InfoHub Logo

Ekonomıs ári qoǵam belsendisi Aıbar Oljaev zeınetaqy jınaǵy boıynsha jetkiliktilik sheginiń kóterilýine qatysty pikir bildirdi.

Bul týraly Infohub.kz aqparat agenttigi habarlaıdy.

Onyń aıtýynsha, bul sheshim azamattardyń bolashaqtaǵy qarjylyq turaqtylyǵyn saqtaý úshin qabyldanǵan mańyzdy qadam.

Zeınetaqy jınaǵy – bolashaqqa salynǵan qor

Aıbar Oljaev áleýmettik jelidegi paraqshasynda pandemıa kezinde halyqqa qoldaý retinde engizilgen zeınetaqy jınaǵyn merziminen buryn paıdalaný múmkindigi ýaqytsha shara bolǵanyn atap ótti. Onyń pikirinshe, sońǵy jyldary azamattar bolashaqqa arnalǵan jınaqty qazirgi qajettilikke jıi jumsaı bastaǵan.

«Zeınetaqy jınaǵy – qazirgi shyǵyndarǵa arnalǵan qarapaıym banktik shot emes. Bul adamnyń erteńgi qarttyǵyna arnalǵan qarjylyq qory», – dedi ol.

Jetkiliktilik shegi – bolashaqty qorǵaý tetigi

Sarapshynyń sózinshe, jetkiliktilik shegi azamattardyń aqshasyna qoıylǵan shekteý emes, kerisinshe olardyń bolashaqtaǵy tabysyn qorǵaýǵa arnalǵan mehanızm. Memleket bul arqyly qarajatty tartyp almaıdy, tek azamattardyń bolashaqta jetkilikti zeınetaqymen qamtamasyz etilýine jaǵdaı jasaıdy.

Sonymen qatar ol jańa ádistemeniń zeınetaqy jınaǵynyń jetkiliktiligin burynǵydan naqtyraq esepteýge múmkindik beretinin aıtty. Esepteý barysynda adamnyń ómir súrý uzaqtyǵy, eńbek ótili, jarnalardyń turaqtylyǵy, ınvestısıalyq tabystyń yqtımaldyǵy jáne zeınet jasyndaǵy qajetti tabys kólemi eskeriledi.

Jastarǵa erekshe nazar

Aıbar Oljaev bul máseleniń ásirese jastar úshin mańyzdy ekenin atap ótti. Sebebi bolashaqta qazaqstandyqtardyń zeınetaqysynyń negizgi bóligi ózderiniń jınaǵyna táýeldi bolady.

«Eger búgin barlyq jınaqty jumsap qoısaq, erteń memleketke nemese balalarǵa táýeldi bolý qaýpi artady. Al jetkilikti qarajat saqtalsa, adam zeınet jasynda da qarjylyq táýelsizdigin joǵaltpaıdy», – dedi ol.

Ekonomısiń pikirinshe, jetkiliktilik sheginiń kóterilýi «aqshany tartyp alý» emes, azamattardyń óz bolashaǵyna jasaǵan ınvestısıasy retinde qarastyrylýy tıis.