InfoHub Logo

ۇبت كەزىندە زاڭسىز ارەكەت جاساعان تۇلەكتەر جىل بويى تەستىلەۋ تاپسىرۋ مۇمكىندىگىنەن ايىرىلادى. بۇل تۋرالى «Birge oqý» جوباسىنىڭ ارنالارى ارقىلى وتكەن تىكەلەي ەفيردە «ۇلتتىق تەستىلەۋ ورتالىعى» رمقك ديرەكتورىنىڭ ورىنباسارى ناۋجان ديداربەكوۆا ءمالىم ەتتى.

«بيىل ۇلتتىق ءبىرىڭعاي تەستىلەۋدى وتكىزۋ پروسەسىنە وزگەرىستەر ەنگىزىلىپ وتىر. وسى ورايدا زاڭسىز ارەكەتتەرگە تالاپتار كۇشەيتىلدى دەپ ايتساق بولادى. مىسالى، بىزدە بۇرىن تىيىم سالىنعان زات اۋديتوريادان تابىلعان جاعدايدا عانا اكت جاسالىپ، وقۋشى تەستىلەۋدەن شىعارىلاتىن بولاتىن. ال بيىلعى ۇبت-نى وتكىزۋ قاعيداتىنا توقتالساق، تەستىلەۋدە عيماراتتاعى مەتالدى ىزدەيتىن قۇرىلعى ايماعىنا دەيىن تەستىلەنۋشى بالادان تىيىم سالىناتىن زات تابىلعان جاعدايدا، وندا ءتيىستى اكت جاسالىپ، تۇلەك تەستىلەۋگە جىبەرىلمەيدى. بۇل تۇرعىدا بيىل ۇبت تاپسىرۋ مۇمكىندىگىنەن ايىرىلادى»، — دەپ ءتۇسىندىردى ن. ديداربەكوۆا.

سونىمەن قاتار اۋديتوريادا تىيىم سالىنعان زاتپەن ۇستالعان تۇلەكتىڭ دە تەستىلەۋ ناتيجەسى جويىلىپ، وسى جىلى ۇبت تاپسىرا المايتىن بولادى.

بۇدان بولەك ن. ديداربەكوۆا كەيبىر تالاپكەرلەر ءوزىنىڭ ورنىنا باسقالاردى تەستىلەۋگە جىبەرىپ جاتاتىنىن، بۇل زاڭسىز ارەكەت جاساعاندارعا ءتيىستى جازا قاراستىرىلعانىن ايتتى.

«مۇنداي جاعداي بوگدە ادامدى ءوزىنىڭ ورنىنا كىرگىزۋگە تالپىنعان تۇلەككە دە قاتىستى. ەندى بۇل ارەكەت ءۇشىن اتالعان ادام جىل بويى ەمتيحان تاپسىرا المايدى»، — دەدى ۇلتتىق تەستىلەۋ ورتالىعىنىڭ وكىلى.

ماماننىڭ پايىمىنشا، مۇنداي شارالار تالاپكەرلەر اراسىندا زاڭسىز ارەكەتتەردىڭ جولىن كەسەدى.

---