InfoHub Logo

2 mamyrda QR Saýda jáne ıntegrasıa mınıstri Arman Shaqqalıev Almatyǵa jumys saparymen kelip, bazarlardy jańǵyrtý máseleleri boıynsha bıznes ókilderimen kezdesti.

Kezdesý barysynda jańǵyrtý kezindegi kedergiler men olardy sheshý joldary talqylanyp, mınıstr Almatynyń ishki saýdadaǵy jetekshi rólin erekshe atap ótti. Bıylǵy qańtar-naýryz aılarynda qalada ishki saýda aınalymy 5,1 trln teńgege jetip, bul respýblıkalyq kólemniń 36,2 paıyzyn qurady.

Mınıstrdiń aıtýynsha, Almatyda 59 bazar bar, olardyń 70%-y jańǵyrtylǵan. Ótken jyly alty bazarǵa modernızasıa jasalsa, bıyl jyl sońyna deıin taǵy 10 bazar jańǵyrtylmaq. Alaıda, altaýy boıynsha kesteden keshigý qaýpi bar. Buǵan jer paıdalaný shekteýleri, tehnıkalyq sharttar, ákimshilik kedergiler jáne qarjylandyrý tapshylyǵy sebep.

Arman Shaqqalıev jaýapty organdar men kásipkerler arasyndaǵy úılestirýdi kúsheıtip, jobalarǵa júıeli monıtorıń júrgizýdi tapsyrdy. Sondaı-aq, barlyq bazarlar tehnıkalyq, órtke qarsy jáne sanıtarlyq talaptarǵa saı bolýy tıis ekenin eske saldy.

Mınıstr "Digital Bazar" jobasyna da toqtalyp ótti. 2024 jyldyń qarashasynan bastap iske qosylǵan bul pılottyq jobaǵa Almaty qalasy men oblysynan 7 bazar tartylyp, 4 276 klıent tirkelgen. Elektrondyq saýda, sıfrlyq tólem júıeleri jáne qarjylyq tehnologıalar saýdany ashyq ári yńǵaıly etýdi kózdeıdi.

«2026 jyldan bastap jańǵyrtýdan ótpegen bazarlar jumysyn jalǵastyra almaıdy. Qaýipsizdik, ashyqtyq jáne yńǵaılylyq – jańa saýda standartyna aınalýy tıis», – dedi mınıstr.