بوكەن جارعاق (ءى نۇسقا)
ەرتەدە اعايىندى ەكى جىگىت بولىپتى. اكەلەرىنەن جاستاي ايىرىلىپ، شەشەسى ۇشەۋى ءومىر سۇرەدى ەكەن. الاڭدارى بولماي وسكەن اعايىندى ەكى جىگىت جاستايىنان اڭ اۋلاۋدى كاسىپ ەتىپتى. بويلارى ءوسىپ، بۇعانالارى قاتا باستاعان كەزدە بۇلاردىڭ اڭشىلىعى توڭىرەگىن ءتانتى ەتەتىن بولىپتى. اسىرەسە ءتۇزدىڭ بوكەن سياقتى كوپ كەزدەسەتىن اڭىن اۋلاۋعا ماشىقتانعانى سونشا — ۇستىلەرىنە بوكەن تەرىسىنەن تىككەن جارعاقتارىن كيىپ الىپ، ءتۇز تاعىسىمەن ارالاسىپ ءجۇرىپ قالاعانىن اتادى ەكەن.
كۇندەردىڭ ءبىر كۇنىندە اعايىندى ەكى جىگىت تىزە قوسىپ، ادەتتەگىدەي بوكەن اۋلاۋعا شىعادى. ەن دالادا سىناپتاي سىرعىپ جۇرگەن بوكەننىڭ بۇرىلىپ كەلىپ سۋ ىشەر ورىندارىنىڭ بولاتىنى بەلگىلى. سونداي ءبىر بۇلاقتىڭ باسىنا ەرتەرەك كەلگەن ەكى جىگىت اتۋعا ۇرىمتال ورىنعا بەكىنبەك بولادى. سوندا اعاسى ىنىسىنە اقىل بەرەدى: «ەكەۋمىز بۇلاقتىڭ ەكى قاباعىن الا جايعاسايىق. قاتالاپ كەلىپ سۋعا باس قويعان بوكەندى ەكى جاعىنان قاقپالاپ اتساق قارىق بولامىز»، — دەيدى. ءىنىسى اعاسىنىڭ ايتقانىنا كونىپ، كورسەتكەن جەرىنە بەكىنەدى.
ءتۇس مەزگىلى بولىپ، كۇن تاس توبەگە كوتەرىلىپ، ءتىرى جاننىڭ اڭقاسىن كەپتىرگەندەي ىستىق كوتەرىلگەن كەزدە ءمۇيىزى جارق ەتىپ، بوكەننىڭ شولعىنشى تەكەسى كورىنەدى. ىلە دالانىڭ شاڭىن شۇيكەدەي سوزىپ، ارتىنان كيمەلەي كەۋدەلەگەن ەشكى-لاقتارى جەتەدى. سول بەتىندە قالىڭ كيىك اينالى استاۋداي جارقىراپ جاتقان بۇلاققا باس قويادى عوي. وسى كەزدە، ۇرىمتال ءسات كەلگەن شىعار دەپ، اعاسى ساداق تارتادى. ءدۇر ەتىپ كەرى سەرپىلگەن
بوكەننىڭ كەلەسى شەتىنەن ۋادە بويىنشا ءىنىسى دە وق جاۋدىرادى. تالاي بوكەن وققا ۇشادى. اڭ قىزىعى اعايىندى ەكى جىگىتتىڭ دەلەبەسىن قوزدىرىپ، ودان سايىن قۇنىعا اتادى.
ءسويتىپ، ەكى ورتادا ۇيلىعا جوڭكىلگەن بوكەننىڭ تۇياعىنان قالىڭ شاڭ كوتەرىلەدى. الدەن ۋاقىتتا امان قالعان بوكەندەر شاڭ اراسىنان سىتىلىپ شىعىپ، تۇزگە بەت الادى. ءالى دە بولسا شاڭ اراسىندا ۇيلىققان بىرەر بوكەندى اتىپ الىپ قالماقشى بولعان اعايىندى ەكى جىگىت قالىڭ كيىكتى وكشەلەي قۋىپ، ساداق تارتادى.
ءبىر مەزگىلدە اعايىندى جىگىتتەردىڭ ۇلكەنى شاڭ اراسىنان بوكەننىڭ ويقاستاعان سۇلدەرىن كورگەندەي بولادى. قىلت ەتكەندى قۇتقارماي اتىپ ماشىقتانعان جىگىت ساداعىن قۇلاشتاي كەرىپ تارتىپ جىبەرەدى. بۇل جولى دا اتقانى قاپى كەتپەيدى، كوزدەگەنىن مۇرتتاي ۇشىرادى. سول بەتىندە باۋىزداپ الا قويايىن دەپ جۇگىرىپ كەلسە، بوكەن دەپ اتقانى ءوزىنىڭ جالعىز ءىنىسى ەكەن دەيدى. سول جەردە باۋىرىنىڭ باسىن قۇشىپ جىلاعان جىگىتتىڭ زارى كەيىن ەل ىشىندە «بوكەن جارعاق» دەگەن كۇي بولىپ تاراسا كەرەك.
You Might Also Like
-
كوكتەم تۋا جەر انانىڭ تاس ەمشەگى ءجىبىپ، ءتوس ەمشەگى يىگەن كەزدە جىل قۇسىنىڭ شۇباپ كەلىپ، دالا ءتوسىن دۋمانعا بولەيتىن ادەتى. سالقىن سابات كولگە، جاسىل جايلاۋ بەلگە ىنتىعا جەتكەن مىڭ سان قۇس كەشىكپەي-...
-
ەرتەرەكتە ءبىر ونەرپاز جىگىت بولسا كەرەك. ول كەزدە جىگىتتىڭ جاقسىسى جىلقى باعىپ، جۇيرىك مىنەدى. كۇندەردىڭ ءبىر كۇنىندە، سول ونەرپاز جىگىت ساياق شىققان جىلقىلارىن ىزدەپ ءجۇرىپ، ءبىر اۋىلعا كەز بولادى. سو...
