InfoHub Logo

Almatydaǵy №7 Qalalyq klınıkalyq aýrýhananyń emhanasynda Dúnıejúzilik aýyz qýysy densaýlyǵy kúnine oraı mańyzdy shara uıymdastyryldy. Bul týraly Infohub.kz aqparat agenttigi habarlaıdy.

Aksıany dáriger-stomatolog Araılym Ábýseıitova ótkizdi. «Bolashaqqa saý tispen» atty shara aıasynda tirkelgen turǵyndarǵa aýyz qýysyn kútý erejeleri týraly aqparattyq materıaldar taratyldy.

Tis tazalaýdyń durys ádisteri men profılaktıka

Sharada tis tazalaýdyń durys tehnıkasyna, gıgıenalyq rásimderdiń turaqtylyǵyna, sondaı-aq tis jegi men qyzyl ıek aýrýlarynyń aldyn alýǵa erekshe nazar aýdaryldy.

Mamandar tisti kúnine eki ret – tańerteń as ishkennen keıin jáne keshke uıyqtar aldynda, kem degende 2-3 mınýt ýaqyt bólip tazalaý kerektigin eske saldy. Barlyq tis betterin, tildi tazalaý, tis jibin qoldaný jáne tis shetkasyn ár úsh aı saıyn aýystyrý mańyzdy ekeni aıtyldy.

Balalarǵa arnalǵan erekshe keńester

Balalar úshin bul usynystar oıyn túrinde berildi. Olarǵa tis shetkasyn 45 gradýs buryshpen ustaý erejesi de úıretildi.

Deni saý tis úshin dıeta men kútim

Sonymen qatar, turǵyndarǵa táttini shekteý, rasıonǵa kóbirek kókónis pen sút ónimderin qosý, ár tamaqtan keıin aýyzdy shaıý usynyldy.

Medısına qyzmetkerleri mundaı aksıalardyń densaýlyq mádenıetin qalyptastyrýǵa jáne stomatologıalyq aýrýlardyń aldyn alýdyń mańyzdylyǵy týraly halyqtyń habardarlyǵyn arttyrýǵa yqpal etetinin atap ótti.