InfoHub Logo

ەرتەدە ءبىر كىشكەنتاي قىز بولىپتى. بىردە ول ورمانعا بارىپ، اداسىپ كەتەدى. قايتار جولدى ىزدەپ ءجۇرىپ، قالىڭ اعاشتار اراسىندا تۇرعان ەسكى ۇيگە كەزىگەدى. ەسىگى اشىق تۇر. قىز ىشكە كىرەدى. بولمەدە ەشكىم كورىنبەيدى. بۇل ۇيدە ءۇش ايۋ تۇراتىن. ەڭ ۇلكەنى، اكەسى — ميحايل يۆانىچ، ودان كەيىنگىسى، شەشەسى — ناستاسيا پەتروۆنا جانە ولاردىڭ بالاسى — كىشكەنە قونجىق. ۇشەۋى بۇل كەزدە ورمان ارالاپ، سەرۋەندەپ كەتكەن.

بولمە ورتاسىندا ۇلكەن اعاش ۇستەل مەن ءۇش ورىندىق تۇر. ۇستەل ۇستىنە اس قۇيىلعان ءۇش ىدىس قويىلعان. ولاردىڭ ءبىرىنشىسى — ۇلكەن تاباق، ەكىنشىسى — ورتاشا تاباق، ءۇشىنشى — كىشكەنە كوك تاباق. ءار ىدىستىڭ قاسىندا قاسىقتارى جاتىر. قىز ەڭ ۇلكەن قاسىقتى الىپ، ۇلكەن ىدىس تاعى تاعامنىڭ ءدامىن تاتادى. استىڭ ءدامى ۇنا مايدى. سودان كەيىن ورتاشا قاسىق پەن ەكىنشىسىن، كىشكەنە قاسىقپەن ءۇشىنشىسىن كورەدى. بارىنەن دە وعان كوك تاباقتاعى اس ۇنايدى. قىزدىڭ قارنى اش ەدى.

ەندى ول وتىرىپ تاماقتانۋ ءۇشىن وزىنە ورىندىق تاڭدايدى. ەڭ ۇلكەن ورىندىق — ميحايل يۆانىچتىكى، ودان كىشىرەگى — ناستاسيا پەتروۆنانىكى، ال ءۇشىنشىسى — قونجىقتىكى. كىشكەنتاي قىز ەڭ ۇلكەن ورىندىققا شىعىپ، ودان قۇلاپ تۇسەدى. ورتانشىسىنا ءمىنىپ ەدى، ىڭعايسىز كورىنەدى. كوڭىلىنەن شىققان تەك ءۇشىنشى ورىندىق بولادى. قىز قونجىقتىڭ ورىندىعىنا وتىرىپ، كوك تاباقتاعى تاماقتى ءىشىپ الادى. قارنى تويعان ول كىشكەنتاي ورىندىقتى ارى - بەرى شايقاپ وينايدى. اقىرىندا ونى سىندىرىپ، ءوزى جەرگە قۇلايدى. قولىمەن قونجىقتىڭ قاسىعىن قاعىپ جىبەرەدى. قاسىق ۇشىپ بارىپ، بۇرىشتا تۇرعان ساندىقتىڭ استىنا كىرىپ جوق بولادى.

قىز ورنىنان تۇرىپ، كەلەسى بولمەگە كىرەدى. بۇل جەردە ءۇش توسەك بار ەكەن. ەڭ ۇلكەنى — ميحايل يۆانىچتىكى، ورتانشىسى — ناستاسيا پەتروۆنانىكى، ال ءۇشىنشىسى — قونجىقتىكى. قىز ەڭ ۇلكەن توسەككە شىعادى. بۇل وعان تىم ۇلكەندىك جاسايدى. ودان ءتۇسىپ، ورتانشىسىنا جاتادى. ول بيىك كورىنەدى. ىڭعايلى بولعانى — ءۇشىنشى توسەك. قاتتى شارشاعان قىز وسى قونجىقتىڭ ورنىنا جاتىپ، ءتاتتى ۇيقىعا باتادى. بۇل كەزدە ورماندى ارالاپ شارشاعان ءارى قارىندارى اشقان ايۋلار ۇيلەرىنە ورالعان ەدى. ىشكە كىرگەن ولار الدىمەن تاماقتانباقشى بولادى. ەڭ ۇلكەن ايۋ ءوز تاباعىنا قاراپ، جۋان داۋىسىمەن:

— مەنىڭ ىدىسىما تيىسكەن كىم؟! — دەپ اقىرادى.

ناستاسيا پەتروۆنا دا ىدىسىنا قاراپ:

— مەنىڭ تاباعىمدى ورنىنان قوزعالتقان كىم؟! — دەيدى اشۋلانىپ.

كىشكەنە قونجىق جىڭىشكە داۋىسىمەن:

— مەنىڭ تاماعىمدى مۇلدەم ءىشىپ قويىپتى، — دەيدى كوك تاباقتى قولىنا الىپ.

ۇلكەن ايۋ ەندى ۇلكەن قاسىعىن ۇستاپ:

— مەنىڭ قاسىعىما تيىسكەن كىم؟! — دەپ اقىرادى جۋان داۋىسىمەن.

— مەنىڭ قاسىعىمدى ورنىنان قوزعالتقان كىم؟ — دەيدى ناستاسيا پەتروۆنا. 

قونجىق جىڭىشكە داۋىسىمەن:

— ال مەنىڭ قاسىعىم جوق، — دەيدى جان-جاعىنا قاراپ.

ميحايل يۆانىچ:

— كىم مەنىڭ ورىندىعىمدى قوزعالتقان؟! — دەيدى زور داۋىسىمەن.

ناستاسيا پەتروۆنا بولسا:

— ال مەنىڭ ورىندىعىما وتىرعان كىم؟ — دەيدى نالىپ. ونىڭ داۋىسى ۇلكەن ايۋعا قاراعاندا جايىراق شىعادى.

— مەنىڭ ورىندىعىمدى بىرەۋ ءتىپتى سىندىرىپ تاستاپتى، — دەيدى قونجىق جىلامسىراپ.

ايۋلار ىشكى بولمەگە كىرەدى.

— مەنىڭ توسەگىمە جاتقان كىم؟! — دەيدى ميحايل يۆانىچ اقىرىپ.

— ال مەنىڭ توسەگىمە شىققان كىم؟ — دەيدى ناستاسيا پەتروۆنا باسىن شايقاپ.

— وي، مەنىڭ توسەگىمدە بىرەۋ جاتىر، — دەيدى قونجىق تاڭ قالىپ. ايۋلار قونجىقتىڭ توسەگىنە جاقىندايدى. ماۋجىراپ ۇيىقتاپ جاتقان كىشكەنتاي قىزدى كورەدى دە، ۇشەۋى جامىراپ:

— قارا مۇنى! — ۇستاڭدار! ۇستاڭدار! — ۇستا ونى! — دەپ ايعايعا باسادى. ۋ-شۋدان ويانىپ كەتكەن قىز جانىندا تۇرعان ءۇش ايۋدى كورەدى. قاتتى قورىققان ول اشىق تۇرعان تەرەزەدەن جەرگە سەكىرىپ تۇسەدى. الدى-ارتىنا قاراماي قاشا جونەلەدى. قىزدى ۇستاي الماعان ميحايل يۆانىچ، ناستاسيا پەتروۆنا مەن قونجىق ۇشەۋى ارتتا قالادى.

---