگيا جونىندەگى حاتشىسىنىڭ اۋزىنان قاھارلى سوزدەر شىقتى.
قالتايدىڭ باسىنا قارا بۇلت ۇيىرىلە باستادى. ونىڭ جازىعى — ىس باسقان قارا كۇيە، تىنىسى تار ءۇيدىڭ توبەسىن تەسىپ، كوكپەڭبەك اشىق اسپاننىڭ قيىعىن كورسەتكەنى ەدى.
ونىڭ ايىبى — قاڭسىعان قاپىرىقتا تاۋ سامالىن قالامىنىڭ ۇشىمەن جەتەلەپ اكەلىپ، كورەرمەننىڭ تىنىسىن كەڭەيتپەك بولعانى ەدى.
يدەولوگيا وندايدى كەشىرمەيدى.
مىنە، سونداي ءبىر قالت - قۇلت كەزەڭدە ۇلى مۇحتار اۋەزوۆ تەاترعا باردى. جالعىز ەمەس، سول كەزدەگى كومپارتيا ورتالىق كوميتەتىنىڭ ەكىنشى حاتشىسى فازىل كارىپجانوۆتى ەرتىپ كەلدى.
كەردى. راقاتتانا كۇلدى. ف. كارىپجانوۆ كۇلكىدەن شىققان جاسىن ءسۇرتىپ تۇرىپ، قالتايعا:
— بۇل ءوزى جاستار تۋرالى ەكەن. ەندى ءبىز سياقتى شالدار تۋرالى دا جازساڭشى، — دەدى.
سوندا كارىپجانوۆ قىرىق سەگىزدە عانا ەكەن. مۇقاڭا قاراپ:
— الگى قورتىق وسى سپەكتاكلدى جاتىپ كەپ جاماندايدى، — دەدى.
مۇقاڭا كەرەگى دە وسى ەدى... قورتىق دەگەنى يدەولوگيا حاتشىسى بولاتىن. ال كوپ ۇزاماي مۇحتار اۋەزوۆ «بۇل كۇلكىگە ءدان ريزامىز» اتتى ماقالاسىن جاريالادى.
ايتسا — دۋالى اۋىز ايتسىن. وسىدان كەيىن قالتايدى «شەكتەن شىققان» دەپ ايىپتاعان ا اقساقال - كوكساقال ادەبيەتشى، دراماتۋرگ، سىنشىلاردىڭ، ءوزى دە ايىلدارىن جيىپ، اۋىزدارىن باعىپ سويلەيتىن بولدى. ۇلى عابيت مۇسىرەپوۆ قالتايدى قاتتى قولدادى.
ءبىراق قالتاي دا قاراپ جاتپايدى. سول كەزدەگى كازاك دراماتۋرگياسىنىڭ حال-جايىن جىلىكتەپ، قاۋقارىن ولشەپ، مىناۋىڭ مىناداي، اناۋىڭ اناداي، مىناۋ ورەمەن ورگە كوتەرىلە المايمىز دەپ، «لەنينشىل جاس» گازەتىندە «افيشا الدىنداعى وي» دەگەن تاقىرىپپەن كولەمى كەڭ، كورپەدەي ماقالا جاريالاسىن.
«لەنينشىل جاس» پەن «كازاك ادەبيەتى» گازەتتەرىنىڭ اراسىنداعى قاقتىعىستار قىزعان شاق. ال اسىلىندا اقيقات ادال ايتىستان تۋادى.
ءسوز، پىكىر بوستاندىعىنىڭ اۋىلى ءالى الىس كەز. ءبىراق «لەنينشىل جاس» ازاتتىقتى اڭساۋشى ەدى. ءسويتىپ ءبىر بۇلقىنۋشى ەدى. ونىسى بيلەۋشىلەردىڭ دە، وقىرمان حالىقتىڭ دا نازارىنان تىس قالمايتىن. بيلەۋشىلەردەن تاياق جەپ، وقىرمانداردان تايانىش تاباتىن.
سونداي ءبىر تارىققان، زارىققان شاقتاردا اتالار ءسوزى ءال - اۋقات، كۇش - قايرات بەرەر ەدى. قالتايدىڭ جەرلەسى، اكەسى مۇحامەدجاننىڭ زامانداسى، پىكىرلەسى، فيلوسوف، عۇلاما اقىن تۇرماعانبەت ايتپاۋشى ما ەدى:
قاسقىردا قۋات قالماسا،
«اپا» دەيدى ەشكىنى.
