InfoHub Logo

Almatydaǵy DoubleTree by Hilton qonaqúıiniń ıeligine qatysty daý jańa sıpat aldy. Kásipker Sholpan Qaraneeva nysannyń ózinen zańsyz tartyp alynǵanyn aıtyp, quqyǵyn qalpyna keltirýge tyrysýda. Oqıǵanyń astarynda qonaqúıdi memleket menshigine ótkizý kezinde oryn alýy múmkin zańsyzdyqtar jatyr.

Bul týraly Infohub.kz aqparat agenttigi habarlaıdy.

Máseleniń mán-jaıyna súıensek, kásipker buǵan deıin DoubleTree by Hilton Almaty qonaqúıin bank nesıesine salyp, Hilton franshızasyn satyp alǵan bolatyn. Alaıda pandemıa kezinde qonaqúı jumysy toqtap, qarjylyq qıyndyqtar týyndaǵan. Keıin bank lısenzıasynan aıyrylyp, qaryzdardy óndirý prosesine kolektorlyq agenttik aralasqan.

Quny mıllıardtaǵan nysan arzanǵa satylǵan

Keıinnen quny 9 mıllıard teńgeden asatyn qonaqúı áldeqaıda arzan baǵaǵa satylyp ketkeni aıtylady. Basylym dereginshe, nysan keıin Qaırat Satybaldyǵa qatysy bar kompanıalardyń baqylaýyna ótken. Kolektorlyq agenttik qonaqúı múlkin óte tómen baǵalap, ony Baidala V kompanıasyna ótkizgen. Bul kompanıa keıin nysandy Qaırat Satybaldynyń ıeligine rásimdegen. Odan keıin qonaqúı memleketke “qaıtarylǵan aktıvterdiń” qataryna engen.

Zańsyzdyq pen reıderlik aıyptary

Alaıda, kásipker Sholpan Qaraneeva men onyń advokattary bul prosestiń bári zańsyz júrgizilgenin málimdep otyr. Olar qonaqúı reıderlik jolmen tartyp alynǵan dep sanaıdy. Bul boıynsha qylmystyq is te qozǵalǵan, biraq 11 aı tergelgen is kútpegen jerden toqtatylǵan.

Qonaqúı múlkin baǵalaǵan sarapshynyń nebári birneshe kún ishinde 400 bettik esep daıyndaǵany jáne nysannyń tozý deńgeıi naqty qujatsyz, “kózben shamalap” anyqtalǵany daý týdyrýda.

Hilton brendiniń taǵdyry

Daýdyń taǵy bir qyry – Hilton brendine qatysty. Kásipker advokattarynyń aıtýynsha, halyqaralyq Hilton ataýyn paıdalaný quqyǵy áli de zańdy franshıza ıesinde qalýy tıis. Qonaqúı memleketke brendpen birge berilgendeı kórsetilgenimen, mundaı quqyqty eshkim zańdy túrde ótkize almaǵan.

Exclusive.kz bul oqıǵany “Eski Qazaqstannyń” ádisteri áli de joıylmaǵanynyń belgisi retinde baǵalap otyr. Bızneske qysym kórsetý, múlikti kúmándi jolmen qaıta bólý jáne qylmystyq isterdiń aıaqsyz qalýy qoǵamda kóptegen suraqtar týǵyzýda.