InfoHub Logo

ۇستەل تەننيسى وتە كەڭ تاراعان ويىن. بۇل ۇستەل تەننيسىنىڭ سپورتتىق جانە قوزعالىس ويىندارى رەتىندە اسا كوپ ماتەريالدىق شىعىندى جانە سپورتتىق جارىستاردا، جاتتىعۋلاردا اسا كوپ ورىندى تالاپ ەتپەيدى. سونىمەن بىرگە ويىن كەزىندە جوعارى قوزعالىس بەلسەندىلىگىمەن ەرەكشەلەنە وتىرىپ ادامنىڭ بويىنا جىلدامدىق، ەپتىلىك، قيمىلدى باسقارۋشىلىق، زەيىندىلىگىن ارتتىرۋ، ارەكەت جاساۋ، كوزبەن مولشەرلەۋ، ويلاۋ سياقتى قابىلەتتىلىكتەرىن قالىپتاستىرادى.

ۇستەل تەننيسى وتە قىزىقتى، جان جاقتى، ءار جاستاعى ادامدار ءۇشىن قول جەتەرلىك ويىن. قيمىل قوزعالىستىڭ تەزدىگى، شابۋىلداردىڭ شاپشاڭدىعىمەن، تەحنيكالىق قيىستىرۋلاردىڭ كەنەتتىلىگىمەن وقيعالاردىڭ اسەرلىلىگىمەن وزىنە قاتتى قىزىقتىرادى. قيمىل قوزعالىس، داعدىلاردىڭ ءار تۇرلىلىگىمەن، ءتۇرلى ۇيلەستىك پەن كۇشەيتە تۇسۋىمەن، بارلىق فيزيكالىق ساپالاردىڭ دامۋىنا جاعداي جاسايدى. ويىن كەزىندە ويىنشى جالىندى، جىگەرلى كۇشپەن بىرگە دەنە قوزعالىسىنا قوسىمشا كۇش بەرەدى.

ۇستەل تەننيسى (پينگ-پونگ) – بەلگىلى عيمارات ىشىندە، ارنايى ويىن ۇستەلىندە ارنايى راكەتكامەن وينالاتىن، شاپشاڭدىققا باعىتتالعان سپورت ءتۇرى. ەگەر قارسىلاس ارنايى دوپتى ۇستەلدەن تىس جەرگە اسىرسا نەمەسە ءسىزدىڭ الاڭىڭىزعا تۇسىرە الماي دوپتى راكەتكامەن تورعا ۇرسا ءسىز ارنايى ەرەجەلەر بويىنشا ۇپاي الا الاسىز.

پايدا بولۋى

ۇستەل تەننيسى ءارقاشان جىلدامدىققا باعىتتالعان قاتال سايىس ەكەنى راس. العاشىندا XIX عاسىردا ونى تۇستەن كەيىنگى ويىن رەتىندە ەرمەك قىلعان. ويىنشىلار اس ۇستەلىنىڭ ۇستىنە توردىڭ ورنىنا كىتاپتاردى قويىپ، شىلىمنىڭ قورابىمەن بوتەلكەنىڭ تىعىنىن سوعىپ ويناعان.

اتاۋ تاريحى

پينگ-پونگ ءسوزى 1901 جىلداردان باستاپ كەزدەسە باستادى. وعان دەيىن، ويىن كەزىندە شىعاتىن ءار ءتۇرلى دىبىستارعا بايلانىستى "فليم-فلام"، "ۆيف-ۆاف"، "گوسسيم" دەپ اتالىپ ءجۇردى. ياعني، رەسمي تۇردە "پينگ-پونگ" اتاۋىن ءبىر عاسىرداي بۇرىن امەريكاندىق دجون دجاكۆەس تىركەدى. "پينگ" - راكەتكامەن دوپتى سوققان كەزدە شىعاتىن دىبىس، "پونگ" - دوپ ويىن ۇستەلىنە تيگەندە شىعاتىن دىبىس.

ويىن ۇزىندىعى 2،74 مەتر (9 فۋت)، ال ەنى 1،525 مەتر (5 فۋت) بولاتىن ۇستەل ۇستىندە وينالادى. ۇستەلدىڭ بيىكتىگى 76 سم (30 ديۋيم). ۇستەل ادەتتە جوڭقادان نە وعان ۇقساس ماتەريالدان جاسالىپ، جاسىل، قارا كوك نەمەسە قارا تۇسكە بويالادى. ۇستەلدىڭ ورتاسىندا بيىكتىگى 15.25 سم (6 ديۋيم) بولاتىن تور ورنالاسقان. ويىن كەزىندە ەكى جاعى ءبىر نەمەسە ەكى قابات ارنايى رەزەڭكەمەن قاپتالىنعان اعاشتان جاسالعان قالاقشا قولدانىلادى. ۇستەل تەننيسىنە ارنالعان كىشكەنە شار سەللۋلويدتان جاسالادى. شاردىڭ ديامەترى – 40 مم، سالماعى – 2،7 گ.، ءتۇسى اق نەمەسە قىزعىلت سارى بولىپ كەلەدى.

