InfoHub Logo

دۇكەندەگى مايونەزدىڭ زياندى جاقتارى تۋرالى كوپتەگەن ماقالالاردان كەيىن، بۇل تۇزدىقتى سالاۋاتتى ءومىر سالتىن ۇستاناتىن ادامنىڭ قاس جاۋى دەپ قابىلداۋ وڭاي. ساتىپ الىناتىن مايونەزدىڭ ءوندىرىس تەحنولوگياسى مەن رەسەپتۋراسى عانا زيان كەلتىرۋى مۇمكىن، ال ءۇي جاعدايىندا جاسالعان بۇل سوۋس بۇرىنعىشا قويۋ، تاڭداۋلى جانە ادام ءومىرى ءۇشىن ءقاۋىپسىز بولىپ قالا بەرەدى.

ءبىز وسى ماقالامىزدا ءمىنسىز ءۇي مايونەزىن – مايلى ءارى ۇلپىلدەك مايونەزدى ازىرلەۋدىڭ قۇپياسىمەن بولىسپەكپىز.

ءۇي جاعدايىندا ءمىنسىز مايونەزدى قالاي ازىرلەۋ كەرەك: كەڭەستەر مەن ەسكەرتۋلەر

1. تەحنيكانى تاڭداپ الىپ، بارلىق فاكتورلاردى ەسكەرىڭىز

كوپتەگەن ادامدار ءۇي مايونەزىن كاسىبي بلەندەرلەر مەن ميكسەرلەرى بولماعاندىقتان شايقاۋعا قورقادى. ارينە، تەحنيكالاردى قولدانۋ ارقىلى دايىندىققا جۇمسالاتىن ۋاقىتتى قىسقارتۋعا بولادى، الايدا قاراپايىم اس بۇلعاۋىشى (ۆەنچيك) بۇل ءىستى ويداعىداي اتقارادى.

بۇل سىزدەرگە ەرسى ەستىلۋى مۇمكىن، الايدا كاسىپقويلار مايونەزدى ىلعالدى، دىمقىل اۋا رايى كەزىندە دايىنداۋعا بولمايدى دەپ كەڭەس بەرەدى. ىلعالدىڭ جانە تەمپەراتۋرانىڭ جوعارى بولۋى سوۋستى «اۋىرلاتادى»، سوندىقتان ونى شايقاۋ قيىنعا سوعادى.

2. مايدى تاڭداپ الىڭىز

Extra Virgin ساناتىنداعى ءزايتۇن مايىن - بارلىق تاعامعا ارنالعان ەڭ تاڭداۋلى ماي دەپ ەسەپتەۋ قاتە پىكىر. شىندىعىندا، ول مايونەزگە ارنالماعان، سوندىقتان ونىڭ ورنىنا قاراپايىم ءزايتۇن مايىن قولدانعان دۇرىس نەمەسە ونى باسقا دا مايلارمەن – جۇگەرى، ءجۇزىم، جاڭعاق نەمەسە كۇندە تۇتىناتىن كۇنباعىس مايىمەن 1-گە 1 قاتىناسىندا ارالاستىرۋ كەرەك.

سونداي-اق، تازارتىلماعان ماي دا ءۇي مايونەزىن ازىرلەۋگە جارامسىز، سەبەبى ول تازارتىلعان مايدان دا قاتتى قويۋلاتادى – ال ونداي تۇزدىق تەز قاباتتالادى.

3. مولشەرلەستىگىن ناقتىلاپ، قىشقىلداندىرعىشتى تاڭداپ الىڭىز

كەلەسى مولشەرلەمەگە قۇلاق ءتۇرىڭىز: 1 ستاقان مايعا 1 جۇمىرتقا سارىسىن سالۋ كەرەك، ءار ستاقانداعى تۇزدىققا 1 اس قاسىق قىشقىلداندىرعىش قوسىلۋ ءتيىس. ەگەر ءسىز ليمون شىرىنىنىڭ ورنىنا سىركە سۋىن پايدالانساڭىز، ونىڭ ساپاسىنا نازار اۋدارىڭىز. بۇل ماقساتتا اق شاراپ سىركە سۋىن قولدانعان ءجون – ول مايونەزگە نازىك ءارى تاڭدامالى ءدام بەرەدى.

