InfoHub Logo

Sońǵy kezderi Almaty turǵyndary qala aýlalaryndaǵy torǵaılardyń azaıyp ketkenine nazar aýdaryp, áleýmettik jelide bul týraly pikir bildirýde. Keıbir turǵyndar bul qubylysty jándikterdiń kóbeıýimen baılanystyrady.

Bul týraly Infohub.kz aqparat agenttigi habarlaıdy.

Turǵyndar ne baıqady?

Jelidegi bir jazbada Almatyda torǵaılardyń joǵalyp ketkeni aıtylǵan. Avtordyń aıtýynsha, buryn bul qustar kóshelerde, saıabaqtarda, tipti aýlalarda da kóp bolǵan, al qazir olardy sırek kórýge bolady. Sonymen qatar, torǵaılar azaıǵannan keıin jándikterdiń, sonyń ishinde qońyzdar men órmekshilerdiń kóbeıgenin baıqaǵanyn jazǵan.

Pikir qaldyrǵan qala turǵyndary ártúrli boljamdar usyndy. Bireýler torǵaılardy qalada kóbeıip ketken maınalardyń yǵystyryp shyǵarǵanyn aıtsa, endi bireýler qustarǵa jem-shóp qoıýǵa keńes berdi.

Ornıtolog ne deıdi?

Ornıtolog Vıktorıa Kovshar Almatyda torǵaılardyń joǵalyp ketkeni týraly aıtýdyń durys emes ekenin atap ótti. Onyń aıtýynsha, turǵyndar kóbinese qalanyń ortalyq aýdandary men tyǵyz kópqabatty úıler ornalasqan aımaqtardy meńzeıdi.

«Shynynda, torǵaılar qaladan joǵalǵan joq. Tek olarǵa jaıly mekenderdi tańdap, ıaǵnı aǵashtary men butalary kóp, jeke sektor aýmaqtaryna kóbirek qonys aýdardy. Beton qabyrǵalar men asfálttalǵan kósheler arasynda olarǵa jasaıtyn jaǵdaı joq. Qalanyń ortalyǵyndaǵy jaǵdaı ózgerdi, sondyqtan qustarǵa yńǵaıly jerlerge aýysty», — deıdi maman.

Jándiktermen kim kúresedi?

Mamannyń aıtýynsha, qaladaǵy jándikterdiń sanyn retteýde basqa qustar da mańyzdy ról atqarady. Mysaly, maınalar iri jándiktermen jaqsy kúresse, qalanyń basty «sanıtary» — úlken sınısalar. Bul qustar qalanyń barlyq jerinde kezdesedi jáne tek jándiktermen qorektenetindikten, olar jándiktermen kúreste negizgi kómekshi bolyp sanalady.