ويىننىڭ دامۋ ساتتەرى

العاشقى كەزدە راكەتكالار رەتىندە جىلتىر اعاشتار قولدانىلدى. ولاردا قازىرگى تاڭداعىداي قاپتامالار مۇلدە بولعان جوق. مۇنداي راكەتكالارمەن قازىرگى تاڭداعىداي ءتۇرلى ادىستەردەگى سوققىلار جاساۋ مۇمكىن بولعان جوق. 1903 جىلى چ.گۋد العاش رەت كاۋچۋكتىڭ بورپىلداق قاباتىنان جاسالعان راكەتكانى ويلاپ تاپتى. وتكەن عاسىردىڭ جيىرماسىنشى جىلدارى بۇنداي راكەتكالار وتە كەڭ تۇردە تارالىپ، وزگە راكەتكالاردىڭ ءبارىن قولدانىستان ىعىستىرىپ شىعاردى. بورپىلداق كاۋچۋكتان جاسالعان راكەتكا ويىندى جەڭىل باقىلاۋدا ۇستاۋعا مۇمكىندىك بەردى. سونىمەن قاتار ويىن تەحنيكاسىنا دا وزگەرىستەر ەندى. 1950 جىلدارى شىققان گۋبكالىق قاباتتى راكەتكالار عانا كاچۋك قاپتاماسىنداعى راكەتكالاردى جەڭە الدى. گۋبكالىق راكەتكا ەۋروپادا وتە كەڭ تارالىپ كەتتى. 1952 جىلى بومبەيدە وتكەن چەمپيوناتتا جاپونيالىق حيرودزي ساتو گۋبكالىق راكەتكامەن الەم چەمپيونى بولدى. وسى جىلى جاپوندىق كوماندا الەم چەمپيوناتىنا تۇڭعىش رەت قاتىسىپ، شابۋىلداۋشى تاكتيكالارىنىڭ ارقاسىندا كوپتەگەن جۇلدەلەردى ەلىنە الىپ قايتتى. ولاردىڭ اراسىندا التىن مەدالدار دا بار. الايدا گۋبكالىق راكەتكالار ۇستەل تەننيسىنىڭ تارتىمدىلىعىن تومەندەتىپ جىبەردى. سەبەبى بۇل راكەتكامەن سوعىلعان دوپتى قابىلداۋ وتە قيىن بولدى. مۇنداي ويىندا فيزيكالىق كۇشپەن اتقارىلاتىن سوققىلار ءبىرىنشى ورىنعا شىقتى دا، تەحنيكالىق قابىلەتتىلىكتەردى قاجەتتىلىگى شامالى بولدى. ۇستەل تەننيسىنىڭ كەڭ تارالۋىنا كەرى اسەر ەتكەندىكتەن، 1959 جىلى گۋبكالىق رەزينالى راكەتكانى پايدالانۋعا تىيىم سالىندى. 1959 جىلدان باستاپ، گۋبكانى رەزينانىڭ نەگىزى رەتىندە قولدانا باستادى. وسىنىڭ اسەرىنەن شىعارىلعان سوققىنى قابىلداۋ مۇمكىندىگ ارتىپ، ويىندا تەحنيكالىق مۇمكىندىكتەرگە جول اشىلدى. ويىن قارقىنى دا ارتا ءتۇستى. جاسالىناتىن سوققىنىڭ تەك كۇشپەن ەمەس، تەحنيكامەن اتقارىلۋى ويىندا ۇلكەن ورىن اتقاردى.

ماڭىزدى كۇندەر

1921 جىل - انگليادا ۇستەل تەننيسى فەدەراسياسى قۇرىلدى. 1926 جىل - حالىقارالىق ۇستەل تەننيسى فەدەراسياسى دۇنيەگە كەلدى. 1926 جىل - اتالمىش سپورت تۇرىنەن العاش رەت الەم چەمپيوناتى ءوتتى. 1952 جىل - جاپوندىق حيرودزي ساتو جاڭالىق اشىپ، رەزينامەن قاپتالعان راكەتكامەن سايىسقا ءتۇسىپ الەم چەمپيونى اتاندى. 1988 جىل - ۇستەل تەننيسى 1988 جىلعى سەۋل وليمپياداسىنا العاش رەت وليمپيادالىق سپورت ءتۇرى بولىپ ەندى.

حالىقارالىق فەدەراسيا

جازعى وليمپياداعا ۇستەل تەننيسى 1988 جىلى سەۋل وليمپياداسىنان باستاپ ەندى. ال پاراليمپيادالىق ويىندارعا 1960 جىلى-اق ەنگىزىلدى. (1960 جىل، ريم)

ءىرى جارىستار

ەڭ ماڭىزدى جارىستار: الەم چەمپيوناتى، الەم كۋبوگى، وليمپيادالار. تانىمال قۇرلىقتىق سايىستارعا كەلەتىن بولساق: ەyروپا چەمپيوناتى، Europe Top-12، ازيا چەمپيوناتى جانە ازيادا.

---