InfoHub Logo

Bıyl Naýryz meıramy jalpyulttyq «Naýryznama» onkúndigi aıasynda ázirlengen is-sharalar josparyna sáıkes atap ótiledi. 14 naýryz – Amal merekesine oraı Semeı qalasyndaǵy Qaraǵaıly yqsham aýdanyndaǵy respýblıka alańynda «Semeıdiń mádenı maýsymdary» jobasy sheńberinde «Semeı kóktemi» festıvali uıymdastyryldy. 

Alańda sahna qurylyp, kıiz úıler tigildi. Festıvál teatrlandyrylǵan kórinispen bastalyp, onda úlkender men jastar kórisip, «Amal qutty bolsyn!» dep qaýyshý dástúri men alastaý rásimi kórsetildi.

Merekelik sharaǵa qatysqan oblys ákimi Berik Ýálı jınalǵan jurtshylyqty alda kele jatqan Ulystyń uly kúni – Naýryz meıramymen quttyqtady.

«Tól merekemizdi toılaýdyń mazmunyn ıdeologıalyq mánmen baıyta túsý úshin Memleket basshysy 2024 jyly maquldaǵan «Naýryznama» tujyrymdamasyna sáıkes jańartylǵan formatta – Naýryznama onkúndigi aıasynda ótkizilýde. Bul onkúndiktiń basty maqsaty – Naýryz meıramyn tek bir kúndik dýman emes, tutas bir ulttyq jańǵyrý kezeńine aınaldyrý», – dedi aımaq basshysy.

Oblys ákimi óńirde aımaqtyń mádenı ómirine tyń serpin beretin jańa bastama «Semeıdiń mádenı maýsymdary» atty aýqymdy jobanyń bastalǵanyn jarıa etti.

«Atalǵan joba aıasynda óńirimizdegi mádenı sharalar jyldyń tórt mezgiline sáıkes uıymdastyrylady. Iaǵnı, «Semeı kóktemi», «Semeı jazy», «Semeı kúzi», «Semeı qysy» atty mádenı maýsymdar arqyly jyl boıy halqymyzdyń óneri men mádenıeti jańa mazmunda nasıhattalatyn bolady. Barshańyzǵa belgili, Abaı atamyzdyń ózi de tórt maýsymdy jyrǵa qosyp, ataqty «Jazǵytury», «Jaz», «Kúz», «Qys», deıtin tórt maýsymdy bederlegen klasıkalyq óleń jazǵan bolatyn. Bizdiń «Semeıdiń mádenı maýsymdary» hakim atamyzdyń osy jyrlarynan tamyr tartyp otyrǵanyn aıryqsha aıta ketkenimiz jón. Taǵy da bir atap óterligi, búgin ózderińiz jınalyp otyrǵan alań byltyr Respýblıka kúninde paıdalanýǵa berilip, Respýblıka alańy dep ataý usynylǵan bolatyn. Alań tórinde búgin otanymyzdyń kók týy jelbirep, tuǵyryna kóterildi. Kók baıraǵymyz osy jerde endi únemi jelbirep turatyn bolady», – dedi Berik Ýálı.

Aımaq basshysy shara barysynda Semeıdi kórkeıtý baǵytyndaǵy jumystardyń qarqyndy túrde jalǵasyp, birneshe esege ulǵaıatynyn, bıyl 100 aýla abattandyrylyp, osynsha aýlaǵa asfált tóseletinin, 100 kóshege ortasha jóndeý júrgizilip, osynsha kóshe jaryqtandyrylatynyn aıtty. Aıta keteıik, byltyr 35 aýla abattandyrylyp, 40 aýlaǵa asfált tóselip, 52 kóshege ortasha jóndeý jasalyp, 15 kóshe jaryqtandyrylǵan bolatyn.

Merekelik konsertte óńir ónerpazdary men shyǵarmashylyq ujymdar óner kórsetti. Aıta keteıik, «Naýryznama» tujyrymdamasyna sáıkes ótkiziletin 10 kúndik aıasynda oblys boıynsha 300-den astam mádenı, áleýmettik jáne sporttyq is-shara uıymdastyrý josparlanǵan.