InfoHub Logo

Jigitter! Aldymen sózimdi senderge arnaımyn! Meniń senderden ótinerim, araq ishpeńder, aınalaıyndar! Araq — adamzattyń jaýy, halyqtyń dushpany. Araq aldymen talantty adamdardy qurtady. Sodan soń ózgege kóz salady. Talantsyzdy da jalmap juta beredi. Endeshe, araq ishpeńder, baýyrlarym! «Men myqtymyn» dep oqyrańdaı bermeńder, asyp bara jatqan kúshteriń bolsa, ony araqqa emes, aınalańdaǵy adamdarǵa, aǵaıyn-týys, adal jarlaryńa qamqorlyq jasaýǵa jumsańdar!

Qalqam! Araqty jeńemin dep dámelenbe! Sharapqa búıirim shyǵa bir toıaıynshy dep talpynba! Ol eshkimdi de toıdyrmaıdy. Sý ekesh sýdy da syzdyqtatyp, syzylta ishseń ǵana shóliń qanady. Adam araq ishpegennen ólmeıdi, arany ashylyp araq ishkeninen óledi. Árbir araq ishken adamnyń ómiri az, ǵumyry qysqa bolady. Onyń ústine maskúnemniń ómiri — mánsiz. Adamnyń ómiri onsyz da qysqa, endeshe, az ǵumyrdy ardaqtap, shamań kelgenshe maǵynaly etip ótkizgenge ne jetsin?!

Jigitter! Jandaryńda júrgen qyzdardy qurmetteńder. Qyz — bolashaqtyń anasy. Qyz — aldyńǵy urpaqtyń ájesi. Anańdy ardaqtap, ájeńdi qurmette, qaraǵym!

Qyzdar! Jandaryńda júrgen jigitterdi aqylmen, ádeptilikpen, sypaıy minezben, súıkimdi nazben tizgindeı bilińder! Araq ishkizbeńder, aıqaıǵa jolatpańdar. Olardy túngi 12-de mas bolyp restorannan kelip, jurttyń shyrqyn buzyp, terezeniń túbinde tekedeı baqyldatyp óleń aıtyp otyrmaıtyn etińder. Óıtkeni, qyz jetelese, ilespeıtin, qyz qıylsa, kónbeıtin jigit joq. Aqyl anadan taraıdy. Adamgershilik áıelden bastalady. Jaratýshy ózderińe syılaǵan osy bir ózgeshe ónerlerińdi qastaryńda júrgen jigitterge áser etýge jumsańdar. Jigit janyńda júrse — joldasyń, jaýǵa jumsasań — jolbarysyń. Ortada júrse — ormanyń, shetke shyqsa — qorǵanyń!

---