InfoHub Logo

15 jastaǵy qazaqstandyq fýtbolshy Karım Mendıkanov Ispanıanyń ataqty "Barselona" klýbymen kelisimshartqa otyrdy. Ol kelesi maýsymda komandaǵa qosylady. Bul týraly alǵashqy bolyp ıspandyq Mundo Deportivo basylymy habarlady.

Bul týraly Infohub.kz aqparat agenttigi habarlaıdy.

Mendıkanov "Barselona" tarıhyndaǵy alǵashqy qazaqstandyq oıynshy atanady. Qazirgi tańda jas fýtbolshy Katalonıada óner kórsetip, komandaǵa aýysýǵa daıyndalýda. Ispanıalyq baspasóz ony "qazaqstandyq brıllıant" dep atap úlgerdi.

Katalon fýtbolyna jol

Karım Ispanıaǵa 2022 jyly kóship kelgen. Sol ýaqyttan bastap ol katalondyq jasóspirimder fýtboly júıesinde damyp keledi. Ótken maýsymda ol Cerdanyola klýbynda óner kórsetip, óz áleýetin tanytty. Bıylǵy maýsymda Mendıkanov Sant Cugat FC klýbymen kelisimshartqa otyryp, lıgadaǵy eń qaýipti oń qanat shabýylshylarynyń biri retinde tanyldy. Ony drıblıng sheberi jáne chempıonattyń úzdik asıstentteriniń biri dep ataıdy.

Sarapshylar nege nazar aýdardy?

Karım oń qanat shabýylshysy pozısıasynda oınaıdy. Ispanıalyq basylym onyń oıyn erekshelikterin, atap aıtqanda, jyldamdyǵyn, qarsylastaryn bir-birden aldaı bilý qabiletin jáne sátter jasaı alýyn erekshe atap ótti. "Ispanıanyń jastar fýtboly halyqaralyq talanttardy ózine tarta beredi, al Karım Mendıkanov esimderiniń biri bolyp otyr... Bul shynaıy gaýhar, oǵan árbir sátte qamqorlyq jasalýda", - delingen maqalada.

"Barselona" tańdaýy

Jas oıynshyǵa Ispanıanyń birneshe La Lıga klýbtary qyzyǵýshylyq tanytqanymen, fýtbolshy "Barselonanyń" usynysyn qabyldady. Basylymnyń málimetinshe, kelisimshartqa qol qoıylǵan, al Mendıkanov jańa júıege tezirek beıimdelý úshin komandamen birge jattyǵýlarǵa qatysyp úlgergen. Bul jattyǵýlardyń barlyǵy onyń qazirgi klýby Sant Cugat FC-nyń ruqsatymen ótken.

Endigi jospar

Mendıkanovtyń jazǵy kezeńde "Barselona" júıesine resmı túrde qosylýy ony klýb tarıhyndaǵy alǵashqy qazaqstandyq oıynshy etedi. Kelisimshartqa otyrǵanǵa deıin Karım oıyn tájirıbesin jınaýdy jalǵastyrady. Mundo Deportivo-nyń habarlaýynsha, jaqyn arada ol Eýropadaǵy eń bedeldi jastar týrnırleriniń biri bolyp sanalatyn MIC (Mediterranean International Cup) týrnırinde óner kórsetýi múmkin. Basylym sondaı-aq, oıynshyǵa degen joǵary qyzyǵýshylyqqa jáne onyń qarqyndy damýyna qaramastan, Mendıkanov áli kúnge deıin Qazaqstannyń jastar nemese ulttyq quramalaryna shaqyrylmaǵanyn atap ótti. Sarapshylar "Barselonaǵa" aýysýy oıynshyǵa qosymsha nazar aýdaratynyn aıtty.