ياساۋي اتىنداعى حالىقارالىق قازاق-تۇرىك ۋنيۆەرسيتەتىنە ەرەكشە مارتەبە بەرىلدى
قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنە ەرەكشە مارتەبە بەرىلدى.
قازاقستان رەسپۋبليكاسى پرەزيدەنتىنىڭ 2020 جىلعى 15 قاڭتارداعى جارلىعىمەن قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتى ەرەكشە مارتەبەگە يە بولدى.
«ۋنيۆەرسيتەت 1992 جىلى ەلباسى ن. ءا. نازاربايەۆتىڭ باستاماسىمەن قازاقستاننىڭ ەجەلگى قالاسى تۇركىستاندا قۇرىلدى جانە بۇگىندە قازاقستانداعى جالعىز حالىقارالىق ۋنيۆەرسيتەت. وقۋ ورداسى حالىقارالىق كورپوراتيۆتىك باسقارۋدىڭ بىرەگەي جۇيەسىنە - ۇكىمەتارالىق وكىلەتتى كەڭەسكە، سەناتقا جانە باسقارۋشى كەڭەسكە يە.
ءبىلىم بەرۋ قازاق، تۇرىك، ورىس جانە اعىلشىن تىلدەرىندە جۇرگىزىلەدى» دەلىنگەن حابارلامادا.
بۇگىنگى كۇنى الەمنىڭ ءبىر دە ءبىر مەگاپوليسى بىرەگەي مازمۇنمەن تولتىرىلعان جانە سۇرانىسقا ساي كاسىبي ماماندار دايارلاۋدى دامىتۋدىڭ باعىتتارىن انىقتايتىن عىلىمي جانە ءبىلىم بەرۋ مەكەمەسى بولماسا، ەكونوميكالىق ورتالىق بولا المايدى.
قازاقستان پرەزيدەنتى قاسىم-جومارت توقايەۆ بۇل ماسەلەگە، ياعني، ءبىلىم ساپاسىن ارتتىرۋعا، ونىڭ حالىقارالىق ستاندارتتارعا ساي بولۋىنا، عىلىم مەن ءبىلىمنىڭ ينتەگراسياسىنا باسا نازار اۋدارىپ وتىر. بۇل، اسىرەسە، تۇركى الەمىنىڭ مادەني-رۋحاني ورتالىعى بولۋ جانە تۇركىستان وبلىسىنىڭ ءبىلىم-عىلىم حابى رەتىندە دامۋ مىندەتتەرى تۇرعان تۇركىستان قالاسى ءۇشىن وتە ماڭىزدى.
«ۋنيۆەرسيتەتتىڭ ەرەكشە مارتەبەسى وعان ۇلكەن اكادەميالىق جانە باسقارۋشىلىق دەربەستىك بەرە وتىرىپ، Ph.D. فيلوسوفيا دوكتورى مەن سالا بويىنشا دوكتور دارەجەسىن تاعايىنداۋعا، ءبىلىم باعدارلامالارىنىڭ مازمۇنىن انىقتاۋعا جانە جەكە ۇلگىدەگى ديپلومداردى بەرۋگە مۇمكىندىك جاسايدى. ءبىلىم گرانتىنىڭ قۇنى دا ارتادى. بۇل پروفەسسورلىق-وقىتۋشىلىق قۇرامنىڭ جالاقىسىن ارتتىرۋعا جانە ماتەريالدىق-تەحنيكالىق قامتاماسىز ەتۋدى جاڭارتۋعا مۇمكىندىك بەرەدى» دەپ ءمالىم ەتتى مينيسترلىكتەن.
بۇل شارالاردىڭ بارلىعى ۋنيۆەرسيتەتكە عىلىمي جانە پەداگوگيكالىق كادرلاردى تارتۋعا، وسى ايماقتىڭ دامۋىنا سەرپىن بەرىپ، ونىڭ الدىنا قويىلعان ماقساتتارعا جەتۋگە ىقپال ەتەتىن بولادى.
You Might Also Like
-
قازاق ءتىلى- قازاق حالقىنىڭ ۇلتتىق مۇراسى. قازاق ءتىلى - سوزدىك قورعا باي ءتىل. قازاق ءتىلى قازاق حالقىنىڭ ماقتانىشى. قازاق حالقى سوزگە شەشەن، ماقالداپ سويلەيتىن حالىق . كەز كەلگەن داۋدى اتاقتى بيلەرىم...