توزعان تورقا كورەدى،
قىرىق جاماۋ ەسكىنى.
ۇمىتارسىڭ كۇن شىقسا،
ايسىز تۇنگى كەشكىنى.
ءۇمىتىڭدى ۇزبە، جىگىتتەر،
بۇزىلسا دا ءىستىڭ كەسكىنى.
بىردە تۇمان، بىردە اشىق،
بۇل دۇنيەنىڭ بەس كۇنى، —
دەپ.
قالتاي العاشقى پەسالارىن جازعان كەزەڭ كەسكىنى وسىنداي ەدى سوندا دا زاماننىڭ زارداپتى جاعىن ءاجۋالاپ، جۇرتتى «ايسىز تۇننەن جارىق كۇنگە» جەتەلەگەندەي ارەكەتى مول باتىل دۇنيەلەر بەردى. «قۋىرداق دايىن»، «قۇداعي كەلىپتى» سياقتى ايتۋلى پەسالار سولاي تۋعان.
بۇل تۋىندىلار تەك قازاقستاندا عانا ەمەس، وداقتاس رەسپۋبليكالاردىڭ. تەاترلارىندا دا قويىلىپ جاتتى. اسىرەسە تاشكەنت تەاترلارى قاتتى ىقىلاس تانىتتى. العاش رەت سوناۋ قىرقىنشى جىلداردىڭ سوڭىندا ءوزى جالاڭاياق بارعان تاشكەنتكە قالتاي ەندى اقبوز اتقا ءمىنىپ باردى.
وتىزىندا وردا بۇزىپ، قىرقىندا قامال العان قالتاي ەدى بۇل. قالتاي پەسالارىنىڭ. ىشىندە بوياۋ - رەڭكى وزگەشەلەۋى شىڭعىس ايتماتوۆپەن اۆتورلاس بولعان «كوكتوبەدەگى كەزدەسۋ» اتتى شىعارماسى. ونى شەتەلدىكتەر «فۋدزياما باسىندا» دەپ اۋداردى. جاڭىلماسام، بۇل تۋىندى مۇحيتتىڭ ارجاعىنداعى ەلدەرگە دەيىن جەتتى عوي دەيمىن.
كەسكىنى بولەك كەسەك تۋىندى. ءسىرا، اسىل ەلەمەنتتەردىڭ قوسىندىسىنان وتە بەرىك قورىتپا شىعاتىنداي، بۇل ەكى جازۋشىنىڭ بىرىگىپ جازعانىنان بولار. بۇل پەسادا كىمنىڭ قانداي ۇلەسى بار ەكەنىن مەن بىلمەيمىن. ايتەۋىر «ءبىر باس جاقسى. ەكى باس ودان دا جاقسى» دەگەن ورىس ماقالى وسىندايدا ەسكە تۇسەدى.
بۇل «وداق» تۋرالى كەيىن شىڭعىس ايتماتوۆتىڭ ءوزى بىلاي دەپ جازدى: «ال پەسانىڭ بۇلجىماس «قاڭقاسى» بولۋى كەرەك، وندا ءبىرى جالاڭ، ءبارى اشىق. بۇل جەردە كەيىپكەرلەردى بىرىكتىرىپ، باسىن قوساتىن، ولاردىڭ مىنەز - قۇلقى مەن ىس-ارەكەتىن نەعۇرلىم تۇپتەن تاراتىپ، ايقىن اشىپ كورسەتەتىن ەرەكشە ءبىر «امال» تابۋ كەرەك ەكەنىن ەكەۋىمىز دە تۇسىندىك. بيىك پاراسات تۇرعىسىنداعى پەرسوناج — ءارى داۋگەر، ءارى دوس، ءادىلقازى كەرەك ەدى.
مىنە، وسىنداي پەرسوناجدى — ءبىزدىڭ كەيىپكەرلەرىمىزدى ءوسىرىپ، تاربيەلەگەن بۇرىنعى ءمۇعالىم، جانى ىزگى كەيۋانا ايشا اپانى تاپقان ءدال سول دراماتۋرگ قالتاي مۇحامەدجانوۆ بولدى. سول-اق ەكەن، ءبارى ورنى - ورنىن تاۋىپ، قۇلپىرىپ، ويناپ شىعا كەلدى. قالتاي پەسانىڭ العاشقى قازاقشا نۇسقاسىن جازدى، ال مەن ونى ورىسشاعا اۋداردىم».
