InfoHub Logo

Almaty qalasynyń ortalyǵynda ornalasqan, shamamen 2500 jyl burynǵy kóne qorǵan buzylyp jatyr. Bul týraly áleýmettik jelide qala turǵyny jarıalaǵan sýretterden belgili boldy. Qalanyń beldi turǵyndary bul jańalyqqa alańdaýshylyq bildirip, tarıhı eskertkishtiń ne úshin buzylyp jatqanyn suraýda.

Bul týraly Infohub.kz aqparat agenttigi habarlaıdy.

Kóne qorǵannyń tarıhy

Áleýmettik jelide jarıalanǵan málimetterge súıensek, bul qorǵan Jandosov jáne Rozybakıev kósheleriniń qıylysynan tómende ornalasqan. Mamandardyń aıtýynsha, qorǵan erte temir dáýirine, ıaǵnı b.z.d. VII-V ǵasyrlardaǵy saqtar kezeńine jatady. Onyń bıiktigi shamamen alty metr, dıametri 60 metrge jýyq bolǵan.

Nelikten buzylyp jatyr?

Qala ákimdiginiń habarlaýynsha, Bostandyq aýdany, 20-shy kóshedegi bul qorǵan 2015 jyly Almaty qalasy mýzeıleri birlestiginiń mamandarymen zerttelgen. Sol jyly qalalyq mádenıet basqarmasy ony jergilikti mańyzy bar tarıh jáne mádenıet eskertkishteriniń memlekettik tiziminen shyǵarǵan. Sebebi, qorǵannyń tarıhı-mádenı qundylyǵy joıylyp, kóp jyldar boıy buzylyp, nashar kúıde bolǵan.

Mamandardyń dereginshe, qorǵan avarıalyq jaǵdaıda bolǵan: úıindisi is júzinde tolyq buzylyp, nysan uzaq ýaqyt boıy adam áserine ushyraǵan.

«2024 jyly «Arheologıalyq zertteýler» JSHS júrgizgen tarıhı-mádenı saraptama nysannyń tarıhı-mádenı qundylyǵynyń joǵalǵany jáne ony tarıh pen mádenıet eskertkishi retinde odan ári saqtaý múmkin emestigi týraly buryn jasalǵan qorytyndylardy rastady», - dep habarlady ákimdikten.

Ornyna ne salynady?

Qazirgi tańda bul aýmaqta Egizbaev kóshesi, 9 mekenjaıynda ornalasqan 2500 oryndyq jańa mektepke baratyn kirme jol salynyp jatyr. Jumystardy osy jyldyń tamyz aıynda aıaqtaý josparlanǵan.

Aıta keteıik, Almatyda birneshe kóne qorǵan saqtalǵan. Solardyń biri Rozybakıev pen Shtraýs kósheleriniń qıylysy mańynda ornalasqan. Buǵan deıin munda ashyq aspan astyndaǵy murajaı – «Sak mádenıetiniń álemdik ortalyǵyn» qurý josparlanǵan bolatyn.