InfoHub Logo

Keńes Odaǵy Batyrynyń uly Anatolıı Bırúkov bir kezderi Máskeý men Chehov qalalarynyń turǵyndaryn úreıde ustaǵan qylmysker retinde tarıhta qaldy. Keıin "balalar ańshysy" degen laqap atqa ıe bolǵan ol qysqa ýaqyt ishinde birneshe sábıdiń ómirin qıdy. Qylmyskerdi izdeýge Máskeý polısıasynyń úlken kúshi jumyldyryldy.

Bul týraly Infohub.kz aqparat agenttigi habarlaıdy.

Balalyq shaqtaǵy jaraqat taǵdyryn ózgertti

Anatolıı Bırúkov 1939 jyly Máskeý oblysyndaǵy Chehov qalasynda dúnıege kelgen. Onyń ákesi Nıkolaı Bırúkov Uly Otan soǵysynyń ardageri, general-leıtenant ári Keńes Odaǵynyń Batyry bolǵan. Ákesi ulyna qatal tártippen tárbıe berip, bolashaǵynan úlken úmit kútken edi.

Alaıda, segiz jasynda ákesiniń patrondaryn bólshektemek bolǵan kezde bolǵan jarylys Anatolııdiń taǵdyryn túbegeıli ózgertti. Ol aýyr jaraqat alyp, betinde ómir boıy ketpeıtin tyrtyq qaldy. Keıin bul tyrtyqty ol adamdarǵa qaınaǵan sýdan kúıip qalǵanynan dep túsindirip júrdi.

Tuıyqtyq pen qylmysqa aparar jol

Osy oqıǵadan keıin aınalasyndaǵylardyń mazaǵy kóbeıip, Anatolıı tuıyq bolyp, adamdarmen aralasýdan qashqaqtap, óz álemine jabylyp qaldy. Degenmen, mektepte jaqsy oqyp, muǵalimderiniń maqtaýyna ıe boldy. Ákesiniń áskerı jolyn jalǵastyrmaı, slesar mamandyǵyn tańdap, qurylys salasynda eńbek etti, otbasyn quryp, eki qyzdyń ákesi atandy.

Qaýipti áreketterdiń bastalýy

Bırúkovtyń balalarǵa qatysty alǵashqy qaýipti áreketteri 1971 jyly baıqala bastady. Sol kezde ol balalar emhanasynyń janynda turǵan arbamen birge sábıdi alyp ketýge árekettendi. Anasy der kezinde baıqap, kómek suraǵannan keıin er adam ustaldy. Alaıda, ol bul áreketin "qaraýsyz qalǵan balaǵa sabaq bolsyn dep jasadym" dep túsindirip, polıseılerdi sendirip, bosap ketti.

Bir jyldan keıin ol taǵy da balany urlamaq bolǵan kezde qolǵa túsken. Keı derekterde úsh jylǵa sottalǵany aıtylsa, basqa málimetterde jazadan qutylyp ketkeni kórsetiledi. Osy oqıǵadan keıin áıeli onymen ajyrasyp ketti.

Máskeýdi dúrliktirgen qylmystar

1977 jyldyń kúzinde Máskeýde jantúrshigerlik qylmystar tizbegi bastaldy. Alǵashqy qurbandardyń biri úsh aılyq sábı boldy. Qylmysker balany qaraýsyz turǵan arbadan alyp ketip, keıin ony óltirip tastady. Araǵa birneshe kún salyp taǵy bir sábı joǵaldy, bir aıdan keıin onyń denesi tabyldy. Tergeýshiler eki oqıǵanyń da bir adamnyń qolymen jasalǵanyn túsingenimen, naqty kúdiktini birden anyqtaı almady.

Keıin taǵy bir bala urlanyp, kóp uzamaı óli kúıinde tabyldy. Osydan keıin Máskeýde ata-analar balalaryn qaraýsyz qaldyrýdan qorqyp, qala turǵyndary arasynda úreı kúsheıdi.

İzdeý men tutqyndaý

Polısıa kúdiktiniń fotorobotyn jasap, izdeý jumystaryn kúsheıtti. Muny sezgen Bırúkov qylmystaryn týǵan jeri Chehovta jalǵastyrýǵa tyrysty. Onda da eki sábı joǵalyp, keıin óli kúıinde tabylǵan.

1977 jyldyń 21 qazanynda ol taǵy bir balany alyp qashpaq bolǵan kezde anasy baıqap qalyp, aıǵaı kóterdi. Qýǵynnan qutylý úshin Bırúkov sábıdi jerge tastap, qashyp ketti. Abyroı bolǵanda, bala aman qaldy. Al kýágerler qylmyskerdiń túrin anyq kórip úlgergen.

Osy oqıǵadan keıin jasalǵan fotorobot tergeýshilerdi naqty kúdiktige alyp keldi. Kóp uzamaı polısıa Bırúkov jumys isteıtin qurylys mekemesine baryp, onyń jeke basyn anyqtady. Qylmysker sol kúni óz úıinde ustaldy.

Sot jáne jaza

Tergeý kezinde Anatolıı Bırúkov bes sábıdi óltirgenin moıyndap, jasaǵan qylmystaryn egjeı-tegjeıli aıtyp berdi. Alǵashynda Bırúkov ákesi ózin qutqaryp qalady dep sengen. General Nıkolaı Bırúkov ta bastapqyda ulynyń mundaı aýyr qylmysqa barǵanyna sengisi kelmeı, oǵan tájirıbeli advokat jaldaǵan. Biraq sot barysynda dálelder tolyq rastalǵannan keıin general kópshilik aldynda ulynan bas tartty.

Sot-psıhıatrıalyq saraptama Anatolıı Bırúkovty esi durys dep tanydy. Sot ony ólim jazasyna kesti. Qylmysker birneshe ret óz-ózine qol jumsamaq bolǵanymen, áreketteri sátsiz aıaqtaldy. Keıin túrli organdarǵa keshirim surap ótinish jazǵan, biraq bári qanaǵattandyrylmady.

Anatolıı Bırúkov 1979 jyldyń 24 aqpanynda atyldy. Ol 40 jasqa tolǵannan keıin kóp uzamaı ólim jazasyna kesilgen.