— «كوكتوبە — فۋدزياما» — كوركەم فيلوسوفيا. نەگە «فۋدزياما» دەسە، جاپونيادا فۋدزياما دەگەن تاۋ بولادى ەكەن. ونىڭ باسىنا شىققاندا تەك شىندىق ايتىلادى ەكەن. ءار ادام — جۇمباق. ونىڭ ءتىپتى وزگە تۇرماق، وزىنەن جاسىراتىن قۇپيا سىرلارى بولادى. مىنە، سونىڭ ءبارى وسى قاسيەتتى تاۋدىڭ باسىندا رياسىز اقتارىلۋى ءتيىس.
شىندىقتى اقتارىلىپ ايتۋ ەتە قيىن. بالكىم، دۇنيەدەگى ەڭ قيىنى وسى شىعار. دۇنيە -دۇنيە بولعالى بۇل ءتۇيىن ءالى شەشىلگەن جوق. ادام شىندىقتى ايتپايىن دەمەيدى. ايتايىن دەسە قورقادى. ءبىراق قۇدايدى قايتەدى؟ قۇداي ءبارىن كورىپ تۇر عوي! ادام قۇدايدى دا الداۋدى ۇيرەندى.
شىندىق اششى. ءتىپتى اجارسىز. بۇل جونىندە اڭىز دا بار. ەرتەدە ءبىر سۇلۋ:
— كىم ەڭىلىك گۇلىن اكەلىپ بەرسە سوعان تيەمىن، — دەيدى. دامەلى جىگىتتەر تاۋعا ۇمتىلادى. ەڭىلىك گۇل تابىلمايدى. ارادا جىلدار وتكەندە ءبىر وجەت جىگىت اقىرى سول اڭسارلى گۇلدى ءولدىم-تالدىم دەپ تاۋىپ الىپ كەلسە، الدىنداعى قىز ورنىندا كەمپىر وتىر ەكەن...
مىنە، شىندىقتىڭ كەلبەتى.
قالتاي مەن شىڭعىستىڭ وسى پەساسى قاي زاماندا دا ەسكىرمەيتىن، توزبايتىن جادىگەر تۋىندى. ول سپەكتاكل ءدال ءقازىر وتە-موتە ءزارۋ. ال تەاتر ونى ۇمىتىپ كەتكەن سياقتى. بەكەر-اق.
ايتپەسە، ءدال وسى قازىرگى زامان كەپيەتى قانداي؟ پرەزيدەنت نەگە قايتا-كايتا جەمقورلىق، ۇرلىق - قارلىق، پاراقورلىقپەن اياۋسىز كۇرەس تۋرالى جارلىق شىعارادى؟
مىنە، شىندىقتىڭ كەرەك كەزى. ونى ايتاتىن، ۇكىم شىعاراتىن كىم؟ سوت پا؟
سوت تۋرالى حالىق باياعىدا-اق ايتقان:
قۇدايىم! قاڭعىرعان وكتان ساقتا،
پاراقور سوتتان ساقتا! — دەپ.
جەمقورلىقپەن، پاراقورلىقپەن كۇرەسەتىن سوتتىڭ سيقىن حالىق وسىلاي باعالاعان. ءادىل سوت تابىلسا، وسى ءسوزدى جوققا شىعارسىن. دۇنيە سوندا تۇزەلەدى.
وسىدان ءۇش-تورت جىل بۇرىن تاۋ جاقتا عالىمدار، جازۋشىلار باس قوسقان ءبىر جينالىس ەتتى.
ەكى اۋىلدان ءبىر اباي شىعىپ جاتىر، نە بوپ كەتتى؟
قايدا بارامىز؟ — دەستى. ءبىر جازۋشى ءتىپتى جينالعاندارعا قاراپ:
قۇرمەتتى قايىرشىلار! — دەپ باستادى سەزىن. پروفەسسور تۇرسىنبەك كاكىشيەۆ:
— قازىرگى بالا كىتاپ وقىمايدى. قاسىرەت! — دەدى. اكىم تارازي
— ناداندار باسىنىپ بارا جاتىر، — دەدى. سوندا سەيىت قاسقاباسوۆ:
— مەملەكەتتىك ەمەس، ۇلتتىق يدەولوگيا كەرەك، — دەدى. ال قالتاي مۇحامەدجانوۆ:
— اقىلدان باسقانىڭ ءبارى قىمبات. اقىل ارزان... — دەدى.
