InfoHub Logo

Aktrısa Aıgúl Imanbaeva 22 jasynda alǵashqy nekesin buzyp, alty-jeti aılyq sábıimen anasynyń úıine oralǵandaǵy qıyndyqtardy jasyrmaı aıtty. Bul jaǵdaı onyń ómirge degen kózqarasyn túbegeıli ózgertkenin moıyndady.

Bul týraly Infohub.kz aqparat agenttigi habarlaıdy.

Turmystyq qıyndyqtar men namys

Aktrısanyń aıtýynsha, balalyq shaǵynda otbasynda eshqandaı materıaldyq qıyndyq bolmaǵan. Anasy býhgalter bolyp jumys istep, otbasyn asyraǵan. Alaıda, 90-jyldardaǵy qıyn kezeńde kámpıttiń ózin úlestirip jegenin eske aldy. Alǵashqy nekesiniń úzilýi onyń ómirindegi eń úlken synaq boldy.

«Namys meni óltirdi. «Myna Gúlsimniń qyzy ajyrasyp kelipti. Qolyndaǵy balasymen kelipti» degen sózderdi estimeý úshin Almatyǵa kelip, tórt-bes jerde jumys istedim. Joqtyqty da sol kezde kórdim», - deıdi Imanbaeva.

Ómir sabaǵy

Aıgúl Imanbaeva sol kezdegi qıyndyqtardy óz kúshimen eńserýge tyrysqanyn aıtty. Birneshe jerde qatar jumys isteý oǵan jaýapkershilikti sezinýge, bar men joqtyń qadirin túsinýge úıretken. Aktrısa bul tájirıbeni ómirine úlken sabaq bolǵanyn atap ótti.

«Adaspaımyn dep júrip adastym, biraq sol adasý arqyly óz jolymdy taptym. Qıyndyqty jeńdim. Ashtyq pen toqtyqtyń, barshylyq pen joqshylyqtyń qadirin sol kezde ǵana uqtym», - dep oıyn qorytyndylady ol.

Aıgúl Imanbaeva kim?

Aıgúl Serikqulqyzy Imanbaeva – 1977 jyly 15 naýryzda Jambyl oblysynda dúnıege kelgen qazaqstandyq ánshi, aktrısa, prodúser. Temirbek Júrgenov atyndaǵy óner akademıasyn bitirgen. Ǵabıt Músirepov atyndaǵy akademıalyq teatrdyń aktrısasy, «Habar» arnasyndaǵy «Uıat bolmasyn» baǵdarlamasynyń júrgizýshisi retinde tanymal. Kıno salasynda da belsendilik tanytyp, birneshe fılmde basty rólderdi somdaǵan. 2006 jyly «Daryn» memlekettik jastar syılyǵynyń laýreaty, 2011 jyly jeke «A.I» drama teatryn ashqan. Qazaqstannyń eńbek sińirgen qaıratkeri.