InfoHub Logo

«ۇستازدىق ەتكەن جالىقپاس، ۇيرەتۋدەن بالاعا» - دەگەن ەمەس پە؟! يا، ۇستازدار جايلى اڭگىمە ايتىلعاندا، ەڭ ءبىرىنشى مۇرات اعاي ويىما ورالادى. ياعني، تاريح ءپانىنىڭ ءمۇعالىمى اشكەيەۆ مۇرات جامان ۇلى. ءبىز ول كىسىنىڭ ساباعىن اسىعا كۇتىپ، قىزىعا تىڭدايتىنبىز. ويتكەنى، ءار ساباعىندا سوناۋ تاريحتىڭ تەرەڭىنەن اڭگىمە قوزعاپ، مىسال كەلتىرە وتىرىپ، ءبىزدىڭ كوڭىلىمىزدى وزىنە اۋدارىپ الاتىن. سودان سوڭ جاڭا ساباقتى وتە باستايتىن. ساباق بارىسىن تۇسىندىرە ءجۇرىپ، ءار وقۋشىنىڭ قاس-قاباعىن باقىلاپ، ويىن وقىپ وتىراتىن.

«ۇستاز تانىمدى بولسا، شاكىرت ءبىلىمدى،

ۇستاز تالاپشىل بولسا، شاكىرت ۇعىمدى» بولماق دەمەي مە. كەيبىر كەزدەرى ول ساباق ۇستىندە ءومىر جايلى اڭگىمەلەر قوزعاپ، اقىن-جازۋشىلار ومىرىنەن ەستەلىكتەر ايتاتىن. الداعى بولاشاق ومىرىمىزدە باىت-باعدار بەرىپ وتىراتىن. ءبىزدىڭ پىكىر-كەڭەستەرىمىزدى تىڭدايتىن. سول كەزدەرى ول ءبىزدى وزىمەن قاتار ادامداي ۇستاپ، ءوز ويىمىزدى قىسىلماي ەركىن دە اشىق جەتكىزۋگە ۇيرەتكەن ەكەن. شاكىرتتەرىنىڭ شىنايى كوڭىلى مەن بالاڭ قيالدارىن تىڭداپ، ءماز بولاتىن. مەنىڭ ويىمشا، ۇستاز – كىرپىشتىڭ قالىبى، شاكىرت – سول قالىپتان شىققان كىرپىش بولسا كەرەك. «قالىبىنا قاراي كىرپىشى» - دەگەن ءسوز وسىعان وراي ايتىلعانداي.

بۇل كۇندە ءارقايسىسىمىز ءار ماماندىق يەسى اتانىپ، ءار سالادا قىزمەت جاسايمىز. ومىردەن ءوز ورنىمىزدى تاۋىپ، ءوزىمىزدى تانىتا بىلسەك، ول مۇرات اعاي سەكىلدى ۇلاعاتتى ۇستازدارىمىزدىڭ ارقاسى دەپ بىلەمىن. سىزدەرگە مىڭ العىس، قۇرمەتتى ۇستازدار!

---