نەگە ءتۇڭىلدى؟ ءقازىر بۇرىنعىداي كەرەمەت پەسالار جازباي ءجۇر. كىم بىلەدى، تولعانىپ، تولعاتىپ جۇرگەن شىعار. جۋرناليستيكا جاعىنا قاراي قيسايىپ الدى دا، پەسا جازۋدى قويعان سياقتى. «ارا» — «شمەل» دەگەن اپ-ادەمى جۋرنال شىعارۋشى ەدى. قالتاي كەتكەن سوڭ جابىلدى. «زامان - قازاقستان» گازەتىن اشتى. ونى قويىپ، ءقازىر «تۇركىستان» اتتى اجەپتاۋىر بەدەلدى، سابىرلى گازەتتى اشىپ الىپ، سونى باسقارىپ وتىر. ءوزى تۇرعىلاستار تۇرماق، وزىنەن كىشىلەر دە ارالدىڭ كەمەلەرىندەي بولىپ قۇرعاقتا قالدى، پەنسياعا كەتتى.
ا ل قالتاي ايتادى:
— وركەنيەتتى ەلدەردە ادامنىڭ باسى مەنەن ىسىنە قارايدى. ءبىزدىڭ ەلدەردە ادامنىڭ شاشى مەنەن تىسىنە قارايدى، — دەيدى. —
شاشىڭ اعارىپ كەتىپتى، ءتىسىڭ ءتۇسىپ قالىپتى، ايدا، كەت دەيدى. ال باسى، اقىلى، ءىسى قانداي — باعالامايدى.
وسى سوتاناققا سوققى بەرگەندەي، قالتاي ءقازىر گازەت باسقارىپ وتىر. ونىسى ورىندى.
ءبىراق دراماتۋرگيانى قايتەمىز؟ ءتۇپتىڭ تۇبىندە نە باياندى؟ قيسىق كرەسلو ما؟ جۇرەگىڭدى جارىپ شىققان ءتول پەرزەنتىڭ — كوركەم تۋىندى ما؟
بۇل ەندى ءبىز ارالاساتىن شارۋا ەمەس.
ءبىر جينالىستا قالتايمەن كاتار وتىر ەدىم، مەنىڭ بلوكنوتىمدى الدى دا:
«ادامنىڭ بوسقا كەتكەن ءاربىر ءساتى وتقا جاققان اقشامەن تەڭ!» — دەپ جازىپ قويدى.
بۇل ەسكەرتۋ جالعىز ماعان عانا ەمەس، وزىنە دە كاتىستى. سوڭعى سەگىز جىل بويى الەم ادەبيەتىنىڭ جاۋھارى مەن گاۋھارى «مىڭ ءبىر ءتۇننىڭ» سەگىز تومىن اۋدارىپتى.
وراسان ەڭبەك. ونى كىتاپ باسپاسى باسىپ شىعارا الماي ىڭىرانىپ جاتىر. باسپالاردان قاۋقار كەتتى. كىتاپ مۇلدە ازايدى. ال «مىڭ ءبىر ءتۇن» ايتادى: ادامدى اجالدان قۇتقارعان ادەبيەت دەيدى. ەسىڭىزدە مە: قارا قۇلمەن ويناس قاتىننىڭ وپاسىزدىعىنا قاھارلانعان پاتشا كۇندە ءبىر قىزبەن تۇنەپ شىعىپ، تان. اتا باسىن شاۋىپ تاستاي بەرمەۋشى مە ەدى. كەزەك شاحاريزاداعا كەلگەندە ول پاتشاعا ايتقان نەشە الۋان عاجايىپ كوركەم اڭگىمە مىڭ ءبىر تۇنگە سوزىلىپ، اجالدان امان قالماۋشى ما ەدى.
بۇل دانالىق نەنى مەڭزەيدى؟ ادەبيەت، مادەنيەت جوق جەرگە اجال ءۇيىر دەگەندى مەڭزەيدى. رۋحاني جۇدەۋ — اجالمەن تەڭ.
قالتايدىڭ بۇل ەڭبەگى ەرلىكپەن پارا-پار.
