InfoHub Logo

AQSH-ta turatyn qazaq kásipkeri, Respýblıkalyq partıa múshesi Tımýr Seıtmuratov Irandaǵy jaǵdaıǵa baılanysty Reseıdiń Taıaý Shyǵystaǵy yqpaly kúrt tómendeýi múmkin dep sanaıdy.

Bul týraly Infohub.kz aqparat agenttigi habarlaıdy.

Reseıdiń Taıaý Shyǵystaǵy yqpalynyń tómendeýi

Kásipkerdiń pikirinshe, Irannyń rýhanı kósemi aıatolla Hameneıdiń kózin joıý jáne Islam revolúsıasy saqshylar korpýsy (KSIR) basshylyǵynyń talqandalýy Máskeýdiń Taıaý Shyǵystaǵy sońǵy tiregin joıdy.

«Buǵan deıin Reseı Venesýeladan, Sırıadan aıyrylyp, Ońtústik Kavkaz Túrkıanyń yqpalyna ótip ketken edi. Endi Iran da Kremldiń qolynan sýsyp barady», - deıdi ol.

Investısıalardyń taǵdyry

Bul jaǵdaı Kremldiń Iranǵa salǵan mıllıardtaǵan ınvestısıasynyń taǵdyryn da kúmándi etýde. 2024 jyly ǵana Máskeý Irannyń ekonomıkasyna, ásirese gaz salasyna 8 mlrd dollar ınvestısıa salyp, osy eldiń eń iri sheteldik ınvestory atanǵan bolatyn. Sonymen birge reseılik kapıtal kólik ınfraqurylymyna, metalýrgıa men aýyl sharýashylyǵyna da baǵyttalǵan edi.

Geosaıası ózgerister men jańa múmkindikter

«Ázirge naqty boljam jasaý qıyn. Biraq Taıaý Shyǵystaǵy osy bir tektonıkalyq ózgerister Ýkraınadaǵy soǵystyń aıaqtalýyna eleýli serpin berýi múmkin. Árıne, Reseıdiń áli de Qytaıdan qoldaýy bar. Biraq Qytaı úshin de Venesýela, Panama jáne Irannan aıyrylý óte aýyr geosaıası soqqy. Sondyqtan Beıjiń endi jańa jaǵdaıǵa baılanysty tereń oılanýy tıis», – deıdi Tımýr Seıtmuratov.

Kásipkerdiń pikirinshe, Tegeran men Máskeýdiń aımaqtaǵy yqpalynyń tómendeýi Ankaranyń Kaspıı óńirinde kúsheıýine múmkindik beredi. Bul óz kezeginde Ortalyq Azıa elderimen birlesip, túrki odaǵyn qurý ıdeıasyn shynaıy júzege asatyn jobaǵa aınaldyryp otyr.

«Bes jyl buryn mundaı senarı múmkin emes bolyp kórinetin edi. Biraq ýaqyt ózgerdi, jaǵdaı ózgerdi», – dep qorytyndylady kásipker.