InfoHub Logo

Almaty qalasynyń burynǵy bas arhıtektory Almasqan Ahmedjanov pen is boıynsha basqa da tulǵalarǵa qatysty sot otyrysy ótti. Bul joly qorǵaýshylar eks-sheneýniktiń densaýlyq jaǵdaıyn alǵa tartyp, ony úı qamaǵyna aýystyrýdy nemese basqadaı bultartpaý sharasyn taǵaıyndaýdy surady.

Bul týraly Infohub.kz aqparat agenttigi habarlaıdy.

Almasqan Ahmedjanovtyń qorǵaýshylary eks-sheneýniktiń 2 jyl 8 aıdan beri zańsyz qamaýda otyrǵanyn, óıtkeni ony ustaýdyń belgilengen merzimi ótip ketkenin aıtty. Olar Ahmedjanovtyń úshinshi toptaǵy múgedek ekenin, júrek jetkiliksizdigimen aýyratynyn jáne isti qaraýǵa kedergi keltirý nemese sottan jasyryný nıeti týraly derekter joq ekenin alǵa tartty.

Basqa aıyptalýshylardyń talaptary

İs boıynsha basqa da aıyptalýshylar – Ardaq Samambetov, Erlan Jarmuhanbetov jáne Almazhan Bakırovtyń qorǵaýshylary qylmystyq isti toqtatýdy talap etti. Advokattar buǵan deıin úkimniń buzylýyna sebep bolǵan buzýshylyqtardy prokýratýranyń áli kúnge deıin joımaǵanyn alǵa tartty. Eger isti toqtatýdan bas tartsa, qorǵaýshylar ózderiniń qorǵaýyndaǵylardy tergeý ızolátorynan bosatýdy surady. Sondaı-aq, Almazhan Bakırovtyń da úshinshi toptaǵy múgedek ekeni jáne únemi medısınalyq baqylaýdy qajet etetini aıtyldy.

Sottyń sheshimi

Alaıda, sýdıa Baqytjan Baqyrbaev aıyptalýshylardy qamaýdan bosatýǵa negiz tappady. Sottyń habarlaýynsha, is jańa aıyptaý aktisimen kelip túskendikten, qamaýdaǵy merzim 2026 jylǵy 7 sáýirden bastap qaıta esepteletin bolady. Sonymen qatar, sot Ahmedjanov pen Bakırovtyń densaýlyǵyna qatysty alǵa tartylǵan ýájderdi qabyldamady. Sot medısınalyq kómektiń qamaýdaǵy jaǵdaıda da kórsetilýi múmkin ekenin atap ótti.

Osylaısha, Almasqan Ahmedjanov, Ardaq Samambetov, Erlan Jarmuhanbetov jáne Almazhan Bakırov qamaýda qalatyn boldy. Al Muhanbetalı Shalqarbekov pen Berik Úskembaev kepildikpen bosatyldy.

Nege birinshi úkim buzyldy?

2026 jylǵy 25 aqpanda apelásıalyq alqa birinshi ınstansıa sotynyń 2025 jylǵy 17 aqpandaǵy úkimin buzǵan bolatyn. Sot materıaldaryna sáıkes, buzýshylyqtarǵa sot tergeýiniń tolyq emestigi jáne prosesýaldyq buzýshylyqtar sebep bolǵan. Sondaı-aq, sot alqasy sottalǵandardan 6,4 mıllıard teńgeden astam somaǵa azamattyq talap qoıý týraly birinshi ınstansıa sotynyń jeke qaýlysyn da buzdy.

Eks-bas sáýletshi ne úshin sottaldy?

2025 jylǵy 17 aqpanda Almatynyń qylmystyq ister jónindegi mamandandyrylǵan aýdanaralyq soty is boıynsha alty aıyptalýshyny jer telimimen jasalǵan alaıaqtyq áreketter boıynsha kináli dep tanydy. Almasqan Ahmedjanov qalalyq josparlaý jáne ýrbanıstıka basqarmasynyń eks-basshysy retinde asa iri kólemde alaıaqtyqqa kómekteskeni jáne laýazymdyq ókilettigin asyra paıdalanǵany úshin 11 jylǵa bas bostandyǵynan aıyryldy. Ardaq Samambetov, Erlan Jarmuhanbetov, Almazhan Bakırov jáne taǵy basqalar da ártúrli merzimderge sottaldy.

Tergeý nusqasy boıynsha, Ahmedjanov jer telimderiniń maqsattyq taǵaıyndalýyna sáıkes kelmegenine qaramastan, «Dınastıa» jáne Jetisu Park turǵyn úı keshenderiniń jobalaryn maquldaǵan. Onyń ústine, bas sáýletshi jeke turǵyn úı qurylysyna arnalǵan jerlerde kóp qabatty úılerdiń salynýyna ruqsat bergen.