4. جۇمىرتقانى دايىنداڭىز

بارلىق ينگرەديەنتتەر ءۇي تەمپەراتۋراسىندا بولۋى ءتيىس، سوندىقتان الدىن الا جوسپارلاپ، جۇمىرتقانى كەم دەگەندە ازىرلەۋدەن 30 مينۋت بۇرىن توڭازىتقىشتان شىعارىپ قويىڭىز. ءدامى قانىق بولۋى ءۇشىن تەك جۇمىرتقانىڭ سارىسىن قولدانىڭىز.

5. تۇزدى دۇرىس قوسىڭىز

ەگەر ءسىز مايونەزگە تۇز قوسقىڭىز كەلسە، ونى شايقاعاننان كەيىن جۇمىرتقانىڭ سارىسى سالقىنداعاندا ىستەۋ كەرەك، ويتپەگەن جاعدايدا تۇزدىق قاتپارلانىپ كەتەدى. تۇزدى جۇمىرتقانىڭ سارىسىنا بولەك قوسىپ، كەيىن ونى مايعا قوسسا، ءتىپتى كەرەمەت بولىپ شىعادى. ايتا كەتكەن ءجون، كايەن بۇرىشى مەن ءبىر شىمشىم قىشانى قوسۋ ارقىلى قاتپارلانۋدىڭ الدىن الۋعا بولادى.

6. تۇزدىقتىڭ قويۋلىعى مەن قۇنارلىلىعىن تەكسەرۋ كەرەك

مايونەزدىڭ قۇنارلىلىعىن ازايتۋ ءۇشىن، ونى تابيعي يوگۋرتپەن 1-دە 1 مولشەرىندەي ارالاستىرۋ قاجەت – بۇل نۇسقا سالاتقا قوسۋ ءۇشىن ءتيىمدى بولماق. ەگەر تۇزدىق تىم قويۋ بولسا، وعان كىلەگەي نەمەسە جىلى سۋ قوسۋعا كەڭەس بەرەمىز.

7. شىعارماشىلىقتان قورىقپاڭىز

ءتۇرلى دامدەۋىشتەر مەن شوپتەر قوسىپ، تاجىريبە جاساپ كورىڭىز: ءۇي مايونەزى سارىمساقپەن، كوكشوپتەرمەن، پيازبەن، چيلي بۇرىشىمەن، كارري، اقجەلكەن، ليمون قابىعىمەن، كەپتىرىلگەن قىزاناق جانە كوگىلدىر ىرىمشىك ۇنتاعىمەن دە جاقسى ۇيلەسىم تابادى.

ءۇي مايونەزىنىڭ بازالىق رەسەپتى

تەوريادان پراكتيكاعا: ءوزىڭىزدىڭ جەكە قويۋ مايونەزىڭىزدى ازىرلەپ، ونى سالاتقا قوسىڭىز نەمەسە سەندۆيچ، تاۋىق ەتى، بالىق جانە سورپالارعا تۇزدىق رەتىندە پايدالانىڭىز.

ينگرەديەنتتەر:

1 ستاقان تازارتىلعان وسىمدىك مايى

1 دانا جۇمىرتقانىڭ سارىسى نەمەسە جۇمىرتقانىڭ ءوزى

1 اس قاسىق ليمون شىرىنى نەمەسە اق شاراپ سىركە سۋى

دامىنە قاراي تۇز، بۇرىش

تالعامىڭىزعا قاراي سۋ

دايىنداۋ ءادىسى:

بولمە تەمپەراتۋراسىنداعى جۇمىرتقانىڭ سارىسىنا دامىنە قاراي تۇز قوسىڭىز. كەيىن جۇمىرتقا قوسپاسىنا قىشقىلداندىرعىش قوسىپ، بولەك ىدىستا ارالاستىرىڭىز.

كەيىن باياۋ عانا جۇمىرتقا قوسپاسىن اس بۇلعاۋىشپەن نەمەسە بلەندەرمەن ارالاستىرا وتىرىپ، مايدى قۇيىڭىز. ەگەر مايونەز قاتتى قويۋ بولىپ كورىنسە، وعان شامالى جىلى سۋ (ءبىر قوسقاندا 1 ءشاي قاسىقتان كوپ بولماۋ كەرەك) قوسۋىڭىزعا بولادى.

ۇلپىلدەك جانە قويۋ بولعانعا دەيىن مايدى قۇيىپ، قوسپانى شايقاڭىز – ءۇي مايونەزى دايىن!

---