InfoHub Logo

قاراعاندى وبلىسىندا ەكى ورتا مەكتەپ جاڭا وقۋ جىلىندا باسشىسىز قالدى. بۇل تۋرالى تەمىرتاۋ قالاسى ءبىلىم ءبولىمىنىڭ زاڭگەرى الەكسەي دميترييەۆ BNews.kz تىلشىسىنە حابارلادى.

«ەندى زاڭعا سايكەس، باسشى لاۋازىمىنا كونكۋرس ءراسىمى جۇرگىزىلەدى. ءبىر جارىم اي ىشىندە جاڭا ديرەكتور تاعايىندايمىز دەگەن ۇمىتتەمىز، ءبىراق ول كونكۋرسقا قاتىسۋعا ءوتىنىم بىلدىرەتىن ازاماتتارعا بايلانىستى بولادى. ازىرگە بۇل مەكتەپتەردە باسشى مىندەتىن اتقارۋشى مۇعالىمدەر جۇمىس ىستەپ وتىر»، - دەپ مالىمدەدى ا. دميترييەۆ.

سونداي-اق مەكتەپ ديرەكتورلارى ءوز مەكەمەسىن جاڭا وقۋ جىلىنا لايىقتى دايارلاماعاندىقتان، جۇمىستان بوساتىلدى. تامىزدىڭ سوڭىندا اكىمدىك پەن ءبىلىم ءبولىمىنىڭ قىزمەتكەرلەرى تەكسەرۋ جۇرگىزدى. تەكسەرۋ ناتيجەسى بويىنشا، №24 ورتا مەكتەبىنىڭ ديرەكتورى نارمانبەت يباديلدينوۆ پەن ەڭبەك شارتى بۇزىلدى، ال №14 مەكتەپ-ليسەي ديرەكتورى ولگا تكاچۋك ءوز ەركىمەن جۇمىستان شىعۋ تۋرالى ءوتىنىش جازدى.

«31 تامىز كۇنى №24 ورتا مەكتەبىنىڭ اۋماعى لاس بولدى. ديرەكتور تازالىقتى قاداعالاماعان جانە تازالىققا جاۋاپتى قىزمەتكەرلەرىنە سەنىپ وتىرا بەرگەن. مەكتەپ ىشىندە، ءتىپتى سپورت الاڭىندا دا ءشوپ قاۋلاپ وسكەن. ول جەردە كەنە دە، ورمەكشى دە بولدى. تەكسەرۋ ناتيجەسى دۇرىس بولماعاندىقتان جانە ديرەكتور وسىنىڭ بارلىعىنا جاۋاپتى بولعاندىقتان، جۇمىستان بوساتۋ تۋرالى شەشىم قابىلداندى. ال №14 مەكتەپ-ليسەيىندە دە تۋرا سونداي، سونداي-اق ءشوپ ورىلماعان»، - دەپ باياندادى زاڭگەر.

---