InfoHub Logo

زياندى ادەتىنەن ارىلعان شىلىمقورلار كوپ جاعدايدا ارتىق سالماق جينايدى.

اقش عالىمدارى وزدەرىنىڭ جاڭا زەرتتەۋلەرىندە شىلىم شەگۋ اعزاعا مايدى جاڭقالاۋعا كومەكتەسەتىن گەننىڭ بەلسەندىلىگىن كۇشەيتەتىنىن دالەلدەگەن. زەرتتەۋ ناتيجەلەرى Chest جۋرنالىندا جاريالانعان.

كوپتەگەن ادام شىلىم شەگۋدى دوعارعان سوڭ نەگە سالماق جينايتىنى عالىمداردى بۇرىننان قىزىقتىرىپ كەلەدى. بۇعان تابەتتىڭ جوعارىلۋى، سونىمەن قاتار، ادەتتە نيكوتين جەدەلدەتىپ جۇرگەن مەتابوليزم دەڭگەيىنىڭ تومەندەۋى سەبەپ رەتىندە اتالعان بولاتىن.

نيۋ-يوركتاعى كورنەل ۋنيۆەرسيتەتىنىڭ دارىگەرى حولي ۆانني (Holly Vanni) مەن ونىڭ ارىپتەستەرى شىلىم شەكپەيتىندەرمەن سالىستىرعاندا شىلىم شەگەتىندەردىڭ تىنىس جولىنداعى جاسۋشالارىندا AZGP1 گەنىنىڭ بەلسەندىلىگى جوعارى ەكەنى انىقتالعان.  بۇل گەن مايدى جاڭقالاۋ مەن سالماقتى تۇراقتاندىرۋعا قاتىساتىندىقتان، شىلىم شەگۋشىلەردىڭ ەكىنشىلەرىنە قاراعاندا ارىقتاۋ بولاتىنى جانە شىلىم شەگۋدى دوعارعان سوڭ سالماق جينايتىنى وسىدان بولۋى مۇمكىن.

زەرتتەۋلەرگە سۇيەنسەك، شىلىم شەگۋ مەن سالماقتىڭ بايلانىسى مولەكۋليارلىق نەگىزگە يە، ناقتىراق ايتساق، شىلىم شەگۋ كەزىندە AZGP1 گەنىنىڭ بەلسەندىلىگى ارتادى. بۇل گەندى زەرتتەۋمەن بايلانىستى الدىڭعى زەرتتەۋلەر بۇل گەننىڭ تىشقانداردىڭ ماي مولشەرىن رەتتەيتىنىن كورسەتكەن، سونىمەن قاتار، قاتەرلى ىسىككە ۇشىراعان جانە وسىنىڭ سالدارىنان سالماق تاستاعان اۋرۋلاردىڭ جاسۋشالارىندا AZGP1 گەنىنىڭ بەلسەندىلىگى ارتۋى مۇمكىن.

دەگەنمەن، بۇل شىلىم شەگۋدەن باس تارتۋدان سالماق قوسۋ گەنەتيكالىق بەيىمدىلىكتىڭ سالدارىنان بولاتىنىن بىلدىرمەيدى. عالىمداردىڭ پىكىرىنشە، شىلىم شەگۋ مەن سالماقتىڭ ارا-قاتىناسى الدەقايدا كۇردەلى، جانە بۇل پروسەسسكە تاماقتانۋ مەن فيزيكالىق بەلسەندىلىك سياقتى كوپتەگەن فاكتورلار اسەر ەتەدى.

---