قالتاي كوكەمىزدىڭ كوپ وقىپ، كوپ بىلەتىن عۇلامالىعىنا قىزىعاسىڭ. ۇيىنە جيھاز ەمەس، كىتاپ جيعان. ۇلكەن ءبىر كىتاپحانا دەسە دە بولعانداي.
كەڭەس داۋىرىندە «ماركسيزم ۋنيۆەرسيتەتى»، «پارتيالىق وقۋ» دەيتىندەر بولدى.
الماتى جوعارى پارتيا مەكتەبىندە جازۋشىلارمەن كەزدەسۋ ەتتى. سوندا وقىپ جۇرگەن كۋرسانت كەلىنشەك قالتايعا سۇراق قويادى: «اعاي، ايتىڭىزشى، ماركستىڭ «كاپيتالىن» وقىدىڭىز با؟»
— وقىدىم، «كاپيتال» ءۇش توم.
— وندا نە ايتىلعان؟ — دەپ تاقاقتايدى كەلىنشەك.
— شىراعىم، ونىڭ ءبىرىنشى تومى: «اسىق ويناعان ازار، دوپ ويناعان توزار» دەيدى. ەكىنشى تومى: «ەنبەك ەتسەڭ ەرىنبەي، تويادى قارنىڭ تىلەنبەي» دەيدى. ءۇشىنشى تومى: «باي-بايعا، ساي - سايعا قۇيادى» دەيدى.
زال تولى ادام دۋ قول شاپالاقتايدى. كەلىنشەك قىپ - قىزىل بوپ، ورتەنىپ كەتە جازدايدى.
تاپقىرلىقتىڭ ەزى بىلىمدىلىكتەن تۋادى. سوناۋ جىلى ستامبۋلعا مۇسىلمان عۇلامالار باس قوسىپ، ۇلكەن جيىن وتەدى. سوندا قازاقستاننان قالتاي مۇحامەدجان ۇلى قاتىسىپ، نەبىر اتاقتى تەولوگ عالىمداردى تاڭقالدىرعانى بار. ءدىن — يدەولوگيا، ءدىن — عىلىم. ونى بىلمەگەندەر — بىزدەگى كوپتەگەن دۇمشەلەر. دۇمشە مولدا ءدىن بۇزار. قالتاي ءدىنبۇزار دۇمشەلەرمەن كۇرەسىپ كەلەدى.
ەڭبەككە، بەينەتكە، شىعارماشىلىققا، كۇرەسكە تولى جەتپىس جىل!
قالتاي بۇل جەتپىسكە ءوزىنىڭ دوسى، قالامداسى، قۇرداسى شىڭعىس ايماتوۆپەن كاتار كەلىپ وتىر. جەڭىسكە، جەمىسكە تولى جەتپىس
باي جىلدار. بايلىقتى بەيشارا جاندار دۇنيەقوڭىزبەن، اقشامەن ولشەيدى. كولدىڭ تاقىرعا اينالۋى وڭاي. بايدىڭ پاقىرعا اينالۋى وڭاي.
ال تاۋسىلمايتىن بايلىق ول — قۇداي و باستا پەشەنەگە بەرگەن دارىن. سول دارىن ەڭبەك ەتسەڭ عانا بايلىققا اينالادى. تالانت دارىن تانا سۇتىنەن ەمەس، انا سۇتىنەن دارىدى.
بايلىعىڭ سارقىلماسىن، قالتاي اعا!
جەلتوقسان، 1998 جىل
You Might Also Like
-
قاسىم امانجولوۆ تۋرالى «كىشى اتا» اتالعان ەستەلىگىمدى كەيىنىرەك جازعاندىقتان دا ەكشەپ-ەلەپ ايتارىمدى سوندا قاپىسىز قامتىعان سەكىلدىمىن. ول ەڭبەگىم ماۋسىمدىق باسىلىمداردا جاريالانا كەلىپ...
-
بۇدان بىلاي ۇلتتىق ءبىرىڭعاي تەستىلەۋ (ۇبت) تاپسىرۋشىلارعا قورىتىندى بالمەن بىرگە تاقىرىپتىق تالداۋ قورىتىندىسى بەرىلەدى. بۇل تۋرالى ق ر ءبىلىم جانە عىلىم ءمينيسترى اسحات ايماعامبەتوۆ Facebook-تەگى پار...
