InfoHub Logo

Almaty qalasynyń Medeý aýdanynda polısıa qyzmetkerleri jasóspirimderdiń zańdy ókilderinsiz túnde oıyn-saýyq oryndarynda júrgenin jáne olardyń arasynda alkogóldik ishimdikterdi tutyný faktilerin anyqtady. Bul týraly Polisia.kz saıtyna silteme jasap Tengrinews.kz habarlady.

Bul zań buzýshylyqtar túngi klýbtar men barlarda, sondaı-aq meıramhana keshenderiniń birinde tirkeldi. Polısıa árbir fakti boıynsha qoldanystaǵy zańnamaǵa sáıkes sharalar qabyldady. Mekeme ıeleri men ókilderi jasóspirimderdi belgilengen ýaqytta oıyn-saýyq oryndaryna kirgizgeni jáne olardyń qaýipsizdigin qamtamasyz etýge qatysty basqa da buzýshylyqtar úshin jaýapqa tartyldy.

Qaraý nátıjeleri boıynsha, mekemelerdiń qyzmeti alty aı merzimge toqtatyldy. Sonymen qatar, jasóspirimderdiń ata-analary men zańdy ókilderi balalardy tárbıeleý jáne baqylaý jónindegi mindetterin tıisinshe oryndamaǵany jáne túnde úıden tys jerlerde júrgeni úshin jaýapkershilikke tartyldy.

Balalardyń qaýipsizdigi – basty nazarda

«Balalar men jasóspirimderdiń qaýipsizdigi bizdiń jumysymyzdyń negizgi baǵyttarynyń biri bolyp qala beredi. Oıyn-saýyq mekemeleriniń ıeleri men ákimshiligi zań talaptaryn saqtaýǵa jáne kámeletke tolmaǵandardyń túnde júrýine jol bermeýge mindetti. Mundaı árbir fakti prınsıpti quqyqtyq baǵasyn alady. Qabyldanǵan sharalar demalys jáne oıyn-saýyq salasynda jumys isteıtin barlyq bıznes sýbektileri úshin eskertý bolýy tıis», - dedi Medeý aýdandyq polısıa basqarmasynyń bastyǵy Jánibek Shynasılov.

Polısıa jasóspirimderdiń quqyqtary men qaýipsizdigin qorǵaý salasyndaǵy zań talaptaryn saqtaý ata-analardyń da, bıznes ókilderiniń de ortaq mindeti ekenin eske saldy. Aldyn alý sharalary jalǵasady.