ۇبت-عا جىلدام دايىندالۋ تەحنيكاسى
ۇبت-عا از عانا كۇن قالدى دەپ كونسپەكتىلەردى قايتالاپ وقۋعا، دۇرىس بىلمەيتىن جەرلەرىڭىزدى قايتا تولىقتىرۋعا نەمەسە ءوزىڭىز ارنايى قۇرعان جوسپار بويىنشا دايىندالۋعا بولادى. وسىلايشا ەسىڭىزگە كوبىرەك اقپارات ساقتاپ، دايىندىقتى ازايتقانىڭىز دۇرىس. ولاي بولسا نازارلارىڭىزعا ۇبت-عا جىلدام دايىندالۋ تەحنيكاسىن ۇسىنامىز:
1. دايىندىقتى جوسپارلاۋ. بىرىنشىدەن، ءوزىڭىزدىڭ بيولوگيالىق ءريتمىڭىزدى انىقتاڭىز. ياعني ەرتە جاتاسىز با، الدە كەش ۇيىقتايسىز با؟ وسىعان سايكەس كەستە قۇرىڭىز. ءار كۇنى قانداي تاقىرىپتاردى دايىندايتىندىعىڭىزدى ناقتى انىقتاپ الىڭىز. ۇبت-نىڭ الدىندا ءبىر كۇن بۇرىن جاقسىلاپ دەمالىپ، تازا اۋادا سەرۋەندەڭىز.
2. ۇبت-عا دايىندالۋعا ارنالعان «3-4-5» تەحنيكاسى. 2015 جىلى ۇبت-عا دەيىن قالعان ۋاقىتتى (اپتا، اي، جىل) 3 بولىككە ءبولىڭىز. مىسالى، وزىڭىزدە بار 15 كۇندى بەس-بەستەن ءبولىڭىز. العاشقى 5 كۇنى بارلىق ماتەريالدى 3 دەگەن باعاعا مەڭگەرىڭىز. ەكىنشى 5 كۇندە ەڭ ناشار بىلەتىن تاقىرىپتارىڭىزدى جاقسىلاپ مەڭگەرىپ الىڭىز. ال سوڭعى 5 كۇننىڭ ىشىندە ءبىلىمىڭىزدى تەست كومەگىمەن تەكسەرىڭىز.
ۇبت كەزىندە ەستە ساقتاۋ قابىلەتى جاقساراتىن مەزگىلدى دە ەسكەرگەنىڭىز ءجون. تاڭەرتەڭگى ساعات 8-12 اراسىندا ادامنىڭ ماتەريالداردى مەڭگەرۋ مۇمكىندىكتەرى ارتادى. بۇدان كەيىنگى جاقسى مەزگىل – ساعات 17-19 اراسى. ءبارىبىر وقىعان ساباقتارىڭىز ەستە قالمايتىندىقتان، ساعات 13-15 اراسىندا دايىندالماعان ابزال.
3. ءبىرىنشى قيىنى. دايىندىقتى ءاردايىم ءوزىڭىز ناشار بىلەتىن ساباقتى وقۋدان باستاڭىز. دايىندىق پەن دەمالىستى كەزەكتەستىرىپ وتىرىڭىز: 40 مينۋت دايىندىق، 10 مينۋت ءۇزىلىس. دەمالىس كەزىندە بەلسەندى قوزعالۋعا تىرىسىڭىز. ۇيدەگى گۇلدەرگە سۋ قۇيىڭىز، جاتتىعۋلار جاساڭىز، دۋشقا ءتۇسىڭىز جانە 1 ستاقان سۋ نەمەسە كوك ءشاي ءىشىپ الىڭىز. سۋسىن ميدىڭ جۇمىسىن جاقسارتادى. ۇبت-نىڭ الدىندا ەڭ قيىن سۇراقتاردى تاعى دا ءبىر رەت قايتالاپ شىعۋ ءۇشىن 1 كۇن قالدىرىڭىز.
