InfoHub Logo

Almatydaǵy tramvaı deposynyń taǵdyry on jyldan beri belgisiz kúıinde qalyp otyr. 2015 jyly eki iri jol apatynan keıin toqtatylǵan tramvaı qozǵalysy qalanyń kóshelerinen múldem joǵalyp ketti. Keıin bul sheshimdi halyqtyń tramvaıdy paıdalanbaýymen baılanystyrdy. Alaıda, tramvaıdy qaıtarý týraly áńgimeler áli kúnge deıin tolastar emes.

Bul týraly Infohub.kz aqparat agenttigi habarlaıdy.

Tramvaıdy qaıtarý jospary jáne deponyń jaǵdaıy

2025 jyly «Almatygenplan» ǵylymı-zertteý ınstıtýty tramvaıdy Tóle bı kóshesine qaıtarý jáne ony áýejaıǵa deıin uzartý josparyn jarıalady. Bul joba aıasynda burynǵy tramvaı deposyn qoǵamdyq orynǵa, ıaǵnı saıabaq, murajaı, fýdkort jáne shyǵarmashylyq alańdary bar ortalyqqa aınaldyrý kózdelgen bolatyn.

Alaıda, on jylǵa jýyq ýaqyt ótse de, bul aýmaq áli kúnge deıin qańyrap bos tur. Tek bir ǵımaratty jastar ortalyǵy ıelengen. Qazirgi tańda depo aýmaǵynda qıraǵan qabyrǵalar, qurylys qaldyqtary, eski relster men qańyraǵandyq belgileri kóz úıretedi. Keıbir jerlerde aýmaqtyń qorǵanysy nashar, ashyq qaqpa arqyly ishke kirýge bolady.

Aldaǵy josparlar men resmı jaýap

Almaty qalasynyń qurylys basqarmasy bul nysan boıynsha kópfýnksıonaldy qoǵamdyq ortalyq salýǵa memlekettik saraptamanyń oń qorytyndysy bar ekenin habarlady. Alaıda, jumystyń bastalý merzimi men jobanyń quny týraly naqty aqparat berilmedi. Bul jaǵdaı, ádettegideı, josparlardyń qaǵaz betinde qalyp qoıatynyn kórsetse kerek.

Almatydan tramvaılar nege alynyp tastaldy?

Almatyda tramvaı qozǵalysy 1937 jyly ashylǵan. 1990 jyldardyń ortasynan bastap tramvaı marshrýttary qysqara bastady. Sońǵy eki marshrýt – tórtinshi jáne altynshy – 2015 jylǵy birneshe jol apatynan keıin toqtatyldy. Atap aıtqanda, 21 qyrkúıekte Shevchenko men Masanchı kósheleriniń qıylysynda tejegishi isten shyqqan tramvaı 17 kólikti soǵyp, bes adam zardap shekken. Úsh aptadan keıin Seıfýllın men Makataev kósheleriniń qıylysynda taǵy bir osyndaı apat boldy.

2015 jyldyń qazan aıynda qala ákimdiginiń sheshimimen tramvaı deposynyń jumysy toqtatyldy. Sol kezde qalada 14 tramvaı bolǵany, onyń segizi №4, altaýy №6 baǵytynda júrgeni aıtyldy. Bul kólikter kúnine orta eseppen tórt myń jolaýshy tasymaldaǵan.

2017 jyly tramvaı joldaryn bólshektep, 77 mıllıon teńgege satý josparlanǵan. 2018 jyly taǵy 30 shaqyrym relsti bólshekteý kózdeldi. Sol kezdegi Almaty qalasynyń ákimi Baýyrjan Baıbek tramvaılardyń halyqqa qajetsiz bolǵanyn aıtqan edi: «Tramvaılarǵa eshkim minbedi. Bizde bar bolǵany eki baǵyt qalǵan edi, olarǵa da kúnine alty tramvaı ǵana shyǵatyn. Alty tramvaıǵa eshkim minbedi. Biraq jabyla bastaǵanda, bári «tramvaılar qaıda ketti?» dep suraı bastady».

2018 jyly Almatydan 13 tramvaı vagony Óskemen qalasyna 118 mıllıon teńgege satyldy. Al sońǵy úsh tramvaı vagony 2,2 mıllıon teńgege metal synyǵy retinde satylyp ketti. Olar depo ornynda salynatyn qoǵamdyq keńistiktiń kórki bolýy da múmkin edi.

Keıinnen bul aýmaqqa qonaq úı salý jospary da aıtyldy. Biraq qala ákimdigi bul jerdiń úsh ýchaskege bólingenin, onyń biri jeke menshikte ekenin túsindirdi. 2021 jyly ınvestorlar Depo Evolution Park jobasynan bas tartty. 2022 jyly qala ákimi Erbolat Dosaev 2023 jyldan bastap shyǵarmashylyq ortalyqtyń qurylysy bastalatynyn ýáde etti. Al 2024 jyly qurylys jumystarynyń 2025 jyldyń sońyna deıin aıaqtalýy josparlanǵan bolatyn.

Qazirgi tańda Qazaqstanda tramvaı tek úsh qalada – Pavlodar, Temirtaý jáne Óskemen qalalarynda ǵana bar.