InfoHub Logo

بالقاش، ياعني تەڭىز كولىنە قۇياتۇعىن قاراتال وزەنىنەن سىرداريا ءھام شىرشىق وزەنىنە شەيىن - قاڭلى، دۋلات ءناسىلى. بۇل دۋلات بۇرىنعى چۋيسكيي ناسىلىنەن. ارعى ءتۇبى قارا قىرعىزدان شىققان. عايسا پايعامباردان 150 جىل بۇرىن كۇنباتىستاعى الاتاۋعا كەلگەن. سول دۋلاتتىڭ وڭ تۇس-كۇنباتىسىنا كەلگەن كوپ قاڭلى جانە قاڭلىنىڭ شانىشقىلى دەگەن تابى، ۇلى ءجۇزدىڭ ەڭ كوبى دۋلات بولعان. ونىڭ ىشىندە بوتباي، شىمىر، سيقىم، جانىس، البان، سۋان. الباننان شىققاندارى - قىزىل بورىك، قوڭىر بورىك، ايت بوزىم، سەگىز سارى، قۇرمان، ءالجان، قيىستىق. جانە ىلە وزەنىنىڭ سول تۇس جاعىندا ەسكى ءۇيسىن ناسىلىنەن سارى ءۇيسىن بار. ونىڭ رۋلارى - قۇتتىمبەت، جاناي، جولاي، تاناي، جان دوساي، قۇلۇكە، قىرىق دەگەن. جانە ۇلى ءجۇزدىڭ دۋلاتتان سوڭعى كوبى جالايىر بولعان. ونىڭ رۋلارى - انداس، مىرزا، قارا شاپان، وراقتى، اق بەيىم، قالپە، ءسۇپوتاي، ارىق تىنىم، بايشەگىر، سيىرشى، بالعالى، قايشىلى، كۇشىك. وسى كۇشىك دەگەن ءبىزدىڭ قالقامان ءناسىلى بولا ما دەپ ويلايمىن. سەبەبى وسىنىڭ ءتۇبى جالايىر ەمەس دەيدى. جالايىر بۇرىنعى ۋاقىتتا بەك كوپ ەل بولعان جانە ۇلى ءجۇزدىڭ شاپىراشتى، ىستى دەگەندەرى الماتىعا قارايدى. سىرگەلى مەن وشاقتى سىردارياعا جاقىن. بۇل تورتەۋى قاڭلىدان شىققان جانە ۇلى ءجۇز ىشىندە قوڭىرات بار، ول باسىندا ورتا ءجۇز ەلى ەدى، وكپەلەپ كوشىپ بارعان. مۇنى ءابىلعازى ءباھادۇر حان «ماعول حانى ەلحاننىڭ قيان دەگەن بالاسىنىڭ ناسىلىنەن، جورىق مەرگەننىڭ بالاسى قوڭىرات دەگەن كىسىنىڭ ءناسىلى» دەيدى، ونىڭ رۋلارىن ورتا جۇزدە ايتامىن.