InfoHub Logo

Qazaqstannyń Premer-mınıstriniń orynbasary Ermek Kósherbaev Almatyda reseılik saıasatker Vladımır Jırınovskııge eskertkish ornatý máselesine qatysty pikir bildirdi. Onyń aıtýynsha, mundaı jospar joq, dep habarlaıdy Infohub.kz.

Bul málimdemeni Kósherbaev Májiliste ótken brıfıńte jasady. Jýrnalıser odan Almatyda Jırınovskııdiń monýmenti ornatylady degen aqparattyń ras-ótirigin surady. Sońǵy ýaqytta bul taqyryp qazaqstandyq jáne reseılik BAQ-ta keńinen talqylanǵan bolatyn.

— Siz buǵan deıin Qazaqstannyń Reseıdegi elshisi qyzmetin atqardyńyz, al qazir mádenıet pen óner salasyn qadaǵalaısyz. Almatyda Jırınovskııge eskertkish ornatý múmkin be? — dep surady jýrnalıs.

— Joq, árıne! – dep qysqa jaýap berdi Kósherbaev.

— Nelikten? – dep naqtylaı tústi tilshi.

— Óıtkeni joq, – dep túıindedi vıse-premer.

Osydan keıin jýrnalıser naqtylaý maqsatynda qosymsha suraq qoıǵanymen, Kósherbaev: "Joq degen soń joq!" – dep, taqyrypty odan ári talqylaýdan bas tartty.

Jırınovskıı esimi nege daýly?

Reseılik saıasatker Vladımır Jırınovskıı ómirinde birneshe ret Qazaqstanǵa qatysty daýly pikirler aıtyp, synǵa ushyraǵan. Onyń keıbir málimdemeleri Qazaqstan qoǵamynda teris reaksıa týdyryp, bılik ókilderi de bul máselege aralasýǵa májbúr bolǵan edi.

Jırınovskııdiń Qazaqstanda eskertkishine qatysty aqparat taraǵanda, bul qoǵamda úlken rezonans týǵyzdy. Kóptegen azamattar áleýmettik jelilerde buǵan qarsylyq bildirip, mundaı qadam eldiń egemendigi men tarıhı jadysyna qaıshy keletinin jazdy.

Qazirgi ýaqytta resmı oryndar bul aqparatty resmı túrde joqqa shyǵaryp otyr. Qazaqstan bıligi mundaı bastamaǵa jol bermeıtinin ashyq málimdedi.