تەپەڭكوك (ءى نۇسقا)
تەپەڭكوك ءاۋ باستا ءبىر بايدىڭ قويعا سالعان شابان اتى ەكەن. مىڭ سالسا ءبىر باسپايتىن شاباندىعىنا بولا تەپەڭكوك اتانسا كەرەك.
كۇندەردىڭ ءبىر كۇنىندە تاقىمىندا جۇرگەن تەپەڭكوككە جۇرتتان اسقان ءبىر سىنشىنىڭ كوزى تۇسەدى. سىنشى تەپەڭكوكتىڭ الدى-ارتىنا شىعىپ، سۇقتانا قاراپ تۇرىپ: «اپىر-اي، وسى زاماننىڭ جىلقىسى ازدى ما دەپ جۇرسەم، جوق، مەنىڭ كوزىم توزعان ەكەن عوي. مىنا جانۋار ءبۇيىرىمدى قىزدىرساڭ، بايگەدەن كەلەم دەپ تۇر عوي!» — دەيدى.
بۇل ءسوزدى ەستىگەن قويشى: «بارەكەلدى، قويعا دا جەتە المايتىن تەپەڭكوككە قايداعى بايگە!» — دەپ كۇلەدى.
سىنشى سول بەتىندە ات باسىن بايدىڭ ۇيىنە تىرەيدى. ءسوز اراسىندا سىنشى: «بايەكە، قىرىق جىلدا ءبىر تۋاتىن ەرەن جۇيرىكتى قور قىلىپ، قويعا سالىپ قويعانىڭىز قالاي؟» — دەپ سۇرايدى بايدان.
باي بۇل ءسوزدى كوڭىلىنە الىپ، سىنشى كەلەكە ەتىپ وتىر-اۋ دەگەن ويمەن: «شىن جۇيرىكتىڭ قىرىق جىلدا ءبىر تۋاتىنى راس بولسا، سول قىرىق جىلدا ورتايمايتىن داۋلەتىم بار. مەنەن ءجۇي رىك جىلقى كورگىڭ كەلسە، قىرىق جىلدان كەيىن كەل!» — دەپ قىرىس قاباق تانىتادى. سوندا سىنشى: «بايەكە، كوڭىلىڭىزگە الماڭىز، مەن شىنىمدى ايتىپ وتىرمىن. شىققىر كوزىم شىقپاسا، قويشىنىڭ استىنداعى تەپەڭكوك الدىنا قارا سالماس جۇيرىكتىڭ ءوزى. تەك، بابىن بىلمەي جۇرسىزدەر. تەپەڭكوك ءبۇيىرى قىزباي شاپپايتىن، ارقاسى قوزباي ارىندامايتىن ات. سول ءۇشىن، بايگەگە قوساردا ەكى قورجىن باسى قۇم تەڭدەپ الۋ كەرەك. ارى-بەرى شاپقان سوڭ قۇلاعىنىڭ تۇبىنەن تەر بىلىنەر. تەر بىلىنگەن سوڭ-اق تەپەڭكوكتىڭ باۋىرى جازىلىپ، سوزىلا شابۋعا ءتيىس. سول كەز دە قورجىن ءتۇبىن وتكىر كەزدىكپەن ءتىلىپ جىبەرىپ، قۇمىن توكسە، سونان سوڭ ارۋاعىن كوتەرە ۇرانداپ، ايقايعا سالىپ وتىرسا، تەپەڭكوك ساقپاننىڭ وعىنداي زاۋلار ەدى!» — دەيدى.
سىنشىنىڭ ايتقان سوزىنە باي قۇلاق اسىپ، بايگەگە قوسادى. جاي قوسپايدى، اياققاپتاي الا قورجىنعا قۇم تەڭدەپ قوسادى. ايتقانىنداي، سول جولى تەپەڭكوك نەبىر جەلاياق جۇيرىكتەرگە شاڭ قاپتىرىپ، جالعىز قارا بولىپ بايگەدەن كەلىپتى. وسىدان كەيىن بابى تابىلعان تەپەڭكوك بايگەنىڭ الدىن بەرمەيتىن بولىپتى دەيدى.
مىنا كۇي سول تەپەڭكوكتىڭ شابىسىن كەلتىرگەن، اراسىندا ات ۇستىندەگى بالانىڭ ۇرانداعان ايقايىن بىلدىرەتىن كۇي ەكەن.
You Might Also Like
-
بۇل كۇيدىڭ اڭىزى «اقساق قاز» كۇيىنىڭ اڭىزىنا جالعاس ايتىلىپ، كۇيدىڭ ءوزى دە جالعاس تارتىلادى.
-
ءبىر بايدىڭ الاقانىنا سالىپ ايالاپ وسىرگەن جالعىز قىزى بولىپتى. جالعىز دا بولسا جۇزگە تاتيتىنداي اقىلىنا كوركى ساي بولىپ وسكەن ەكەن. «قىز وسسە، ەلدىڭ كوركى» دەگەن راس، باي قىزىنىڭ اقىل-كو...
