InfoHub Logo

Almaty oblysyndaǵy ıisti fabrıka endi qalanyń ındýstrıaldy aımaǵyna kóshiriledi. Bul sheshim jergilikti turǵyndardyń kóp jyldan bergi narazylyǵynan keıin qabyldandy. Jańa orynda kásiporyn qaǵaz, karton jáne gofroýpakovka óndirisine basymdyq beredi.

Bul týraly Infohub.kz aqparat agenttigi habarlaıdy.

Almaty qalasy kásipkerlik basqarmasynyń ókili Sultan İzden Aıdynulynyń aıtýynsha, kompanıamen kelisimshart jasalyp, jumystar bastalǵan. Fabrıkanyń Almatynyń ındýstrıaldy aımaǵyna kóshirilýi 2027 jyldyń sońyna deıin aıaqtalady dep josparlanýda.

Jańa múmkindikter men eski máseleler

Jańa orynǵa aýysqannan keıin KZ Recycling kompanıasy jylyna 115 myń tonnaǵa deıin qaǵaz jáne karton ónimderin shyǵaryp, 36,2 mlrd teńge tabys tabýdy kózdep otyr. Qazirgi fabrıkada 1,5 myńnan astam jabdyq pen tórt myńǵa jýyq negizgi qural-jabdyq bar. Alaıda, 15,9 gektar aýmaq jańa jeliler, qoımalar, tazartý ımarattary men avtomattandyrylǵan logıstıkany ornatýǵa múmkindik bermeıdi.

Turǵyndardyń narazylyǵy

Buǵan deıin Almatynyń Naýryzbaı aýdanyndaǵy turǵyndar fabrıkanyń jaǵymsyz ıisine shaǵymdanyp kelgen bolatyn. Ákimshilik jaǵynan fabrıka Almaty oblysynyń Qarasaı aýdanynda ornalasqanymen, onyń qaldyqtarynan shyqqan sasyq ıis jaqyn mańdaǵy eldi mekenderdiń tynys-tirshiligin buzyp keldi. Keıin bul ıisterge Abaı aýylynan aǵyzylǵan káriz sýlary da qosyldy.

Turǵyn úı keshenderiniń janyndaǵy qurylys

Ásirese, «Asyl Arman» jáne Alma City turǵyn úı keshenderiniń turǵyndary belsendi narazylyq bildirdi. Aıtylýynsha, Alma City turǵyn úı keshenin Qazaq Stroy kompanıasy fabrıkanyń dál janyna, sanıtarlyq aımaqqa salynǵan. Bul zańnamany óreskel buzýshylyq bolyp tabylady.

Bılik ýádesi men iske asyrylmaǵan sheshimder

Bılik ókilderi bul máseleni sheshýge ýáde bergenimen, jaǵdaı onsha ózgermedi. Osyǵan baılanysty komýnaldyq belsendiler jınalys uıymdastyryp, ózderiniń problemalaryn eske saldy. Jınalysqa Naýryzbaı aýdany ákimdigi, Almaty oblysy Qarasaı aýdany ákimdigi, qalalyq kásipkerlik basqarmasy, KZ Recycling kompanıasy, TKSH Alánsy jáne azamattyq belsendiler qatysty.

Ekologıalyq normalardyń buzylýy

TKSH Alánsynyń quqyqtyq máseleler jáne komýnaldyq qyzmettermen jumys komıtetiniń basshysy Qýat Óskenbaevtyń aıtýynsha, 2015 jyldan beri turǵyndar jaǵymsyz ıisterden zardap shegip keledi. Fabrıkanyń otstoınıgi Abaı aýylynyń 300-ge jýyq úıine qyzmet kórsetkenimen, zerthanalyq saraptama serovodorodtyń normadan 22 ese, al basqa elementterdiń myń ese asyp túskenin kórsetken. Bul ekologıalyq normalardyń eleýli buzylýy. Zaýyt buǵan deıin de birneshe ret aıyppul tólegen, tek 2024 jyly 50 mıllıon teńgege jýyq aıyppul salynǵan. Alaıda, problema áli kúnge deıin sheshimin tappaǵan.

Komýnaldyq salanyń shatasýy

Turǵyndar Abaı aýylynyń turǵyndary fabrıkanyń otstoınıgin paıdalanýdy jalǵastyratynyn aıtty. Sebebi, balama joq. Raıymbek aýyldyq okrýginiń ókili bul 300 abonentti «Asyl Arman» TKSH-na qyzmet kórsetetin «Edelveıs» JSHS jelisine qosýǵa tyrysatynyn málimdegenimen, komýnaldyq saladaǵy tolyq shatasýshylyq baıqalady.

Turǵyn úı keshenderine ruqsat berý máselesi

Alma City turǵyn úı keshenine qatysty jaǵdaı da talqylandy. Qurylys salýshyǵa zaýyt janyndaǵy sanıtarlyq-qorǵaý aımaǵyna qurylys júrgizýge qalaı ruqsat berilgeni belgisiz bolyp qaldy. Nelikten eshkim bul qurylysty toqtatpady jáne jaýapqa tartylmady degen suraqtarǵa memlekettik organdardyń ókilderi jaýap bere almady. Kásipkerlik basqarmasynyń ókili bul másele boıynsha óz quzyreti sheńberinde tolyq jaýap bere almaıtynyn, óıtkeni turǵyn úı keshenderine ruqsat berýdi kásipkerlik basqarmasy júzege asyrmaıtynyn atap ótti.