InfoHub Logo

Almaty oblysyndaǵy jeke janýarlar prıýtteriniń ıeleri jerleriniń memleket tarapynan tartyp alyný qaýpi tónip turǵanyn aıtyp shaǵymdandy. Sebebi retinde jerdiń maqsatsyz paıdalanylýy kórsetilýde. Eger bul sheshim qabyldansa, myńnan astam ıttiń nemese mysyqtyń taǵy da kóshede qalýy yqtımal.

Bul týraly Infohub.kz aqparat agenttigi habarlaıdy.

Prıýt ıesiniń qıyndyǵy

ZooHome prıýtynyń basshysy Evgenıa Mamaeva bes jyl buryn 10 mıllıon teńgege eki gektar jer satyp alyp, tastaq janýarlarǵa kómek qolyn sozýdy bastaǵan. Qazirgi tańda janýarlardyń tamaǵyna, dári-dármegine jáne kútimine aı saıyn shamamen segiz mıllıon teńge jumsalady.

«Kúnine shamamen 100 myń teńge tek tamaqqa ketedi. Tórt qyzmetkerdiń jalaqysy aıyna bir mıllıon teńgege jýyqtaıdy. Komýnaldyq qyzmetter – 200-250 myń teńge. Oǵan qosa, qurt-qumyrsqaǵa qarsy preparattar, vaksınalar, kene men búrgeden óńdeý sıaqty shyǵyndar bar. Qazirgi kezde barlyq prıýtterde jınaq óte az. Sondyqtan bizge nesıe alýǵa nemese qaryzǵa aqsha suraýǵa týra keledi», - deıdi Evgenıa Mamaeva.

Zooqorǵaýshynyń aıtýynsha, bılik jerdi aýyl sharýashylyǵy maqsatynda paıdalaný qajettigin alǵa tartyp, ony tartyp almaqshy. Alaıda, Mamaeva bul jerdi aýyl sharýashylyǵyna da qoldanýǵa daıyn ekenin aıtady.

«Bizge eshqandaı balama nemese basqa jer usynylmaıdy. Tek jerdi tartyp alǵysy keledi. Sot isinde biz barlyq qurylystardy óz esebimizden buzýymyz kerek dep jazylǵan. Biz jaǵdaıdy túzetýge tyrysamyz. Jerdi maqsatty paıdalanýdan bas tartpaımyz. Qazirdiń ózinde jylyjaılar satyp alyndy, ósimdik otyrǵyzý týraly kelisim bar. Árıne, jerdiń bir bóligin janýarlarǵa arnaýǵa májbúrmiz», - deıdi ol.

Mamaevanyń aıtýynsha, jer zańnamasynda prıýt nemese pıtomnık úshin arnaıy maqsatty paıdalaný túri qarastyrylmaǵan. Ol tipti janýarlardy basqa jerge kóshirgen kúnniń ózinde, olardy budan da áketýi múmkin dep qorqady.

Basqa prıýttegi jaǵdaı

Almaty oblysyndaǵy taǵy bir prıýtte de osyndaı jaǵdaı oryn alǵan. Onyń ıesiniń aıtýynsha, sheneýnikter sý zańnamasyn buzǵany úshin jerdi tartyp almaqshy. Sebebi retinde ýchaskeniń ózenge tym jaqyn ornalasqany kórsetilgen. Alaıda, eshqandaı tekserý júrgizilmegenin zooqorǵaýshy málimdeıdi.

«Túngi saǵat úsh shamasynda maǵan kúzetshim habarlady. Ol bizdegi jalǵyz qyzmetker. Ol betperde kıgen beıtanys adamdardyń ony soqqyǵa jyqqanyn aıtty. Olar prıýtke basyp kirip, ony armatýramen uryp soqqan. Onyń qoly men aıaǵyn syndyrǵan. Tańǵy altyda kelgenimde, bizdiń jaqqa taýdan atý bastaldy. Men ulym ekeýmiz turǵanbyz. Sebebi bireýge qymbatqa túsetin, úlken ári ádemi ýchaske kerek bolǵan. Jaqynda munda trassa salynady. Sol sebepti mundaı qyzyǵýshylyq týyndap otyr. Itterdi úılerińizge taratyp alyńyzdarshy. Ótinemin. Áıtpese, olardy óltiredi», - deıdi «Belyı Bım» prıýtynyń basshysy Natalá Sýljık.

Oblystyq jer resýrstaryn basqarý komıteti sot prosesine silteme jasap, jaǵdaıǵa qatysty pikir bildirýden bas tartty. Aıta keteıik, Qazaqstannyń basqa óńirlerindegi prıýtter de jerlerin jappaı tárkileý týraly shaǵymdar túsken.