4. ۇبت تەستىلەرىمەن دايىندالۋ. وزىڭىزدەن ۇلكەن اپكەلەرىڭىز بەن اعالارىڭىزدان تەست كىتاپشالارىن سۇراڭىز. ينتەرنەت سايتتارىنداعى تەستىلەردى ورىنداڭىز. مۇنىڭ كومەگىمەن بولاشاقتا قانداي سۇراقتار بولۋى مۇمكىن ەكەنىن بىلەتىن بولاسىز.
5. قىسقاشا كونسپەكت دايىنداڭىز. ءوزىڭىز بىلمەيتىن سۇراقتى تەرەڭىرەك تالداپ، ونى قاعاز بەتىنە سۋرەت ارقىلى نەمەسە سىزبا ارقىلى ءتۇسىرىڭىز. ەگەر ەستىگەنىڭىزدى ەستە جاقسى ساقتايتىن بولساڭىز، وقىعان كونسپەكتىلەرىڭىزدى اۋديوجازبا رەتىندە جازىپ وتىرىڭىز. ولاردى اۆتوبۋستا، سەرۋەندەپ جۇرگەن كەزدە تىڭداۋعا بولادى.
6. ۇبت جانە قۇر جاتتاۋ. بۇل ءتاسىلدى ەڭ سوڭعى مۇمكىندىك رەتىندە عانا قاراستىرعان ءجون. ونى ۇبت-عا از ۋاقىت قالعان كەزدە عانا پايدالانۋعا بولادى. ياعني ءوزىڭىز تولىق تۇسىنبەي جاتقان ماتەريالدى تاقپاق سەكىلدى زۋدىراتىپ جاتتاپ الىڭىز.
7. ۇبت جانە قاۋىرت دايىندىق. بۇل جاعدايدا اقپاراتتى تاڭداپ الىپ جاتتاڭىز. مەڭگەرۋ كەرەك ماتەريالدى 7 بولىككە ءبولىڭىز. سەبەبى ءبىزدىڭ ميىمىز ءبىر ۋاقىتتا 7 ءتۇرلى اقپاراتتى عانا وڭدەپ شىعارا الادى. ارتىنشا ءار تاقىرىپقا ارنالعان 7 قاعاز الىڭىز. ولاردىڭ ءارقايسىسىنا ناقتى مالىمەتتەردى جازىڭىز: تىرەك سوزدەر، قىسقا فرازالار، فورمۋلالار، داتالار. جازىپ وتىرعان كەزدە وقۋلىقتاردى پايدالاناباي، تەك ەستە ساقتاۋ قابىلەتىڭىزگە سۇيەنىڭىز. بۇدان كەيىن جازعاندارىڭىزدى كىتاپتاعىمەن سالىستىرىڭىز. قاتەڭىزدى تۇزەپ، دۇرىس جاۋاپتى دا جازىڭىز. ۋاقىتىڭىز بولسا، بۇل ءادىستى قوسىمشا تاقىرىپتارعا دا قولدانۋىڭىزعا بولادى. سىناق تەستىن تاپسىرار كەزدە وسى قاعازدارعا زەر سالىڭىز.
8. بۇدان كەيىن ۋاقىتپەن دايىندالىپ ۇيرەنگەن ءجون. ءبىر سۇراققا 2 مينۋتتان ارتىق ۋاقىتىڭىز كەتپەۋىن قاداعالاڭىز.
9. ءار تاقىرىپقا ارنالعان كارتوچكا جاساڭىز. تاقىرىپقا سايكەس فورمۋلالار مەن تىرەك سوزدەردى دە جازىپ وتىرىڭىز. مۇنىڭ بارلىعى ۇبت-عا كىرەر كەزدە ءبىر رەت جاقسىلاپ قايتالاپ الۋعا كومەكتەسەدى.
10. الاڭ بولماڭىز! ۇبت-عا ءوز كۇشىممەن دايىندالامىن دەپ شەشكەن بولساڭىز، الەۋمەتتىك جەلىلەردەن، تەلەفوننان، ارتىق جيىن-تويدان باس تارتىڭىز.
جوعارىداعى 10 ءتاسىلدى مەڭگەرۋ ارقىلى قالاعان ناتيجەمىزدى الۋعا بولادى.
دەرەككوز: massaget.kz
You Might Also Like
