InfoHub Logo

ءبىر جەسىر كەمپىردىڭ جۇرت اۋزىنا ىلىككەن جالعىز بالاسى بولىپتى. ول كەزدەگى جاقسىنىڭ ادەتى — جۇيرىك ءمىنىپ، يت جۇگىرتىپ، قۇس سالاتىن. كەمپىردىڭ بالاسىنىڭ دا ءبىر جۇيرىك اتى، ۇشار دەگەن قۇماي تازىسى بار ەكەن. اسىرەسە ۇشارى قارا جەردەن ءىز كەسەتىن اڭساق، يەسىنە ادال قاعىلەز، قانجىعانىڭ قانىن قۇرعاتپايتىن جولدى يت بولسا كەرەك. استىنداعى اتى، سوڭىنداعى تازىسى كەلىسكەن سوڭ، جىگىت ءجيى-جيى اڭعا شىعىپ، ساياتشىلىق قۇرادى ەكەن.

كۇندەردىڭ ءبىر كۇنىندە جالعىز جىگىت توسىن دەرتكە شالدىعىپ، دۇنيە سالادى. ەل ازا تۇتىپ، ارۋلاپ قويادى. سونان سوڭ بۇرىنعى-سوڭعىنىڭ ءداستۇرى بويىنشا، ولىك شىققان جۇرتتى اۋىستىرىپ، اۋىل قونىسىن وزگەرتىپ، جاڭا جۇرتقا اۋناپ قونادى.

جاڭا جۇرتقا كەلگەن سوڭ، جەسىر كەمپىر «جالعىزىمنىڭ كوزى عوي» دەپ، تازىنى ىزدەسە جوق دەيدى. سودان كوڭىلى الاڭ بولىپ، تىنشي الماي ەسكى جۇرتقا كەلسە، ۇشار جاس ءقابىردىڭ باسىندا يەسىن قيماي ۇلىپ وتىر دەيدى. ۇشكىر تۇمسىعىن كوككە قاراتىپ ۇلىپ، يەسىن جوقتاپ سارناعان ۇشاردىڭ داۋىسىن ەستىگەندە جەسىر كەمپىر:

جالعىزىمنان ايىرىلدىم،
قاناتىمنان قايرىلدىم!
ۇشار، ۇشار، كا-كا! —
دەپ داۋىس قويىپ، اڭىراپ قويا بەرەدى. ەسكى جۇرتتا جالعىزىنان ايىرىلعان سورلى انا مەن يەسىنەن ايرىلعان جەتىم تازى قوسىلا كۇڭىرەنەدى.

وسى ءبىر قايعىلى ءحالدى قورقىت قوبىزىنا كۇي ەتىپ شالعان ەكەن.

---