InfoHub Logo

Almatydaǵy Dostyq dańǵylynyń jóndeý jumystary turǵyndardyń narazylyǵyn týdyrdy. Jelide taraǵan sýretterde jańadan tóselgen plıtkalardyń shógip ketkeni baıqalady.

Bul týraly Infohub.kz aqparat agenttigi habarlaıdy.

Ne boldy?

Áleýmettik jelilerde Almatynyń Dostyq dańǵylynda júrgizilgen jóndeý jumystarynyń nátıjeleri týraly sýretter jarıalandy. Jańadan tóselgen plıtkalardyń shógip ketkeni turǵyndardyń ashýyn keltirdi.

Jeli qoldanýshylary óz pikirlerin bildirip, jóndeý jumystarynyń sapasyna narazylyqtaryn jetkizdi:

"Tórt aı boıy qazyp, sońynda qalaı bolsa solaı jaýyp tastady. Trambovka jasalmady. Sońǵy kúnderi eki jumysshy ǵana kórindi."

"Ótken jyly Dostyqty jarty jyl boıy qınady - turaq joq, táýlik boıy keptelis. Osyndaı úshin be?"

"Bul eń masqara jóndeý, jazdan beri sozylyp keledi. Masqara!"

Almaty ákimdiginiń jaýaby

Almaty ákimdigi turǵyndardyń narazylyǵyna jaýap berip, trotýar plıtkalarynyń shógýi ýaqytsha ekenin málimdedi.

"Dostyq dańǵylynda abattandyrý jobasy júzege asyrylýda, qurylys-montaj jumystary 2026 jyldyń mamyr aıyna deıin aıaqtalady. Podrádchık iri aǵashtardy otyrǵyzý úshin shuńqyrlardy daıyndady. Jer jumystary men jańa topyraqtyń tabıǵı shógýi nátıjesinde trotýar jabyndysynyń ýaqytsha shógýi tirkeldi", - dep habarlady qalalyq ákimdik.

Ákimdik 2025 jyldyń 5 jeltoqsanynan bastap qalpyna keltirý jumystary júrgizilip jatqanyn atap ótti.

"Jumystar tehnologıalyq normalar men topyraq tyǵyzdaý prosesterin eskere otyryp, kezeń-kezeńimen júrgizilýde", - dedi baspasóz qyzmeti.

Jergilikti atqarýshy organ jabyndyny normatıvtik jaǵdaıǵa keltirý jumystary tolyq aıaqtalǵanǵa deıin jalǵasatynyn jáne belgilengen merzimde aıaqtalatynyn aıtty.

Eske salaıyq, Dostyq dańǵylynyń rekonstrýksıasy jobasy 2025 jyly bastalǵan bolatyn. Joba quny 2,14 mıllıard teńgeni quraıdy jáne ol jalpy abattandyrýdan basqa, keńeıtilgen trotýarlar, 3630 sharshy metr velosıped joldary, kógaldandyrý, zamanaýı materıaldarmen jol bóligin qaıta qurý, jańa elektr jelilerine qosylý, shaǵyn sáýlet formalaryn ornatý, jańa jaıaý júrginshiler ótkelderi men baǵdarshamdardy qamtıdy.