تورەمۇرات — نارىنباي
تورەمۇرات اينالاعا قاراۋىل قويىپ، كوپتەگەن مال سويدىرىپ «قىزدانايدى ەكىنشى رەت العانىمنىڭ تويى» دەپ، ۇلكەن توي جاسايدى. تويدىڭ كوپتەگەن بايگەلەرىن تاعى قۇرمانعازى الادى. كەشكە ويىن باستالعاندا باياعى كيىك اتىستا، التىنقاباقتا جەڭىلىپ جۇرگەن باتىرلاردىڭ جىگىتتەرى قورلىعى وتكەن قۇرمانعازىدان ءوش الماق بولىپ، شوكەن دەگەن قىزدى ازعىرىپ، وعان بىر-ەكى اۋىز ولەڭ ۇيرەتىپ، قۇرمانعازىعا قارسى ايتتىرادى. ويىندا ەشنارسە جوق كۇيشىگە قىلىمسىپ شوكەن قىز كەلىپ: «جيەن اعا، ايتىسايىق!» — دەيدى. قۇرمانعازى قارسى الماۋعا ارلانىپ، «بولسىن» دەۋى-اق مۇڭ ەكەن، كەزەك تە سۇراماي، شوكەن باستاپ كەتەدى:
بايلاردان قازىق قالادى قونعان جەردە،
تۇلكىنىڭ ەتى قالادى سويعان جەردە.
ىشكەن اس، سىي-قۇرمەتتى ولجا كورىپ،
جۇرەسىڭ توبەت يتتەي تويعان جەردە.
سەن جۇرگەن ءبىر «بوز قاڭعىر» ءبىزدىڭ ەلدە،
شەت جەردە ءالىن بىلمەي الەك بولعان،
ءسوزىم شىعىن بولادى-اۋ سەندەي كەمگە»، — دەپ ولەڭدەتەدى.
قۇرمانعازى بۇل اڭگىمەنىڭ ءتۇبىنىڭ قايدان شىققانىن سەزەدى. قىزدىڭ ءوز قارا باسىنان مۇنداي اۋىر ءسوز شىعاتىنىنىڭ ەشبىر رەتى جوعىن بىلەدى. «جەتىم بالا — كەكشىل» دەگەندەي، قىزدىڭ ءسوزى وڭمەنىنەن وتكەندەي بولادى. دومبىراعا قوسىلىپ، قالايدا جاۋاپ بەرۋ كەرەكتىگىن ويلاپ، شىرقاپ كەتەدى:
«شىعا الماي جامان جۇرەدى تۋعان جەردە،
قايدا دا ەر جۇرەدى سىيعان جەردە.
سايرانداپ سارى دالانى كەتسەم كەزىپ،
ونەرپاز اتىم شىقتى ءسىزدىڭ ەلدە.
تەڭەدىڭ كەمىتەم دەپ مەنى يتكە،
اداسقاننىڭ وزىنە الدى ءجون دە.
ازعىرعان بىرەۋلەردىڭ تىلىنە ەرىپ،
قۇربىجان ءتىلىم تيسە، ارتىق كورمە.
قوناق كورگەن كورگەندى ەلدىڭ قىزى،
اۋىلىڭا كەلگەن جۇرتقا «ءتيىستىڭ» نەگە؟» — دەي بەرگەندە نارىنباي سەزىپ قالىپ، ايداپ سالىپ وتىرعان جىگىتتەردى الدىنا شاقىرىپ الىپ، قامشىنىڭ استىنا الادى. ويىننىڭ قىزىعى بۇلىنەدى. تورەمۇرات، نارىنباي، قىزداناي ۇشەۋى قۇرمانعازىنى ءۇش جاعىنان جۇباتىپ، اقىل ايتقانىمەن، كۇيشىنىڭ كوڭىلىنە ءبىر ءتۇيىن ءتۇسىپ، ويىندى قالاي قىزدىرامىن دەگەنىمەن، بۇل كەشتە قۇرمانعازى سىرتتاي عانا جارقىلداپ، ءىشى ءتۇتىن بولادى. نارىنبايدىڭ اشۋىنان زارەسى ۇشىپ كەتكەن شوكەن قىز قاشا جونەلىپ، ەندى ويىننىڭ قاراسىن دا كورە المايدى. ويىن تاراعان سوڭ، قۇرمانعازى جاتقان ۇيىنە كەلىپ، كورەر تاڭدى كوزىمەن اتقىزادى. ەرتەڭىندە باتىرلاردىڭ الدىندا تاعى ءبىر كۇي تارتىپ، ونىڭ اتىن «تورەمۇرات — نارىنباي» اتايدى. قوشتاسىپ، باتىرلار بەرگەن ارعىماق اتتى جەتەككە الىپ، بوكەيگە قاراي جول تارتادى.
You Might Also Like
-
جەتپىسىنشى جىلداردىڭ اياعى جاقىندايدى. بۇل كەزدە بۇرىنعى قۇرمانعازىنىڭ سوڭىنا ءتۇسىپ جۇرگەندەردىڭ ءبىرقاتارى ولەدى. «بىرەۋلەرى قۇرمانعازى ەندى وسى جولدان كەلەر دەيمىسىڭ»، — دەپ كۇدەر...
-
قورقىتتىڭ اۋىلى سىرداريانىڭ جاعاسىندا بولىپتى. اسقان كۇيشى، قوبىزشى قورقىت ءبىر كۇن دە ۇيىندە وتىرماي، ىلعي ەل كەزىپ، قوبىزىمەن كۇي تارتادى ەكەن. كۇيدى قۇمارلانىپ تارتقان سايىن قورقىتتىڭ ءولىم جايلى ...
