InfoHub Logo

ەر مەن ايەل وتباسىنىڭ ەكى ىرگە تاسى ەكەنى بەلگىلى. بۇل ومىردە ۇلكەن ءبىر كەدەرگى بولماسا، ەش سەبەپسىز تۇرمىس قۇرماۋ — دۇنيەگە ۇرپاق اكەلۋ مىندەتىنەن قاشقاندىق بولىپ سانالادى. سوندىقتان بۇگىن نەكە سۋىن ءىشىپ، ەرلى-زايىپتى بولىپ، ءبىر وشاق باسىندا بىرلەسىپ-جۇپتاسىپ ءومىر سۇرمەك بوپ شەشكەن ەكى جاستى، ولارمەن بىرگە اكە-شەشەسىن، بارشا تۋعان-تۋىستارىن وسى سالتاناتتارىمەن قۇتتىقتايمىز. اتا-اناسى «ۇلىم — ۇياعا، قىزىم — قياعا قوندى»، «بىرەۋىم ەكەۋ بولدى»، «ءورىسىم كەڭەيدى» دەپ قۋانۋدا. قوعامىمىزعا تاعى ءبىر جاس وتباسى كەلىپ قوسىلدى. وتان — وتباسىنان باستالسا،  قوعام — ەكى جاستىڭ جاراسا كوتەرگەن شاڭىراعىنان قۇرىلاتىنى ءمالىم.

قاراقتارىم، ۇيلەنىپ، ءۇي بولدىڭدار مىنە. قينالساڭ — جاسىپ كەتپەۋىڭە سەبەپكەر بولىپ، دەم بەرەتىن — جالعىز جان-جارىڭ. قانداي جاعدايدا دا ايەل كۇيەۋىنە، كۇيەۋى ايەلىنە سۇيەنەدى. ەندى قۋانىشتى دا، قايعىنى دا ءبولىسىپ، ورتاقتاسىپ، ومىرلىك جارىڭنىڭ ءار ۋاقىتتا قاسىنان تابىلۋدى ماقسات تۇتىڭدار.

ومىرلىك سەرىگىم دەپ باس قوسقان جارىڭدى سىيلاپ، كۇتە ءبىلۋ، ونىڭ ارتىق كەمدى مىنەزىن ءتۇسىنىپ،  كەشىرىمدى بولۋ — كىشىرەيگەندىك ەمەس، ادەپتىلىك، بىلىمدىلىك، كىسىلىك. سەبەبى، ەرلى-زايىپتىلار — ءبىر ءبۇتىننىڭ جارتىسى. جان-جارىڭدى سىيلاعانىڭ — ءوزىڭدى سىيلاعانىڭ، تاتۋ وتباسىنىڭ جولداس-جورالارىنىڭ اراسىندا بەدەلى جوعارى، باسى سىيلى بولادى. جاقسى جاردىڭ جانىن جارالاپ، كوڭىلىن قالدىراتىن مىنەزدەن اۋلاق بولىڭدار. مىنەكي، بۇل كوپتى كورگەن، اياۋلى اتا-انالاردىڭ قاي-قايسىنىڭ دا ۇل-قىزىنا جول كورسەتەر كەڭەسى.

ۇشقان ۇيالارىڭدى، ايالاپ وسىرگەن اتا-انالارىڭىزدى ۇمىتىپ كەتپەڭىزدەر. سەندەر دە  ەرتەڭ سولارداي ۇلكەن قارا شاڭىراقتىڭ يەسى بولىپ، ءتۇتىن تۇتەتەتىندەرىڭدى  ەستە ساقتاڭدار.

ءومىر تاجىريبەسى كورسەتكەندەي، شاڭىراق باقىتى — وتباسىنىڭ جاراسىمىنان باستالادى. ءسوز سوڭىندا ءبىز وسى ەكى جاس ءتارىزدى شاڭىراق قۇرىپ، ەكى اتا-انانى، بىر-بىرىمەن قۇدا-قۇداعي ەتىپ جاقىنداستىرىپ وتىرعان جاستاردى اق وتاۋلارىنا باقىت پەن ادال ماحاببات، تاتۋ-تاتتىلىك تىلەيمىز!

---