InfoHub Logo

Almatyda 30 sáýirde Qazaqstandaǵy alǵashqy krematorıı ashyldy. Bul nysan Alataý aýdanyndaǵy patologoanatomıalyq búronyń janyna ornalastyrylǵan. Jańa krematorııdiń qurylymy, qyzmeti, rásimderi, baǵasy jáne máıittiń kúlin nege jerge shashýǵa bolmaıtyny týraly tolyq málimetti Tengrinews.kz materıalynan oqyńyzdar.

Bul týraly Infohub.kz aqparat agenttigi habarlaıdy.

Krematorııdiń ózi birneshe bólikke bólingen: máıit qabyldaý zaly, tońazytqysh kameralary bar saqtaý zaly, seksıalyq zal jáne kremasıa peshteri ornalasqan bólme. Sonymen qatar, týystary kremasıa prosesin baqylaı alatyn arnaıy bólme de qarastyrylǵan.

Qazaqstandaǵy alǵashqy krematorııdiń erekshelikteri

Munda Chehıada jasalǵan eki kameraly pesh ornatylǵan. Olar tabıǵı gazben jumys isteıdi jáne temperatýrasy 800-den 1100 gradýsqa deıin jetedi. Qyzmetkerlerdiń aıtýynsha, bul jabdyq zıandy zattardy ekinshi kamerada jaǵyp jiberetindeı etip jasalǵan, sondyqtan qorshaǵan ortaǵa eshqandaı qaýip tóndirmeıdi.

Kremasıa aldynda máıitti jýyp, kıindirip, grım jaǵady. Eger qajet bolsa, kardıostımýlátor sıaqty akýmýlátorly qurylǵylar alynyp tastalady. Kremasıa tek aǵash tabytta júrgiziledi, onyń quramynda metal bólshekteri, zıandy lakter nemese sıntetıkalyq mata bolmaýy tıis.

Kremasıa prosesi eki saǵatqa deıin sozylady. Odan keıin qalǵan súıek qaldyqtary untaqtalyp, kúl kúıinde týystaryna tabystalady.

Kimderdi kremasıalaýǵa bolady?

Qazirgi ýaqytta tek óz ólimin kremasıalaý týraly jazbasha jáne zańdy túrde ósıet qaldyrǵan azamattardy ǵana kremasıalaýǵa bolady. Eger ólim qylmystyq sıpatta bolsa, bul rásimge tyıym salynady.

Kremasıanyń quny qansha?

Qazirgi tańda kremasıa qyzmetiniń quny – 240 myń teńge. Alaıda, bul tek kremasıanyń quny. Máıitti tasymaldaý, saqtaý jáne daıyndaý sıaqty qosymsha qyzmetter bólek tólenedi.

Kúldi qaıda saqtaýǵa bolady?

Qazaqstanda máıittiń kúlin jerge shashýǵa zańmen tyıym salynǵan. Almatyda ázirge kolýmbarıı (kúl qoıatyn arnaıy oryn) joq, biraq ákimdik bul máseleni qarastyryp jatyr. Kúldi ádette arnaýly ýrnaǵa salyp, kolýmbarııge nemese otbasylyq zıratqa qoıady.