InfoHub Logo

Perızat Qaırattyń isi boıynsha tárkilengen 79 mıllıon teńgelik Lexus LX 600 avtokóligi qaı memlekettik organǵa berilgeni belgili boldy. Bul týraly Astana qalasynyń memlekettik múlik jáne jekeshelendirý departamentiniń jaýabynda aıtylǵan.

Bul týraly Infohub.kz aqparat agenttigi habarlaıdy.

Kimge berildi?

Qara tústi kóliktiń memlekettik nómiri – 100PKO01. Bul kólik Perızat Qaırattyń anasy Gaını Alashbaevanyń atynda bolǵan. Ótken jyldyń shilde aıynda Gaını Alashbaevaǵa qaıyrymdylyq maqsatynda jınalǵan aqshany jymqyrýǵa jáne jylystatýǵa kómekteskeni úshin 7 jyl bas bostandyǵynan aıyrý jazasy kesilgen edi.

Avtokóliktiń baǵasy 79 121 985 teńge dep baǵalanǵan. Saýda-sattyqqa tek memlekettik mekeme nemese kásiporyn retinde tirkelgen zańdy tulǵalar, sonyń ishinde áleýmettik qyzmet kórsetý sýbektileri qatysa aldy.

Nátıjesinde, tárkilengen kólik Perızat Qaırat pen onyń anasynyń isin tergegen Qarjy monıtorıńi agenttigine berildi.

Basqa múlikter she?

Atalǵan is boıynsha basqa tárkilengen múlikter ázirge memlekettik organdarǵa berilmegen. Departamenttiń habarlaýynsha, bul múlikter quqyq qorǵaý jáne arnaýly memlekettik organdardyń, sondaı-aq prezıdentke tikeleı baǵynyshty jáne esep beretin, prezıdenttiń, saıası qyzmetshiler men parlament depýtattarynyń qyzmetin qamtamasyz etetin memlekettik organnyń qyzmettik mindetterin atqarý úshin paıdalanylatyn bolady.

Naýryz aıynyń sońynda Astana qalasynyń memlekettik múlik jáne jekeshelendirý departamenti taǵy bir kólikti – memlekettik nómiri 777KPK01 bolatyn qara Mercedes-Benz S450 avtokóligin satý týraly habarlama jarıalady. Saýda-sattyq 7 sáýirde bastalady.

Perızat Qaırat ózine 10 jyl bas bostandyǵynan aıyrý jazasy kesilgen bolatyn. Ol sondaı-aq memlekettik marapaty – «Shapaǵat» medalinen (qaıyrymdylyq pen meıirimdilik úshin beriledi) aıyryldy. Sot oǵan jáne onyń anasyna 50 jábirlenýshiniń paıdasyna barlyǵy 1 mıllıard 582 mıllıon teńge kóleminde materıaldyq zalaldy óteýdi mindettedi. Sondaı-aq, olar 22 mıllıon teńge memlekettik baj salyǵyn jáne árqaısysy 698 myń teńge sot shyǵyndaryn tóleýge tıis.