InfoHub Logo

Almatyda Al-Farabı dańǵylynda úsh adamnyń ómirin qıǵan jol apatyna kináli Zeekr kóliginiń júrgizýshisi tergeý ızolátoryna jiberildi. Buǵan deıin ol aýrýhanada jatqan bolatyn.

Bul týraly Infohub.kz aqparat agenttigi habarlaıdy.

Oqıǵanyń mán-jaıy

Jol apatyna sebepker bolǵan Zeekr avtokóliginiń júrgizýshisi qazir tergeý ızolátorynda. Ol buǵan deıin polısıanyń baqylaýymen medısınalyq mekemede em qabyldap jatqan. Sot sanksıasymen oǵan qatysty qamaýǵa alý bultartpaý sharasy tańdalǵan.

Polısıanyń habarlaýynsha, kúdikti tergeý aıaqtalǵansha qamaýda bolady.

Apattyń hronologıasy

Naýryzdyń 21-ine qaraǵan túni Al-Farabı dańǵyly men Mendiqulov kóshesiniń qıylysynda Zeekr kóligi qarsy jolaqqa shyǵyp, Mercedes avtokóligimen soqtyǵysqan. Saldarynan 29 jastaǵy Mercedes júrgizýshisi men 20 jáne 22 jastaǵy eki jolaýshy oqıǵa ornynda kóz jumdy.

Zeekr kóliginiń júrgizýshisi aman qaldy, biraq jaraqat alǵandyqtan aýrýhanaǵa jatqyzyldy. Sáýirdiń 26-synda tergeý soty ony qamaýǵa aldy. Apat kezinde júrgizýshiniń jeńil dárejedegi alkogóldik masań kúıde bolǵany anyqtaldy.

Kúdiktige Qylmystyq kodekstiń 345-baby 4-bóligi boıynsha, ıaǵnı «Abaısyzda eki jáne odan da kóp adamnyń ólimine ákep soqtyrǵan jol júrisi qaǵıdalaryn buzý» babymen qylmystyq is qozǵaldy. Bul bap boıynsha 10 jylǵa deıin bas bostandyǵynan aıyrý jazasy qarastyrylǵan.

Áleýmettik jelidegi nusqalar

Áleýmettik jelide apatqa sebep bolǵan jaǵdaılardyń biri retinde polısıa qyzmetkeriniń qatysýymen bolǵan kóshedegi jarys bolýy múmkin degen nusqalar paıda boldy. Bul másele boıynsha tekserýler men qyzmettik tergeýler bastaldy. İshki ister mınıstrligi Almaty qalalyq polısıa departamentiniń birqatar basshylaryn qyzmetinen bosatty.

Sheneýnikterdiń jaýaby

Osy jaǵdaıdan keıin sáýirdiń 26-synda İshki ister mınıstrligi málimdeme jasady. Mınıstrliktiń habarlaýynsha, ishki ister mınıstri Erjan Sadenovtiń buıryǵymen Almaty qalalyq polısıa departamenti bastyǵynyń syrtqy qyzmetter men jol qaýipsizdigine jaýapty orynbasary, sondaı-aq ákimshilik polısıa jáne qoǵamdyq qaýipsizdik basqarmalarynyń basshylary qyzmetinen bosatyldy.

İİM tergeý týraly jańa málimetterdi de jarıalady.

«Polısıa departamenti basshylarynyń biriniń júrgizýshisiniń áreketsizdigi faktisi boıynsha qylmystyq is qozǵaldy. Ol ýaqytsha ustaý ızolátoryna qamaldy. Qyzmettik tekserý men qylmystyq ister aıasynda barlyq mán-jaılar, sonyń ishinde buqaralyq aqparat quraldarynda taraǵan aqparattar da muqıat tekseriletin bolady», - dedi İshki ister mınıstrliginiń resmı ókili Shyńǵys Alekeshev.