سەن دە كەتتىڭ،
مەن دە كەتتىم،
ول دا كەتتى اۋىلدان.
وسىنىمىز ۇيات بولدى-اۋ، ۇيات بولدى-اۋ،قاۋىمنان!
ۇيات بولدى-اۋ،
ۇيات بولدى-اۋ،
ۇيات بولدى-اۋ، باۋىرلار!
مومىن جۇرتتىڭ، ارقا سۇيەر،
ازاماتى ءبىز ەدىك.
تۇلپارلاردان، تۇعىرلاردان،
قالعان ءبىر-بىر ءىز ەدىك.
ءبىز دە كەتتىك،
باسقا جاققا بەتىمىزدى تۇزەدىك.
...ەستيمىسىڭ، قۇلاق ءتۇرشى،
قىردان ەسكەن سامالعا.
سالەم ايتىپ جاتىر اۋىل،
ساعان، وعان، ماعان دا.
تەلەگراف سىمى تۇرعان سۇيەنىپ اپ باعانعا.
كورەمىسىڭ،
زاڭعار تاۋلار جاۋلىقتارىن بۇلعايدى،
شاقىرادى اقباس شالدار،
سىبىزعى ەتىپ قۋرايدى.
ەسكە سالىپ، قايتقان قۇستار
ەلدىڭ جىرىن جىرلايدى.
كۇتە-كۇتە،
كوزى تالىپ،
كۇن سارعايىپ باتقانداي،
كۇتە-كۇتە،
جۇلدىزداردىڭ جانارى دا اققانداي،
زيرات ەكەش زيراتتار دا،
ءبىزدى جوقتاپ جاتقانداي...
مومىن ەلدىڭ،
ارقا سۇيەر،
ازاماتى ءبىز ەدىك،
جەكە-جەكە باقىت ىزدەپ،
جەكە ءومىر تۇزەدىك،
جەتەر ەندى!..
تۋعان جەردىڭ توپىراعىنا تىزە بۇك!

---