InfoHub Logo

Qazaqstannyń jańa Konstıtýsıasy jumys berýshi men memlekettiń qyzmetkerler aldyndaǵy jaýapkershiligin eń joǵary deńgeıde bekitedi. Bul týraly Premer-mınıstrdiń orynbasary – Mádenıet jáne aqparat mınıstri Aıda Balaeva Óskemendegi «Qazsınk» JSHS ujymymen kezdesýde aıtty.

Bul týraly Infohub.kz aqparat agenttigi habarlaıdy.

Konstıtýsıadaǵy eńbek quqyqtary

Aıda Balaeva metalýrgıa salasynyń Qazaqstan ekonomıkasyndaǵy mańyzdy rólin atap ótip, jańa Ata zańnyń eńbek, qaýipsizdik jáne qyzmetkerlerdiń áleýmettik qorǵalýy máselelerin qamtıtynyn basa aıtty. Ol 15 naýryzda ótetin referendýmnyń mańyzdylyǵyna toqtaldy.

«Ata zańda eńbek etý quqyǵy, qaýipsiz eńbek jaǵdaılary jáne ádil eńbekaqy alý quqyǵy bekitiledi. Bul normalar óndiristik jaraqatty azaıtýǵa jáne qyzmetkerlerdiń densaýlyǵyn saqtaýǵa baǵyttalǵan. Iaǵnı, eńbek jaǵdaıy úshin jumys berýshi men memlekettiń jaýapkershiligi eń joǵary deńgeıde Konstıtýsıada bekitiledi. Negizgi ózgeris retinde Konstıtýsıada basty orynǵa azamat – onyń quqyqtary men qajettilikteri, eńbegi qoıylǵanyn kórýge bolady», – dedi vıse-premer.

Sıfrlyq dáýirdegi quqyq qorǵaý

Májilis depýtaty Sergeı Ponomarev jańa Konstıtýsıa jobasynyń sıfrlyq dáýirde adam quqyqtaryn, sonyń ishinde ınternettegi hat almasý men zıatkerlik menshikti qorǵaýdy kúsheıtetinin jetkizdi. Memleket jeke derekterdi konstıtýsıalyq deńgeıde qorǵaýǵa alatyny aıtyldy.

Ujymnyń referendýmǵa qatysýy

«Qazsınk» kompanıasynyń Óskemen metalýrgıa kesheniniń dırektory Tımýr Toqjigitov referendýmnyń eldiń strategıalyq damýy úshin mańyzdy ekenin atap, ujymnyń mindetti túrde daýys beretinin málimdedi. Mys zaýytynyń aǵa sheberi Aslan Turǵambaev ta jańartylǵan Konstıtýsıanyń quqyqtar men áleýmettik kepildikterdi nyǵaıtatynyna senim bildirdi.