InfoHub Logo

Qazaqstannyń Halyq ártisi, tanymal ánshi Maqpal Júnisova jankúıerlerine qýanyshty jańalyq jetkizdi. Ol 8 naýryz – Halyqaralyq áıelder kúnine oraı Almatydaǵy Respýblıka saraıynda ótetin eki birdeı jeke konsertiniń bıletteri tolyq satylyp ketkenin málimdedi.

Bul jaǵymdy jańalyqty ánshi óziniń áleýmettik jelidegi paraqshasynda bólisip, tyńdarmandaryna alǵys aıtty. «Allaǵa myń shúkirler, 8 naýryzdaǵy eki konsertke de bıletter ótip ketipti. Jankúıerlerime kóp raqmet. Amandyqta kezdeseıik, qurmetti aǵaıyn!» – dep jazdy ol.

Jeli qoldanýshylary bul jańalyqty jyly qabyldap, ánshiniń konsertterin asyǵa kútetinderin bildirdi.

Bul týraly Infohub.kz aqparat agenttigi habarlaıdy.

Maqpal Júnisovanyń óner joly

Maqpal Muhamedıarqyzy – qazaq estradasynyń kórnekti tulǵalarynyń biri. 1963 jyly Qaraǵandy oblysynyń Qarqaraly aýdanynda týǵan. 1981 jyldan beri «Qazaqkonsert» birlestiginiń solısi retinde sahnada.

Ol kóptegen halyqaralyq baıqaýlardyń bas júldesin ıelengen. 22 jasynda Qazaqstannyń eńbek sińirgen ártisi, al 31 jasynda Qazaqstannyń Halyq ártisi ataǵyn alǵan.

Ál-Farabı atyndaǵy Qazaq ulttyq ýnıversıtetin bitirgen óner ıesi – profesor, memlekettik jáne halyqaralyq marapattardyń ıegeri. Ol qazaq estradasynda lırıkalyq soprano daýsymen, halyq ánderi, romans jáne jaz baǵytyndaǵy ánderimen tanymal.

Búginde «Qazaq estradasynyń prımadonnasy», «Orta Azıa bulbuly» atanǵan ánshiniń konsertterine degen joǵary suranys – onyń el aldyndaǵy bedeli men uzaq jylǵy eńbeginiń aıǵaǵy.